ތަރައްގީ އާއި ތަހުޒީބަކީ ވަކި ބަޔަކަށްވީތީ ލިބެމުން ނުވަތަ ނުލިބެމުން އަންނަ އެއްޗެއް ނޫނެވެ. ދުނިޔޭގެ ކޮންމެ ތަނެއްގައި ވީ ބަޔަކު ކަމުގައި ވިޔަސް، ދުނިޔެ ދެކޭ ތަރައްގީގެ ފޮނި މީރުކަން އެބަޔަކަށް ލިބެންވާނެއެވެ. ހަމަ އެކަނި ތަރައްގީއެއްވެސް ނޫނެވެ. ތަހުޒީބާއި ތަމައްދުނުގައިވެސް އިންސާނާ ކުރިއަރާ ދާންވާނެއެވެ.

ދުނިޔޭގެ އެކި ކަންކޮޅުތަކުގައި އިންސާނުން ވަޒަންވެރިވެ އުޅެމުން ދެއެވެ. އެއްބަޔަކު ވާ ބޯ ޖަންގަލިތަކުގައި އުޅޭއިރު، އަނެއްބަޔަކު ކޮންކުރިޓުން ފުރިފައިވާ ތަރައްގީ ސިޓީތަކުގައި އުޅެމުން ދެއެވެ. އެއްބަޔަކު ހަނަފަސް ސަހަރާތަކުގައި އުޅެމުން ދާއިރު އަނެއްބަޔަކު ފިނި ހިސާބުތަކުގައި އުޅެމުން ދެއެވެ. އެއްބަޔަކު އުސް ފަރުބަދަތަކުގެ މަތީގައި އުޅެމުންދާއިރު، އަނެއްބަޔަކު ބިންތިރި ކުދި ޖަޒީރާ ތަކުގައި އުޅެމުން ދެއެވެ. އެހެނަސް މިހުރިހާ އެންމެންނަކީ ތަރައްގީއާއި ތަމައްދުނުގައި ކުރިއަރާ ދާ ބައެކެވެ. ތަފާތީ ކޮންމެބަޔަކުވެސް ތަމައްދުނުވަމުންދާ ގޮތެވެ.

ގަބޫލުކުރައްވާށެވެ! ދުނިޔޭގެ ބިމުގައި އެކި ކަންކޮޅުތަކުގައި އިންސާނުން ލައްވާފައި ވުމީ އެކަމުގައި އެތައް ސިއްރުތަކެއް ވާނޭކަމެކެވެ. އާދޭހެވެ! ހަނަފަސް ބިމެއް ތަރައްގީ ކުރާ އުސޫލުން، ފިނި ސަރަހައްދެއް ތަރައްގީއެއް ނުކުރެވޭނެއެވެ. އުސް ފަރުބަދަތައް ތަރައްގީ ކުރާ ފަދައަކުން ބިންތިރި ޖަޒީރާތައް ތަރައްގީއެއްވެސް ނުކުރެވޭނެއެވެ. ބިން ބޮޑު ބޮޑެތި ގައުމުތައް ތަރައްގީ ކުރާހެން ބިން ކުދި ނުވަތަ ބިމުގެ ސަތަހަ ކުޑަ ގައުމެއް ތަރައްގީއެއް ނުކުރެވޭނެއެވެ. އެހެން ކަމުން ކޮންމެ ބަޔަކުވެސް އެބަޔަކު ތަރައްގީވެ ކުރިއަރާ ދާނޭ ގޮތް އަމިއްލައަށް ހޯދާ ދެނެގަންނަން ވާނެއެވެ.

ދިވެހި ރާއްޖެއަކީ ބިންތިރި، ބިމުގެ ސަތަހަ ކުޑަ، ޖަޒީރާ ގައުމެކެވެ. އަދި ކިއެއް މިއީ ހަނަފަސްކަމެއް، ފިނިވެ ގަނޑުވުމެއް ވެސް މާހައުލުގައި ނުވާ ގައުމެކެވެ. އެހެންކަމުން، މި ޖަޒީރާ ރަށްތަކުގެ ތަމައްދުނުގެ ތަސައްވުރަކީ މި ޖަޒީރާ ރަށްތަކަށް ހެޔޮވަރު ތަސައްވުރަކަށް ވާން ޖެހޭނެއެވެ.

ކުރިއެރުމާ ތަރައްގީގައި ދިވެހިން އަބަދުވެސް ބަލަނީ ހުޅަނގުގެ ގައުމުތަކަށެވެ. އެ ގައުމުތަކުގައި ކަން ކުރާ ގޮތަށެވެ. އެ ގައުމުގައި ހިންގާ ހަރަކާތް ތަކަށެވެ. އެ ގައުމުތަކުގައި ގެންގުޅޭ ތަކެއްޗަށެވެ. އެ ގައުމުތަކުގައި ކިޔަވައިދޭ މަންހަޖު ތަކަށެވެ. މިހެން ކަން ކުރެވޭ މައިގަނޑު އެއް ސަބަބަކީ ތަރައްގީއާއި ތަމައްދުނުގައި، ބަވަނަ ވެފައިވާ މި ދުނިޔޭގައި އެހެން ގައުމުތަކާއި އެއްހަމައެއްގައި ފައިހަމަ ކުރުމުގެ ބޭނުމުގައެވެ. އާދޭހެވެ! އެހެން ގައުމުތަކާއި އެއް ހަމައެއްގައި ފައި ހަމަ ކުރެވޭނީ އެ ގައުމުތަކުން އަރާފާ ހުންނަ ކަހަލަ ބޫޓަކަށް އަރައިގެންނެއް ނޫނެވެ. ހުސް ފަޔާވެސް އެ ގައުމުތަކާ އެއްހަމައެއްގައި ފައި ހަމަ ކުރެވިދާނެއެވެ. ބޭނުންވަނީ ހިކުމަތްތެރިކަމާއި ވިސްނުން ތޫނުފިލިކަމެވެ.

އަދޭހެވެ! ދިވެހިން ބޭނުންވަނީ ބޭރުގެ ބޮޑެތި ގައުމުތަކުގައި ކިޔަވައިދޭ އެއްޗެހި ކިޔަވާށެވެ. ތިމާގެ މާހައުލު ނުދަތަސް ފަރަންޖީ އެ ތަކެތި އެނގުމުން އިލްމު ލިބުނީ ކަމަށް ހީކުރެވެއެވެ. ދިވެހިން ބޭނުންވަނީ ބޭރުގެ ބޮޑެތި ގައުމުތަކުގައި އެގައުމުތަކުގެ މީހުން ކުރާ މަސައްކަތްތައް ކުރާށެވެ. މަސައްކަތްތެރިކަމަކީ އެއީ ކަމުގައި ދެކިގެންނެވެ. ދިވެހިން ބޭނުންވަނީ ބޭރުގެ ބޮޑެތި ގައުމުތަކުން ހަދާ ގާނޫނުތައް މި ގައުމުގައިވެސް ހަދާށެވެ. ތަހުޒީބައީ އެއީ ކަމުގައި ދެކިގެންނެވެ. ދިވެހިން ބޭނުންވަނީ ބޭރުގެ ބޮޑެތި ގައުމުގައި ދުއްވާ އުޅަނފުފަހަރު ރާއްޖޭވައިވެސް ދުއްވާށެވެ. މޮޅު އަދި "ސަޅި" ގޮތަކީ އެއީ ކަމުގައި ދެކިގެންނެވެ. އާދޭހެވެ! މިފަދައިން ދިވެހިން ކިޔަވާ މަންހަޖުތައް މި ރާއްޖެއަށް ތަންފީޒު ކުރުމުން އެވަނީ މޮޔަ ކަމަކަށެވެ. މިފަދަ ގާނޫނުތައް ރާއްޖޭގައި ތަންފީޒު ކުރުމުން އެ ވަނީ ގައުމާއި ދީނާއި ބީރައްޓެހި، ރައްޔިތުން ބަލައިނުގަންނަ އަދި ކިޔަމަން ނުވާ ގާނޫނު ތަކަކަށެވެ. މިފަދަ އުޅަނދުތައް ރާއްޖޭގެ ހަނި ގޯޅިތަކަށް ވައްދާ ދުއްވަން އުޅުމުން ދެފާރުދޭތެރޭ ފިތެނީއެވެ. ބޭރުގެ ގައުމުތައް ނަމޫނާއަށް ބަލައިގެން ޖަޒީރާ މި ރަށްތައް ތަރައްގީކުރަން އުޅުމުން މިފެންނަނީ އޮއެވާލި ދާ ބުރިއެއްގައި ކުނިޖެހިފައި އޮންހެން ކަންކަން ހައްލުނުވެ އޮޅުންބޮޅުންވެ، އެގޮތްމިގޮތް ވަމުންދާ މަންޒަރެވެ. އެހެނަސް އަދިވެސް ދިވެހިން ބޭނުންވަނީ ބޭރުގެ ބޮޑެތިގައުމުތަކުގައި މީހުން އުޅޭހެން، އެމީހުން ތަރައްގީވާގޮތަށް އެ ފިޔަވަޅުގައި ފައި އަޅާ ތަރައްގީވާށެވެ. ނުވިޔަސް، ނުވާނޭ ކަން އެނގުނަސް ބޭނުންވަނީ ހަމަ އެގޮތެވެ. ދިވެހިންނަށް ވެފާ މިތިބީ ކޮންކަހަލަ ގޮތެއް ހެއްޔެވެ؟

އާދޭހެވެ! ތަރައްގީ ނުވާންވިކީ އެއް ނޫނެވެ. އެހެނަސް ތަރައްގީ ވާންވީ ގޮތަކީ ދިވެހި ރަށްތަކަށް ހެޔޮވަރު، ހަށްޓަށް ނޭވައި ފެތޭ ގޮތަކަށެވެ. އެނޫނީ ކަންކަން ހައްލުވުމާއި ތަރައްގީވުމާއި ތަހުޒީބުވުމާއި ތަމައްދުނުގައި ދާނީ ފަހަތަށެވެ.