ކަންނެތްކަމަކީ ޝަޚުޞިއްޔަތުގެ ސިފައެއްތޯ ނުވަތަ ތިބާގެ ހަޔާތުގައި ތިބާ އިހްތިޔާރު ކުރި ސުލޫކުތަކާއި އާދަތަކުގެ "ބަންޑެއްޔެއް" ހެއްޔެވެ؟ ހަގީގަތަކީ ކަންނެތްކަމަކީ އަދިވެސް ފުރިހަމައަށް ދިރާސާ ކުރެވިފައިވާ ކަމެެއް ނޫންކަމެވެ. އެހެނަސް ގަބޫލުކުރަން ޖެހޭ ކަމަކީ ކަންނެތް ކަމަކީވެސް ފިލާގޮސް އަދި އައިސް އިއާދަވެދާނޭ ކަމެއް ކަމެވެ.

ކަންނެތްކަމުގައި އެކި މީހުންނަށް ތަފާތު މާނަތަކެއް ނެގިދާނެއެވެ. ތިމާއަށް ކަންނެތްކަން އިހުސާސް ކުރެވޭ ސަބަބު ހޯދުމުގެ ފުރަތަމަ ފިޔަވަޅަކީ ތިމާއަށް ކަންނެތްކަމުގެ މާނައަކީ ކޮބައިކަން ދެނެގަތުމެވެ. ބައެއް މީހުންނަށް ކަންކަނެތްކަމަކީ ކަންކަމަށް ހުންނަ ޝައުގުވެރިކަން ނެތުން ކަމުގައި ވާއިރު އަނެއް ބަޔަކަށް އެއީ ވަރުބަލިވުމާއި، ދަށުދަރަޖައިގެ އިހުސާސެއް ނުވަތަ ގުޅުން ކެނޑިފައިވާ ކަމުގެ އިހުސާސެއް ކުރުވާ ކަމަކަށް ވެއެވެ. އަދިވެސް ކަންނެތްކަން މާނަ ކުރުމުގައި ތަފާތު މީހުން ތަފާތު ހިޔާލުތައް ގެންގުޅެދާނެއެވެ.

މީހަކަށް ކަންނެތްކަން ފެންނަ ގޮތާއި އިހުސާސް ކުރެވޭ ގޮތް ދެނެގަތުން މުހިންމުވާ ސަބަބަކީ ބައެއް ފަހަރު ކަންނެތްކަމުގެ ގޮތުގައި އަޅުގަނޑުމެން އަޅާނުލާ ދޫކޮށްލާ ސުލޫކަކީ ސިއްހީ ފަރުވާ ބޭނުންވާ، އަސްލު ހާލަތެއްގެ އަލާމާތަކަށް ވެދާނެތީ އެވެ. އެހެންކަމުން ކަންނެތް ކުރުވާ ސަބަބާއި ކަންނެތްކަން މާނަ ކުރާ ގޮތާއި މިއީ ވިސްނާލަން ޖެހޭ ކަންކަމެވެ.

އެހެންކަމުން ތިބާއަކީ ހަމައެކަނި ޠަބީޢަތުގައި ކަންނެތް މީހެއް ހެއްޔެވެ؟ ނުވަތަ ތިބާގެ ކަންނެތްކަމަކީ މުޅިން އެހެން ކަމެއްގެ ސަބަބުން ދިމާވާ ކަމެއް ކަމަށް ވެދާނެ ހެއްޔެވެ؟

ކަންނެތްކަން އިހުސާސު ކުރުވާ ބައެއް ކަންތައްތަކުގެ ތެރޭގައި ހިމެނެނީ ތިމާގެ މިޒާޖާއި ތިމާގެ ދިރިއުޅުމުގެ ވައްޓަފާޅިއެވެ. ނަފްސާނީ ބަލިކަށި ކަމާއި ޖިސްމާނީ ބަލިކަށި ކަމަކީވެސް އިންސާނާ ކަންނެތް ކުރުވާނޭ ސަބަބުތަކެވެ. މިތަނުން ނަފްސާނީ ބަލިކަށި ކަމާއި މިޒާޖާ ދިރިއުޅުމުގެ އާދަ އަކީ ގިނަ ދުވަހުން ތިމާއަށް އޭގެ އަސަރު ފޯރާ ކަންކަމެވެ. އެހެންކަމުން މިފަދައިން އިންސާނާ ކަންނެތް ކުރުވާ ސަބަބުތަކަކީ ހަގީގަތުގައި އިއާދަކުރަން އުނދަގޫ ކަންނެތްކަމެކެވެ.

ކަންނެތްވުމުގެ ނަފްސާނީ ސަބަބުތަކުގެ ތެރޭގައި ހިމެނެނީ ކަންބޮޑުވުމާއި ފިކުރުބޮޑުވުމާއި ބައިޕޯލާ ޑިސްއޯޑަރ ނަމަކަށް ކިޔާ ނަފްސާނީ ބައްޔެކެވެ. ތިބާއަށް ދިމާވާ ކަންކަމަކީ އަސްލު ކަންނެތްކަމެއް ނޫން ނަމަވެސް ނަފްސާނީ ސިއްހަތުގެ ހާލަތެއްގެ އަލާމާތަކަށް ވެދާނެއެވެ. އެގޮތުން ގިނަ ކަންކަމަށް ޝައުގުވެރިކަން ގެއްލި، މޫޑު ރަނގަޅުކުރާނެ ގޮތްތައް ހޯދުމަށް އުނދަގޫވާނަމަ ޑޮކްޓަރަކާ ވާހަކަ ދައްކާށެވެ.

ދިރިއުޅުމުގެ ވައްޓަފާޅީގައި ކަންނެތްކަން މެދުވެރިކުރުވާ ސަބަބުތަކެއް ވެއެވެ. މިސާލަކަށް މާ މަދުން ކެއުމާއި މާ ގިނައިން ސިނގިރޭޓު ބުއިމާއި ހަމަ ނިދި ނުލިބުމަކީ ވަރުބަލިކަމާއި ޝައުގުވެރިކަން ނެތިގޮސްފައިވާ ކަމުގެ އިހުސާސް ކުރެވޭނެ ކަންކަމެވެ.

ތިމާގެ ދިރިއުޅުމުގެ ވައްޓަފާޅިއަށް ކުދިކުދި ބަދަލުތަކެއް ގެނެސް ތިމާއަށް އިހުސާސް ކުރެވޭ ގޮތް ރަނގަޅު ކުރަން މަސައްކަތް ކުރާށެވެ. ނިދި މަދުވުމަކީ ކަންނެތް ވެދާނެ ކަމެއްކަމަށް ހީވާނަމަ ނިދުމުގެ ތަރުތީބެއް ގެންގުޅެން ވިސްނާށެވެ. ނިދާއިރު އެންމެ ރަނގަޅު ތަރުތީބެއް އުފައްދާ އެއަށް އަމަލު ކުރާނަމަ ކަންނެތްކަން ފިލާދިއުމަކީ ދުރުގައިވާ ކަމެއް ނޫނެވެ. އަދި ސިނގިރޭޓު ބޯވަރު މާ ގިނަކަމަށް ގަބޫލުކުރެވޭނަމަ މަދުކުރަން މަސައްކަތް ކުރާށެވެ. ނުވަތަ ހުއްޓާލާށެވެ.

ސްޓްރެސްގެ ސަބަބުން ނިދި ދަށްވުމަކީ ވެސް ވަރުބަލިކަމާއި ޝައުގުވެރިކަން ނެތްކަން އިހުސާސް ކުރެވޭނެ ކަމެކެވެ. "މެންޓަލް ހެލްތު ފައުންޑޭޝަނުން" ކުރި ދިރާސާއަކުން ދައްކާ ގޮތުގައި އިނގިރޭސިވިލާތުގެ އާބާދީގެ ތިންބައިކުޅަ އެއްބައި މީހުންނަކީ ސްޓްރެސްގެ ސަބަބުން ނިދި މަދު ބައެކެވެ. ސްޓްރެސް ލެވެލް މަތިނަމަ ޑޮކްޓަރަކާ ވާހަކަ ދައްކާށެވެ. މިކަމުގައި ލަސްކޮށްފިނަމަ ގެއްލުމެއް ލިބުމަކީ ވުން ގާތް ކަމެކެވެ.

މިޒާޖާ ދިރިއުޅުމުގެ އާދައާއި ގުޅުމެއް ނެތި ކަންނެތްކަން ހީވާނަމަ އެއީ ސިއްހީ ހާލަތެއްގެ ސަބަބުން ވަރުބަލިވުމުގެ ސަބަބުން ދިމާވާ ކަމެއް ކަމަށް ވެދާނެއެވެ. ވަރުބަލިކަން މެދުވެރިވެދާނެ ސިއްހީ ހާލަތްތަކުގެ ތެރޭގައި ހިމެނެނީ ލޭ މަދުވުމާއި ހައިޕޮތައިރޮއިޑިޒަމާއި ދިގުދެމިގެންދާ ވަރުބަލިކަމަކާއި ހަކުރުބައްޔާއި ސްލީޕް އެޕްނިއާ އަދި ފައިބްރޯމައިއަލްޖިއާ އެވެ. ތައިރޮއިޑް ޑިސްއޯޑަރސް ނުވަތަ ވިޓަމިން މަދުވުމުން ވަރުބަލިކަން އިހުސާސްވެ ހަކަތަ މަދުވެދާނެއެވެ. ތިބާގެ ކަންނެތްކަމަކީ ސިއްހީ ހާލަތެއްގެ ސަބަބުން ދިމާވެދާނެ ކަމެއް ކަމަށް ނުވަތަ ކަންބޮޑުވާ އެހެން އަލާމާތްތަކެއް ހުރެދާނެކަމަށް، ކަންބޮޑުވާނަމަ ޑޮކްޓަރަށް ދައްކާށެވެ.

ގިނަ ހާލަތްތަކުގައި މީހެއްގެ ކަންނެތްކަމުގެ ފަހަތުގައި ސަބަބެއް އޮވެއެވެ. އެކަން ތިމާގެ މައްޗަށް ގަދަވެގަންނަހެން ހީވާނަމަ ފަހަތަށް ފިޔަވަޅެއް އަޅާ ހާލަތު ވަޒަން ކުރާށެވެ. ހަކަތަ މަދުވަނީ ސަބަބަކާ ހުރެ ހެއްޔެވެ؟ ފަހަކަށް އައިސް ދިރިއުޅުން ތިބާއަށް ޖައްސާ ހާލާމެދު ތިބާއަށް ފޫހިކަމެއް އިހުސާސް ކުރުވާ ހެއްޔެވެ؟ ކޮންމެވެސް ކަމަކާ ހުރެ ތިމާއަށް އުނދަގުލެއް ވެއްޖެ ހެއްޔެވެ؟ ނުވަތަ ހަމައެކަނި ތިމާ ކުރާ ނުވަތަ ކުރި ކަމެއްގެ ސަބަބުން ތިބާގެ ނަފުސު މާޔޫސްކަމެއްގައި ވަނީ ހެއްޔެވެ؟ މިސުވާލުތަކަށް ޖަވާބުތައް ހޯދާށެވެ. ސަބަބު އެނގުމުން އެކަމާ ގުޅޭގޮތުން ކަމެއް ކުރުމަށް ފިޔަވަޅުތަކެއް އެޅިދާނެ އެވެ. 

ކަންނެތް ކަމަކީ ތިބާ އިހްތިޔާރު ކުރި ދިރިއުޅުމެކޭ އިހަށް ނުބުނާށެވެ! އެކަމުގެ ހަގީގަތް ހޯދާށެވެ. އެހެނީ އިންސާނާ އަކީ ޠަބީއަތުގައި ކަންނެތް މީހެއް ނޫނެވެ. ގިނަފަހަރަށް ކަންނެތްކަމާ ގުޅިފައި ވަނީ ކޮންމެވެސް ސަބަބެކެވެ. އެ ސަބަބު ނުހޯދާ ނުވަތަ ހޯދަން ނޫޅެ އަހަރެމެންނަށް އެ ކަންނެތްކަމުގައި ދުވަސްތައް ހޭދަކުރެވެއެވެ. އަދި އެ މީހަކީ ކަންނެތް މީހެއް ކަމުގައި ލޭބަލް ކުރެވިގެން ދެއެވެ. އެހެނަސް ހަގީގަތަކީ ކޮންމެ ކަންނެތް ކަމެއްގެ ފަހަތުގައިވެސް ގިނަފަހަރަށް ބޮޑު ސަބަބެއް ވާނޭ ކަމެވެ.