ދިވެހި ރާއްޖޭގައި އުޅެމުންދާ ބައެއް ދިވެހިންނަކީ ހަގީގީ ދިވެހިންނޭ ބުނަންވެސް މިއަދު ޖެހިލުންވެއެވެ. އެމީސްމީހުންގެ ކިބައިގައި ދިވެހި ވަންތަ ކަމުގެ ހަމަ ކުޑަ ނަމަވެސް އަސަރެއް ފެންނަން ނެތީމައެވެ. ވާހަކަ ދައްކާ އުޅޭ ބަހަކީ ފަރަންޖީ ބަހެކެވެ. ލިޔެ އުޅެނީ ވެސް ފަރަންޖީ ބަހުންނެވެ. ދިވެހި ބަހާއި އިސްލާމް މާއްދާ ކިޔަވަނީ ދެވަނަ ބަހެއްގެ ގޮތުންނޭ ހީވާ ކަހަލައެވެ. ދިވެހި ރާއްޖޭގެ ޖަޒީރާ ދިރިއުޅުމުގެ ކުޑަވެސް ރަހައެއް އެއުރެންގެ އަރުގައި ނުލައެވެ. އާދޭހެވެ! ދިވެހިން، ދިވެހި ގައުމުގައި "ފަތުރުވެރިންނަށް" ވެއްޖެއެވެ.

ބޮޑެތި ބަންދުތަކާއި ޗުއްޓީތަކަކީ ފަތުރުވެރިން އެމީހުންގެ ހިތްތައް ހަމަ ޖައްސާލުމަަށް، އެމީހުންގެ މާހައުލުން ބޭރަށް ނުކުމެލާ، ތަފާތު ތަޖުރިބާތަކެއް ކުރާ ދުވަސްތަކެކެވެ. ދިވެހި ރާއްޖޭގައިވެސް، ކޮންމެ އަހަރެއްގެ ފަހުކޮޅާއި އަނެއް އަހަރުގެ ކުރީކޮޅަކީ ފަތުރުވެރިކަމުގެ، "ސީޒަން" ތެރެއޭ ބުނެވިދާނެއެވެ. ފަރަންޖީ ގައުމުތަކުގައި، ދިވެހިންގެ ދިރިއުޅުމާއި މުޅިން ތަފާތު، ދިވެހިންގެ މާހައުލާއި މުޅިން ތަފާތު މާހައުލުތަކުގައި އުޅެމުން، އެ ކާރޫ ބާރޫ ބޮޑު ދިރިއުޅުމާއި އެ މާހައުލާއި، އާދަވެ އެ ދެކޭ މަންޒަރުތަކުން ދުރައް ޖެހިލާ، ތަފާތު އަރާމު، ހިމޭން މާހައުލެއްގައި، ހިތާއި ނަފުސަށް ފިނިކަމެއް ހޯދުމަށްޓަކައި ގިނަ ބަޔަކު ރާއްޖެއަށް ދަތުރުކުރެއެވެ.

ރާއްޖޭގެ ރަށްތަކާއި ރިސޯޓުތަކުގެ އެ ހިމޭން ޖައްވުގައި، ގުދިރަތީ ރީތިކަމުގެ ފުރިހަމަ ބަގީޗާތަކުގައި އުފަލާ އަރާމުގައި ހިތްހަމަ ޖެހިގެންވާ ހާލު ފަތުރުވެރިން ވަގުތު ހޭދަކުރީ ބޮޑު އަގު ދީގެންނެވެ. ފަތުރުވެރިންނަކީ އެމީހުންގެ މާހައުލާ ތަފާތު މާހައުލެއްގައި އުފާކޮށް ހިތްހަމަޖެހިލާން ދަތުރުކޮށް އުޅޭ ބައެކެވެ.

އާދޭހެވެ! ހިތާމައަކީ މިއަދު ބައެއް ދިވެހިން، މި ދިވެހި ރާއްޖޭގައި ފަތުރުވެރިންނަށް ވާ ކަމެވެ. މާލޭގައި އުޅޭ މީހުންނެވެ. އެކި ސަބަބު ތަކާ ހުރެ މާލެ ބަދަލުވާން ޖެހިފައިވާ މީހުންނެވެ. ނުވަތަ ކޮންމެވެސަ އަމިއްލަ ސަބަބެއް މަތިކޮށް މާލޭގައި އުޅޭ މީހުންނެވެ. މާލޭގެ ދިރިއުޅުން ހާސްބައި މޮޅުކަމަށް ބުނެ ގޮސް އުޅޭ މީހުންނެވެ. އެތަނުން އެ ފެންނަނީ ދިވެހިންގެ ދިރިއުޅުމެއް ނޫނެވެ. މުޅިން ތަފާތެވެ.

ފަތުރުވެރިންނެކޭ އެއްފަދައިން މާލޭގައި މި އުޅޭ މީހުންވެސް ޗުއްޓީތަކަށް އެމީހުންގެ އާއިލާ ކައިރިއަށް ރަށްރަށަށް ދެއެވެ. އެއީ އެމީހުންގެ ފަތުރުވެރިކަމުގެ މަންޒިލޭ ބުނެވިދާނެއެވެ. އެހެނީ ޗުއްޓީއެއްގައި ނޫނީ މޫދު ނުފެންނަ ދިވެހި ރާއްޖޭގައި އުޅޭ، ދިވެއްސަކަށް އޭނާ ވީތީއެވެ. ޗުއްޓީގައި ނޫނީ ތާޒާ މަހެއް ލޮލަށް ނުފެންނާތީއެވެ. ޗުއްޓީގައި ނޫނީ ދޮންވެލިގަނޑެއްގައި ހިނގާ ނުލާތީއެވެ. ޗުއްޓީއެއްގައި ނޫނީ ރަށްވެހި އެއްވެސް ކަމެއް ނުދެކޭތީއެވެ. ގޭދޮށާއި މަގުމަތި ކުނިކެހުމުގެ ސަގާފަތް، ޗުއްޓީގައި ނޫނީ ނުފެންނާތީއެވެ. ޗުއްޓީގައި ނޫނީ ފެންވަރާ ވަޅެއް، ދާންޏެއް ނުދެކޭތީއެވެ. ނަމަވެސް އެއީ ވެސް ދިވެހިންނެވެ. ހަމަ މި ރާއްޖޭގައި އުޅޭ ދިވެހިންނެވެ. އެކަމަކު އެއީ ޗުއްޓީ ދިވެހިންނެވެ.

އެނގޭ ހެއްޔެވެ؟ މި މީސްމީހުން މާލޭގައި އުޅިފާ، ރަށްރަށަށް ދެވުމުން، ހުއްޓާ ނުލާ ފޮޓޯ ނަގާނެއެވެ. ފަތުރުވެރިން ފަދައިންނެވެ. އާންމު ކަންކަމަށް ނުވާތީއެވެ. މީސްމީޑިޔާގައި ހިއްސާވެސް ކުރާނެއެވެ. ތަފާތު ތަޖުރިބާ ތަކަކަށް ވީތީއެވެ. އެކަމަކު އެނގޭ ހެއްޔެވެ؟ އެއީ ރަށްފުށުގައި އުޅޭ ދިވެހިންގެ ކޮންމެ ދުވަހެއްގެ އާދައެވެ. އެއީ އެމީހުންނަށް މާ ތަފާތުކަމެއްވެސް ނޫނެވެ. އެކަމަކު ދެކިބަލާށެވެ! އެއީވެސް މިއީވެސް ދިވެހިންނެވެ. ހަމަ ދިވެހި ރާއްޖޭގައި އުޅޭ ދިވެހިންނެވެ. މި ވަނީ ކިހިނެއް ހެއްޔެޗެ؟ އާދޭހެވެ! ދިވެހިން، ދިވެހި ގައުމުގައި "ފަތުރުވެރިންނަށް" ވަނީއެވެ.