ޖުލައި 26 ވަނަ ދުވަހަކީ ދިވެހި ތާރީހުގައި ފާހަގަކޮށްލެވޭ ބޮޑު ދުވަހެކެވެ. މި ގައުމުގެ މިނިވަން ދުވަހެވެ. އިނގިރޭސީންގެ އަތްދަށުން މިރާއްޖެ މިނިވަންވެ، މިނިވަން ދައުލަތެއްގެ ގޮތުގައި ދުނިޔޭގައި ފައިހަމަ ކުރި ދުވަހެވެ. މިއީ އަހަރެމެން އެދުވަހަކަށް ހާއްސަކަމެއްދީ އެއީ ގައުމީ ފެންވަރުގައި ފާހަގަ ކުރާ ދުވަހަކަށް މި ވަނީ ހަދާފައެވެ. އެދުވަހުގައި މުޅިންވެސް ވަނީ ތައުރީފާ ހުޝާމަދު ކުރުމެވެ. ނަމަވެސް މިނިވަން ދުވަސް މިއަދު އަހަރެމެން ފާހަގަ ކުރާއިރު، ވިސްނަން ޖެހޭ ވަރަށް ބައިވަރު ކަންތައްތަކެއް ވެއެވެ.

މިނިވަންދުވަހުގެ ތާރީހު އިއާދަވާ ކަމީ އަހަރެމެން އުފާ ކުރާ ކަމެކެވެ. ނަމަވެސް އަދު މި މިނިވަން ދުވަހާމެދު އުފާވުމުގެ ކުޑަނަމަވެސް ހައްގެއް އޮތްކަމުގެ އިހުސާސެއް ނުކުރެވެއެވެ. މި ދުވަސް އަހަރެމެން ފާހަގަކުރާއިރު، މި މިނިވަންކަމޭ މި ބުނެވެނީ ކޮން މިނިވަންކަމަކަށް ކަން ބުނެދޭން އެބަޖެހެއެވެ. އެހެނީ މިނިވަންކަމުގެ މާނަ އަކީ ވަރަށް ފުޅާ މާނަައެކެވެ. ޒަމާނުއްސުރެ ދިވެހިންގެ ބިމަށް ފެން ބޮވައިގަނެފައި ތިބި މީހުންނާއި މުސްލިމުންގެ ހަތުރުން މިފަދަ ޝިއާރުތަކުގެ ބޭނުން ހިފައެވެ. ކީއްކުރަންތޯއެވެ؟ ކޮންމެވެސް ގޮތަކަށް މި "ރާއްޖެ" އަޅުވެތި ކުރުމަށެވެ. އަހަރެމެންނަށް ނޭނގޭ ކަމަކީ އެބައިމީހުން އަހަރެމެން އަޅުވެތިކުރާ ގޮތެވެ.

ފާހަގަ ކުރެވޭ މި މިނިވަންދުވަހަކީ ސިޔާސީގޮތުން މި ރާއްޖެ މިނިވަންވި މިނިވަންވުމެކެވެ. އެއީ އެއްވެސް ހާލެއްގައި މިއަދު ދުނިޔޭގެ ބައެއް ގައުމުތަކުން އެ ބުނާ މިނިވަންކަމުގެ ވާހަކައެއް ނޫނެވެ. އެބައިމީހުން އެ ބުނާ ދީނީ މިނިވަންކަމުގެ ވާހަކައެއް ނޫނެވެ. ލޯބިވާން ބޭނުން މީހަކާ ލޯބިވެ، ކައިވެނި ކުރަން ބޭނުންވާ މީހަކާ ކައިވެނިކޮށް ޖިންސީގުޅުން ހިންގަން ބޭނުންވާ މީހަކާ އެ ގުޅުން ހިންގުމަށް އޮތް މިނިވަން ކަމުގެ ވާހަކައެއް ނޫނެވެ. ހިތު ހުރި ގޮތަކަށް، ގޮތެއް ފޮތެއް ނެތިގެން، އުޅެން އޮތް މިނިވަންކަމުގެ ވާހަކައެއް ނޫނެވެ. ހިތު ހުރިގޮތަކަށް މި ބިންމަތީގައި އުޅުމަށް އޮތް މިނިވަންކަމެއް ނޫނެވެ. ނަމަވެސް ދިވެހިން މި ބުނާ މިނިވަންކަމުގެ މާނަ، ބަޔަކު މިއަދު އޮޅުވާލައިފިއެވެ. ކުށް ކުރުމާ މުޑުދާރު އެތައް އަމަލެއް ކުރުމަކީ މި މިނިވަންގައުމުގައި އޮންނަން ވާނޭ މިނިވަން ކަމެއް ކަމަށް ބަޔަކު ދައްކަން އެބަ މަސައްކަތް ކުރެއެވެ.

ވިސްނާލާށެވެ! މިނިވަންކަމާއި އެކު ވިހުރި ހުންނަ ދިވެހި ދިދައިގެ އެއްކޮޅު ހުންނަނީ ހިފެހެއްޓިފައެވެ. މާނައަކީ މިނިވަންކަމުގައިވެސް މިނެއް އަދި އިމެއް ވާކަމެވެ. އެ އިމުގެ ފުރަތަމަ އިންފާރަކަށް މި ގައުމުގައި ވާން ޖެހޭނީ އިސްލާމްދީނެވެ. ނަމަވެސް މިއަދު ދީނީ މިނިވަންކަމަކީ މި ރާއްޖޭގައި އޮންނަން ޖެހޭ މިނިވަން ކަމެއް ކަމަށް އަޑުގަދަކުރާ ފަރަންޖީންނާއި ދިވެހިންވެސް އުޅެއެވެ. ފާޅުގައި އިސްލާމް ދީނަށާއި ރަސޫލާއަށް ފުރައްސާރަ ކުރުމަކީ ދިވެހިންނަށް ދިވެހި ބިމުގައިވެސް ލިބެން ޖެހޭ މިނިވަން ކަމެކޭ ބަޔަކު އެބަ ބުނެއެވެ. އަދި އެމަގުން ކަން ކުރާ މީހުންވެސް އުޅެއެވެ. ހަމަ އެފަދައިން ކައިވެނިން ބޭރުން ހިންގާ ޖިންސީ ގުޅުންތަކަކީވެސް މި ރާއްޖޭގައި ހިންގެން ޖެހޭ ގުޅުންތަކެއް ކަމަށާއި އެކަމުގެ މިނިވަންކަން އޮންނަން ވާނޭ ކަމަށް ގަބޫލުކުރާ މީހުން ދިވެހިންގެ ތެރޭގައި އުޅެއެވެ. އަދި އެއްޖިންސުން ގުޅުން ހިންގުމަކީވެސް ލިބެންވާނޭ މިނިވަން ކަމެއްކަމަށް ދެކޭ ބަޔަކުވެސް އުޅެއެވެ.

އާދޭހެވެ! މިއީ ހަގީގަތުގައި ދިވެހި ގައުމު ވެފައިވާ އަޅުވެތި ކަމެކެވެ. މިފަދަ މުޑުދާރު އަމަލުތަކާއި މިފަދަ ފާހިޝް ކަންކަމާއި ލާދީނީ ކަންކަމަށް މި އިސްލާމީ ފަސްގަނޑުގައި ފިޔަވަޅު އެޅުން މި ވަނީ ބުރަ އަކަށެވެ. މިއީ ހަގީގަތުގައި ދިވެހި ކާބަފައިން ހޯދައިދިން މިނިވަންކަން އޮތް ގޮތް ތޯއެވެ؟ މިނިވަންކަމުގެ އެއްބަސްވުމުގައި ސޮއެ ކުރެއްވި، ރައީސް އިބްރާހިމް ނާސިރް މި ދުނިޔޭގައި މިއަދު ހުންނެވި ނަމަ، އަދުގެ މި ހާލާއި މެދު އެ މަނިކުފާނު ކަރުނަ އަޅާ ރޯނޭކަން ޔަގީނެވެ. މިއީ އެމަނިކުފާނާ އެ މަނިކުފާނުގެ ބައިވެރިން އެ ކުރެއްވި ސިޔާސީ ބޮޑު މަސައްކަތަށް އަދު އަހަރެމެން ކުރާ މަލާމާތެކެވެ.

އެނގޭހެއްޔެވެ! ދިވެހިންނަށް މިނިވަން އިޤްތިޞާދެއް ލިބިފައި އޮތްނަަމަވެސް އިގްތިޞާދީ މިނިވަން ކަމެއް ނެތެވެ. ދިވެހިންނަކީ ބަޔަކު ދިނީމައި ކައިގެން އުޅޭ ބައެކެވެ. ބަޔަކު ބޯހިޔާވަހިކަމެއް އަޅައިދިނީތީ ބޯހިޔާވެ ތިބޭ ބައެކެވެ. ހުރިހާ ކަމެއްގައި އެހެން ގައުމުތަކަށް ބަރޯސާވެ، އެހެން ގައުމުތަކުގެ ރައްޔިތުންނަށް ބަރޯސާވެގެން ތިބޭ ބައެކެވެ. ހަގީގަތަކީ އެއީއެވެ. މިނިވަން އިޤްތިޞާދެއް އޮތް ނަމަވެސް އެ އިޤްތިޞާދުގައި ދިވެހިންގެ ބާރު ނެތްކަން ދިވެހިންނަށް ވަރަށްވެސް ސާފެވެ.

އަމިއްލަ ގައުމުގައި ކިޔަވައިގެން ތިބި މޮޅެތި މީހުން ތިބި އިރުގައި، އަމިއްލަ ގައުމުގައި އެކި ނަންނަމުން ސުކޫލުތަކާ ކޮލެޖު ޔުނިވާސިޓީތައް އަަޅައިގެން އަހަރެމެން ދިވެހިން މި އުޅޭއިރު، އަމިއްލަ މަންހަޖަކަށް ކިޔަވައިދެނީ މަދު ދިވެހި މާއްދާތަކެކެވެ. ދެން މުޅިންވެސް ފަރަންޖީން އެމީހުން ބޭނުން އަކުރުތަކަކާއި ސިފަތަކެއް ޖައްސާ ފަރުމާކޮށްފައިވާ މަންހަޖުތަކެވެ. އެ މަންހަޖުތައް އެމީހުން ފަރުމާކޮށްފައިވާ ގޮތަކަށް ދިވެހިންގެ ބޮލުތެރެއަށް ވައްދާ ކޮށްޕަމުން ދަނީ އެ މަންހަޖުތަކުގެ އަޅުވެތިކަމުގައި ދިވެހިން ޖައްސަމުންނެވެ.

ކަން އޮތީ މިހެންކަމުން މިނިވަން ދުވަހު، އިއާދަވާ މި މިނިވަން ތާރީހުގައި ކޮންމެވެސް ވަރަކަށް އަޅުވެތިކަމުގެ ސިފަ އެބަޖެހެއެވެ. މިއީ ވިސްނާލުން މުހިންމު ކަމެކެވެ. ހަގީގަތުގައި ދިވެހިން މިނިވަންވެ މި ތިބެނީ ވަކި ގައުމެއްގެ ގޮތުގައި ވަކި ދައުލަތެއް އޮތުމަށް ޖާގަދޭ މިނިވަންކަމުގެ ތެރޭގައެވެ. އެނޫން ދެން އެހެން އެއްވެސް މިނިވަން ކަމެއް މިގައުމަކު ހަގީގަތަކު ނެތެވެ. ނަމެއްގައި މިނިވަންކަމެވެ. ކަމުގެ ތާސީރުގައި އޮތީ ފަހެ ކޮން މިނިވަން ކަމެއް ތޯއެވެ؟

ނަމުން މި ކިޔާ މިނިވަންކަމިގެ މާނަ ބަޔަކު އޮޅުވާލަން ވަރަށް މަސައްކަތް އެބަ ކުރެއެވެ. ބޮޑެތިވަމުން އަންނަ ކުދިންގެ ސިކުނޑިތަކަށް މި ނުބައި ޝައިޠާނީ ވަސްވާސް ވަދެގެން ދާކަމީ މާދަމާ މިގައުމުގެ ހާލަތު އޮންނާނޭ ގޮތް ސާފުވެދާ ކަމެކެވެ. ނިކަން ދެކިބަލާށެވެ. މަސްތުވާ ތަކެއްޗާއި ވައްކަމާއި ހިޔާނާތާއި، ޒިނޭއާއި ލިވާތު ކުރުމާއި، އެއްގިންސުން ގުޅުން ހިންގުމާއި، އިސްލާމް ދީނަށާއި ރަސޫލާއަށް ފުރައްސާރަ ކުރުމާއި މަލާމާތް ކުރުމާއި، ދީނަށް ހަޖޫޖަހާ ލާދީނީ ޝިއާރުތައް ކުރިއަށް ނެރުމާއި، ހަރުކަށިކަމުގެ ފިކުރަކީ ހަމަ ކޮންމެ ދިވެއްސަކަށްވެސް އޮތް އާދައިގެ ހައްގުތަކެއްކަން އެކި ދިމަ ދިމާލުން ބުނެދެމުން އެބަދެއެވެ. މާދަމާ ދެން މި ރާއްޖެ އޮންނާނީ ކޮން ގޮތަކަށް ތޯއެވެ. މިރާއްޖޭގައި ދެން އޮންނާނީ ކޮން މިނިވަން ކަމެއް ތޯއެވެ؟ ރައްކާވެ ތިބިއްޔާ ދަތުރެވެ!