އޭ ލޮބުވެތި މުސްލިމު އެކުވެރިޔާއެވެ! އަހަރަކު އެންމެ ފަހަރަކު އަހަރެމެންނާ ބައްދަލުކުރާ މައްސަރެއް އަހަރެމެންނާ ބައްދަލުކޮށް ވަކިވެދާން ތައްޔާރު ވެއްޖެއެވެ. މިއީ ވަރަށް ހާއްސަ މެހެމާނެކެވެ. މި މެހެމާނަށް އަހަރެމެން ކަމޭހިތީ ކިހިނަކުން ހެއްޔެވެ؟ މެހެމާނު އަހަރެމެންނާ ވަގިވެގެން ދާނީ ރުހިގެންވާ ހާލުގައި ހެއްޔެވެ؟ މި މެހެމާނު ދެން އަހަރެމެންނާ ބައްދަލު ކުރާނެ ހެއްޔެވެ؟ މިފަދަ ކިތަންމެ ސުވާލެއް، މި މެހެމާނާއި މި މެހެނާނުގެ ދަތުރާއި ގުޅިގެން އުފައްދަން އެބަ ޖެހެއެވެ.

ރަޙްމަތާއި ބަރަކާތާއި، އަދި ފުއްސެވުމާއި ދިންނެވުމުގެ މި މެހެމާނު އަހަރެމެންނާ މި އަހަރު އަލްވަދާއު ކިޔުމަށް ތައްޔާރުވަނީއެވެ. މި މެހެމާނު އަހަރެމެންނަށް ގެނައި އެއްވެސް ހަދިޔާ އަކުން އަހަރެމެންނަށް ފައިދާއެއް ކުރި ހެއްޔެވެ؟ ރަޙްމަތާ ބަރަކާތުގެ ހަދިޔާއިން މިންވަރެއް ނަމަވެސް ލިބުނު ހެއްޔެވެ؟ ފުއްސެވުމާއި ދިންނެވުމުން ހެޔޮކަމެއް ލިބުނު ހެއްޔެޗެ؟ އާދޭހެވެ! ބަރަކާތްތެރި ރަމަޟާން މަސް ހުސްވެގެން މި ދަނީ އަހަރެމެންގެ ނަފްސުތަކުގައި ކޮންމެވެސް ވަރަކަށް ރޫހާނީ ބާރުވެރިކަމެއް ދެއްވާފައެވެ. އަޅުކަމާއި އަޅުކަން ކުރުމުގެ ޝައުގާ ލޯބި ކޮންމެވެސް މިންވަރަކަށް އިތުރުކޮށްދީފައެވެ. ނަމަވެސް މި މެހެމާނު އެ ދަނީ ހިތްހަމަ ޖެހިގެންވާ ހާލުގައިހެއްޔެވެ؟ އެކަން އަހަރެމެންނަށް އެނގޭނެހެއްޔެވެ؟ އާނއެކެވެ! އެކަން އަހަރެމެންނަށް އެނގޭނެއެވެ.

ރަމަޟާން މަހަކީ އެ މަހެއްގައި އަޅުކަން ކުރު ގިނަ ކުރަން ޖެހޭ މައްސަރެކެވެ. ނަމަވެސް އަޅުކަން ކުރުން ގިނަ ކުރުމާއި އަޅުކަން ކުރުން މަތީ ދެމި ހުރުމާއި އިންސާނާގެ އުޅުން އިސްލާހު ވުމާއި ނުވުމާއި މިއީ ހައްތަހާވެސް މި މައްސަރާއި ގުޅުން ހުރި ކަންކަމެވެ. ރަމަޟާން މަހެއް އައިސް ބައްދަލުވެ ދާއިރު، މި މަހުގައި އަހަރެމެންގެ ފާފަތައް ނުފުއްސަވާ މި މަސް ނިމިގެން ހިނގައްޖެނަމަ، އެ މީހެއްގެ އަބާއްޖަވެރިކަމާއެވެ. މި މަހުގައިވާ ބަރަކާތުން ފުރިގެންވާ ލައިލަތުލްޤަދްރީގެ ރޭ ނުލިބިއްޖެ މީހާގެ ނާކާމިޔާބު ކަމާއެވެ. ރަމަޟާން މަސް އައިސް ގޮސްވެ ދާއިރު، މީހާގެ އުޅުމަށް ކުޑަނަމަވެސް ބަދަލެއް ނައިސްފި މީހާގެ އަބާއްޖަވެރިކަމާއެވެ. ރަމަޟާން މަސް އަހަރެމެންނާ ބައްލަދު ކުރަނީ ގިނަ ގުނަ ހަދިޔާތަކާއި އެކުގައެވެ. ނަފްސު ޠާހިރު ކުރުމުގެ ބޮޑު ހަދިޔާވެސް ހިފައިގެންނެވެ. އަހަރެމެންނަށް އޮތީ އެ ހަދިޔާގެ ބޭނުން ހެޔޮގޮތުގައި ހިފުމެވެ. 

މިއީ އަހަރަކު އެންމެ ފަހަރަކު އަހަރެމެންނާ ބައްދަލު ކުރާ މެހެމާނެކެވެ. އެހެންކަމުން މި މެހެމާނަށް އަހަރެމެން ވަރަށް ބޮޑަށް ކަމޭ ހިތަން ވާނެއެވެ. އަދި އަންނަ އަހަރުވެސް މި މެހެމާނާއި ބައްދަލުވޭތޯ ދުޢާ ދަންނަވަން ވާނެއެވެ. ދެން މި މެހެމާނާއި ބައްދަލުވާނޭ ކަމުގެ ކުޑަނަމަވެސް ޔަގީންކަމެއް އޮތީ ފަހެ ކާކުގެ ހެއްޔެވެ؟ އޭ އެންމެހާ މުސްލިމުންނޭ! މި މަހުގައި އަހަރެމެން ކުޅަ އަޅުކަންތަކުގައި އަހަރެމެންގެ ހާލިސް ނިޔަތެއް އޮތްތޯއެވެ؟ ތަރާވީހަށާއި ދަމު ނަމާދަށް ދިޔައީ ޘަވާބާއި ދަރުމަ އެދިގެން ހެއްޔެވެ؟ ނުވަތަ މައިންބަފައިން ނުރުހިދާނެތީ ހެއްޔެވެ؟ ނުވަތަ ހަމަ އެކަނި ލައިލަތުލުޤަދްރީގެ ރޭ ހޯދުމުގެ ނިޔަތުގައި ހެއްޔެވެ؟ ތިބާގެ ތިޔަ ނިޔަތުގައި އޮތީ ކޮން އިހުލާސްތެރިކަމެއް ހެއްޔެވެ؟ އެނގޭހެއްޔެވެ! ދެއްކުންތެރިކަމަކީ އެއްވެސް ހާލެއްގައި ތިބާއަށް މޮޅެއް ލިބޭނޭ ކަމެެއް ނޫނެވެ. މެހެމާނު އަހަރެމެންނާ ހަމައަށް ގެނެސްދިން ހަދިޔާތަކުން އަހަރެމެން މަހުރޫމުވެސް ވެދާނޭ ކަމެކެވެ.

އެނގޭހެއްޔެވެ؟ މީސްމީޑިޔާގައި ދައުރުވާތީ ވަރަށް މަޝްހޫރުވި ޕޯސްޓެއް ދެކުނީމެވެ. އެއީ ރޯދަ މަހުގެ ފަހު ދިހައިގައި އެއް ހާސް ރުފިޔާ ސަތޭކައިން މާރުކޮށް ކޮންމެ ރެއަކު ޞަދަޤާތް ކުރުމަށް ބާރު އެޅި ޕޯސްޓެކެވެ. ވަރަށް ޙިކްމަތްތެރި އެހާމެ މޮޅު ޕޯސްޓެކެވެ. ލައިލަތުލްޤަދްރީގެ ރޭގަނޑު ބޮޑުތަނުން ކަށަވަރު ކުރެވޭނޭ މަގެކެވެ. ނަމަވެސް ދަންނަވަންތޯއެވެ. އެކަމުގައިވެސް އޮތީ ތިބާގެ އިހުލާސްތެރިކަމެވެ. އަހަރުގައި ބާކީ އޮތް އެންމެ ދުވަހަކުވެސް، އެއްވެސް މިންވަރެއް ހޭދަ ނުކޮށް އަދި ހޭދަކުރަން ބޭނުން ނުވެ، ރަމަޟާން މަހުގެ ފަހުދިހައިގެ ރޭތަކުގައި އެކަނި ހޭދަކުރާނަމަ ތިބާގެ އިހުލާސްތެރިކަން ކޮބާ ހެއްޔެޗެ؟ އެންމެ ރަނގަޅެވެ. އެއީވެސް ޞަދަޤާތެކެވެ. ﷲ ގެ މަގުގައި ހޭދަކުރެވުނު އެއްޗެކެވެ. އެކަމު ތިބާގެ އިހުލާސްތެރި ނިޔަތާއި ތިބާގެ މުއްބާރުކުރި މިންވަރު މޮޅަށް ދެނެވޮޑިގެންވާނީ މާތް ﷲ އެވެ. 

އަހަރަކު އެއްފަހަރު ބައްދަލުކުރާ މި މަހަކީ ހަގީގަތުގައި ވަރަށް މަދުން ނޫނީ ބައްދަލުވާ މައްސަރެއް ނޫން. އެމީހެއްގެ އުމުރުން ހޭދަކުރި ކޮންމެ އަހަރު، އެއިން ކޮންމެ އަހަރަކު އެންމެ ފަހަރަކު ނޫނީ ބައްދަލުނުވާނެ އެވެ. މިސާލަކަށް އަހަރެމެންގެ އުމުރަކީ 65 އަހަރު ކަމުގައި ވަނީނަމަ އެމީހަކާއި ރަމަޟާން މަސް ބައްދަލުކުރާނީ ހަމަ އެންމެ 65 ފަހަރެވެ. މިކަން އަހަރެމެންނަށް ނުވިސްނެނީ ހެއްޔެވެ؟ ނުވަތަ ނޭނގެނީ ހެއްޔެވެ؟ ވިސްނޭނަމަ ނުވަތަ އެނގޭނަމަ، މިކަމަށް ވިސްނާ ފަރުވާތެރިވާށެވެ. ނިޔަތުގައި އިހުލާސްތެރިކަމުގެ ކުލަ ޖައްސާށެވެ. ދެއްކުން ތެރިކަން މިންހެން ދޫކޮށްލާށެވެ.

ހުރިހާވެސް އެއްޗަކީ އަހަރެމެންގެ ނިޔަތެވެ. އިހުލާސްތެރި ހިތެވެ. ދެއްކުންތެރި ކަމުން ދުރުވެގެންވާ ޝައުގުވެރިކަމެވެ. އަހަރެމެން އެންމެން އުންމީދު ކުރަނީ އަހަރެމެން އެންމެންގެ ނިޔަތަކީ އިހްލާސްތެރި ނިޔަތަކަށް ވުމެވެ. މާތް ﷲ އަހަރެމެން އެންމެންގެ އަޅުކަންތައް ޤަބޫލު ކުރައްވާ ފާފަ ފުއްސެވުމެވެ. އަދި މިފަދަ ކިތަންމެ ރަމަޟާން މަހަކާއި އަހަރެމެން ބައްދަކު ވުމުގެ ހެޔޮ ތައުފީޤު މިންވަރު ކުރެއްވުމެވެ. އެންމެ މޮޅަށް ދެނެވޮޑިގެންވަނީ ﷲ އެވެ.