ޓީޗަރުންގެ މުސާރައިގެ އޮނިގަނޑަށް ގެނެވުނު ހެޔޮ ބަދަލާއި އެކެ، ތަފާތު އެކި އެކި ވާހަކަތައް އެކި މަގުމަގުން އިވެމުން ދެއެވެ. މިއީވެސް އެފަދަ ވާހަކައެކެވެ. އެފަދަ ސުރުހީއެކެވެ. މީސްމީޑިޔާގައި މަޝްހޫރު "ވިއުގަ" އަކުން ލިޔެފައިވާ ލިޔުމެކެވެ. ޓީޗަރުންނަށް ބޮޑު މުސާރައެއް ދޭ ކަމަށާއި އަހަރެމެންނަށް މުސާރަ ބޮޑުނުވާ ކަމަށް ލިޔެފައިވާ ލިޔުމެކެވެ. ރަނގަޅު ވާހަކައެކެވެ. ޓީޗަރުންގެ މުސާރަ ބޮޑުވެއްޖެއެވެ. އަހަރެމެންގެ މުސާރަ ބޮޑެއް ނުވިއެވެ. އަހަރެމެންނަށް އެކަމާ ޝަކުވާ ކުރެވިދާނެ ހެއްޔެވެ؟ އަހަރެންނަކީ ކާކު ހެއްޔެވެ؟

މަސައްކަތުގެ މާހައުލުގައި ތަފާތު ދަރަޖަ ދަރަޖައިގެ ތަފާތު ޝަރުތުތައް އެކުލެވިގެންވާ މަސައްކަތްތައް ވެއެވެ. މަތީ މަގާމުތަކުގައި ގިނަ ނުވަތަ މަތީ ޝަރުތުތައް ވާއިރު ބައެއް ވަޒީފާ ތަކުގައި ހުންނަނީ ވަރަށް އާދައިގެ ޝަރުތު ތަކެވެ. ދަރަޖަ ވަކިކޮށް ޝަރުތު ވަކިކޮށް ވަޒީފާގެ އޮނިގަނޑު އޮންނަނީ އެބަޔަކަށް ދޭ މުސާރަވެސް ތަފާތު ވާނެތީއެވެ. ޝަރުތު ގިނަ ނުވަތަ މަަތި މަގާމުތަކަށް ކުރިމަތި ލެވޭނޭ ބުރަ މަސައްކަތާއި ހިތްވަރާ އެކު އެ ޝަރުތު ފުރިހަމަކުރަން މަސައްކަތް ކުރި ބަޔަކަށެވެ. ވެލިގަނޑަށް ފެެތި، "އަކުންބަކުން" ކުޅެން އުޅުމަކުން މަތީ މަގާމުތަކަކަށް ކުފޫ ހަމައެއް ނުވާނެއެވެ. އެއީ އެ މަގާމުތަކަށް ކުފޫ ހަމަވި މީނުންނަށް ބަދުބަސް ރައްދުކުރުމަށް އޮތް އުޒުރެއްވެސް ނޫނެވެ.

ޓީޗަރަކަށް ވެވޭނީ ބުރަ މަސައްކަތުންނެވެ. މޮޅަށް ކިޔަވައިގެންނެވެ. އަދި އެހާމެ ގިނައިން ވެސް ކިޔަވައިގެންނެވެ. އެހެނީ ޓީޗަރުންނަކީ އިލްމު ހޯދާ، އެ އިލްމު އެހެން ބަޔަކަށް ފޯރުކޮށްދޭ މީހުންނެވެ. އަދި ކިއެއް ޓީޗަރުންގެ ވަޒީފާ އަކީވެސް ބުރަ ވަޒީފާއެކެވެ. "އަހަރެމެންގެ" މުސާރަ ބޮޑެއް ނުވޭ ބުނެ، ޓީޗަރުންނަށް ހަސަދަލަމުން ހިނގާ މީހުންނަކަށް ޓީޗަރަކަށް ވުމުން، އެކަމުގައި ހުންނަ ބުރައެއް އިހުސާސެއް ނުކުރެވޭނެއެވެ. ބުރައީ މަސައްކަތު މާހައުލެއް ނޫނެވެ. ގޭގައިވެސް އެވެރިން ވަރަށްވެސް ބުރައެވެ. ކުރަނީ ހަމަ ސުކޫލު މަސައްކަތެވެ. އަދި ކިއެއްތޯއެވެ! ޓީޗަރުންނަކީ މާދަމާގެ މުޅު ގައުމު ކުރަހާ މީހުންނެވެ. ޓީޗަރެއް ދޭ ލަފާ ނުވަތަ ކިޔަވައިދޭ އެއްޗެއް ގަބޫލުކޮށް، ދެވޭ ތަމްރީނަކުން ތަރުބިއްޔަތުވެ ދެން ނުކުންނާން އޮތީ މާދަމާގެ ޖީލެވެ. މާދަމާ ގައުމުގެ ރައީސްކަމާއި ހޮސްޕިޓާތަކު ޑަކްޓަރު ކަމާއި، އިންޖީނުގޭ އިންޖިނޭރުކަމާއި، ކަނޑާއި ވައިގެ ދަތުރުތަކުގެ ކައްޕިންނާއި މިހެންގޮސް ކިތަންމެ ބައެކެވެ. ކޮންމެ މީހަކީވެސް ކޮންމެވެސް ޓީޗަރެއް، ފޯރުކޮށްދިން ތައުލީމެއްގެ މަތީ ބިންގާ އަޅަމުން ހިނގާ މީހެކެވެ. މުޅި ގައުމެވެ. މުޅި ގައިމެވެ. އެ އީވެސް ކިހާ ބޮޑު، ކިހާ ބުރަ ޒިންމާއެއްހެޔެވެ! ވަކި ސިނާއަތެއް އެވެރިންނަކަށް ނެތެވެ. މުޅި ތައުލީމީ ނިޒާމެވެ.

ކަންއޮތީ މިހެން ކަމުން ފަސްގަނޑަށް ފެތި "އަކުންބަކުން" ކުޅެން އުޅި މިއަދު ދަރަޖައިގެ ގޮތުން ދަށް، ޝަރުތުގެ ގޮތުން އާދައިގެ ވަޒީފާއެއްގައި އުޅެމުން، ޓީޗަރުންގެ މުސާރަ ބޮޑުކުރުމާއިއެކު "އަހަރެމެންގެ" މުސާރަ ބޮޑު ނުވުމުން، އެއްމެ ބަހެއްވެސް "އަހަރެމެންނަކަށް" ނުބުނެ ވޭނެއެވެ. އޭރު އަކުން ބަކުން ނުކުޅި، ހިތްވަރާއި އެކު މަސައްކަތް ކުރިނަމަތާއެވެ. ކޮންމެ އަކަސް ތަފާތު ވާނެއެވެ. ގަބޫލު ނުކުރެވޭނަމަ، ގަބޫލު ކުރާށެވެ. ކޮންމެވެސް ގޮތަކަށް ފަރުޖައްސާލާށެވެ.

މިއަދު ޓީޗަރުންގެ މުސާރަ ބޮޑު ކުރުމާއި އިގްތިޞާދީ ހީނަރުކަމެއްގެ ވާހަކައަކީ ވަރަށްވެސް އާންމު ވާހަކައެކެވެ. ރައްޔިތުންގެ ފައިސާއިން އެންމެ ބޮޑު އެއް މުސާރައެއް ނަގަމުންދާ ރައްޔިތުންގެ މަޖިލީހުގެ މީހުން އެ ނަގާ ބޮޑު މުސާރައާއި، އެ ލިބޭ އިނާޔަތްތަކާއި، ކުރާ މަަސައްކަތުގެ ވާހަކަ ދައްކާނޭ މީހަކު ނެތީހެއްޔެވެ! އިގްތިޞާދީ ހީނަރުކަމެއްގައި ޓީޗަރުންގެ މުސާރަ ބޮޑު ކުރުމުގެ ވާހަކަ ދެކެވޭއިރު، މަޖިލީސް މެންބަރުން އެ ނަގާ ބޮޑު މުސާރައާއި އެލަވަންސްތަކުގެ ވާހަކަ ދައްކާލާނޭ ވަކި އަނގައެއްވެސް ނެތެވެ!

އާދޭހެވެ! ޓީޗަރުންނަށް ބޮޑުކޮށްދިން އެ މުސާރައަކީ މީގެ ޒަމާންތަކެއް ކުރިންވެސް ބޮޑުކުރަން ޖެހިފައިވާ މުސާރައެކެވެ. ޓީޗަރުންނަށް އެ މުސާރަ ހައްގެވެ. ޖުމުލަކޮށް ހުރިހާ ޓީޗަރުންނަށެވެ. "އަހަރެމެން" ޓީޗަރަކަށް ނުވުމަކީ އަހަރެމެންގެ ކަމެކެވެ. އެއީ އެއްވެސް ޓީޗަރެއްގެ ކުށެއް ނޫނެވެ. އެހެންކަމުން ޓީޗަރުންގެ މުސާރަ ބޮޑުކޮށްގެން އެހެން މަގާމުތަކުގައި ތިބި ބަޔަކު "ހަޅޭލަވާކަށް" ހަގީގަތަކު ނުޖެހެއެވެ. ނަމަވެސް އަހަރެމެންނަށް ވާގޮތަކީ ހަސަދަވެރިވެވެނީއެވެ! ނޫންތޯއެވެ!