މިދުވަސްކޮޅު، ދުނިޔޭގެ ގިނަ ބައެއްގެ ސަމާލުކަން ހުއްޓިފައިވަނީ ދުނިޔޭގެ އެއްމެ ބޮޑު އެެއް ކުޅިވަރު މުބާރާތްކަމުގައިވާ "ފީފާ ވާރލްޑް ކަޕް" 2022 އަށެވެ. ފުޓުބޯޅައިގައި ދުނިޔޭގެ އެންމެ މޮޅެތި ގައުމުތަކުން މި މުބާރާތުގައި ބައިވެރިވެ ކުޅެމުން ދެއެވެ. ކޮންމެ ހަތަރު އަހަރަކުން އެއްއަހަރު ބާއްވަމުން އަންނަ މި މުބާރާތަކީ މުޅި ދުނިޔެ އެއްކޮށްމެ ތައްޔާރުވަމުންދާ މުބާރާތެކެވެ. މި މުބާރާތުގައި ވާދަ ނުކުރެވުނެއްކަމަކު، އެ ގައުމުތަކުގައި ވެސް މި މުބާރާތަށް ދަނީ ގިނަ ތައްޔާރީތަކެއް ވަމުންނެވެ. އެއްތަނަކަށް އެއްވެ އެންމެން އެއްކޮށް މުބާރާތުގެ މެޗުތައް ބެލޭނޭ އިންތިޒާމުތައް އޮތީ މުޅި ދުނިޔޭގެ އެކި ކަންކޮޅުތަކުގައި ގާއިމު ކޮށްފައެވެ.

ފީފާ ވާރލްޑް ކަޕްގެ ކޮންމެ މުބާރާތެއްގައިވެސް ނަންވިދާ ހާއްސަ މޮޅު ކުޅުންތެރިންނާ ހާއްސަ މޮޅު ގައުމުތަކެއް ވެއެވެ. ދުނިޔޭގެ އެންމެންވެސް ގަބޫލުކުރާ އެއް ހަމަ އަކީ މިފަދަ ކޮންމެ މޮޅު ކުޅުންތެރިއަކީ މި މުބާރާތުގައި ތަފާތު މޮޅު ކުޅުމެއް ދައްކާނޭ ކުޅުންތެރިއެއް ކަމެވެ. އަދި މިފަދަ ކޮންމެ ގައުމަކީވެސް ތަފާތު މޮޅު ހުނަރުތަކަކާއި އެކު ތަފާތު މޮޅު ކުޅުމެއް ދައްކާ ތަފާތު މޮޅު ނަތީޖާއެއް ހޯދާނޭ ގައުމުތެކެއް ކަމެވެ. އެހެން ކަމުން ދުނިޔޭގެ ފުޓުބޯޅާގައި ނަން މަޝްހޫރު އެއްވެސް ޓީމެއް މިއިން މުބާރާތުން އެއްމެ ކުރީބައިގާ ބާކީވެގެން ދާކަށް އެއްވެސް މީހަކު ނޭދޭނެއެވެ. 

މިކަންކަން ރަނގަޅަށް ސާފުވާން އޮތް އެއް ކަމަކީ އެކި މީހުން ކުރެން، ސަޕޯޓު ކުރަނީ ކޮން ގައުމަކަށް އެހުމުން ދެވޭ ޖަވާބުތަކުންނެވެ. މުބާރާތުގައި ވާދަނުކުރާ ގައުމުތަކުގެ ރައްޔިތުން އެކި ގައުމުތަކަށް މި މުބާރާތުގައި ސަޕޯޓު ކުރާއިރު މުޅިންވެސް ފެންނަނީ ދުނިޔޭގެ ފުޓުބޯޅާގައި ނަންވިދާ ގައުމުތަކަށް ސަޕޯޓު ކުރާ މަންޒަރެވެ. އޭގެ ތެރޭގައި އާޖެންޓީނާ އާއި ބްރެޒިލް އާއި ސްޕެއިން އާއި ފްރާންސް އަދި ޖަރުމަނު ހިމެނެއެވެ. އަދިވެސް އެފަދަ ނަން މަޝްހޫރު ގައުމުތަކުގެ ނަން ފާހަގަކޮށް ބުނެ އުޅެއެވެ.

އާންމު އުސޫލަކީ މިދަންނަވާ ފުޓުބޯޅާގައި ނަން މަޝްހޫރު ގައުމުތަކުން މެޗުތައް ކާމިޔާބު ކުރުމެވެ. އެފަދަ ދެ ގައުމެއް ކުޅެން ޖެހުމަކީ ގިނަ ބަޔަކު އެ މެޗުތައް ބަލަން ޝައުގުވެރިވާ ކަމެކެވެ. ނަމަވެސް އެފަދަ މޮޅު ގައުމަކާ އާދައިގެ ގައުމަކާ ބައްދަލުކުރާ މެޗުތައް ބަލަން ޝައުގުވެރިވާ މީހުން މަދެވެ. 

ކަންވަނީ އިސްވެ ދެންނެވި އާންމު އުސޫލުންނަމަވެސް މިފަހަރުގެ ފީފާ ވާރލްޑް ކަޕް ގައި ތަފާތު ކަމެއް ފާހަގަވެއެވެ. އަދި މިކަމުގެ މައްޗަށް މުޅި ދުނިޔޭގެ އެކި ކަންކޮޅުތަކުގައި ވާހަކަ ދެކެވެއެވެ. މިއުސޫލުން ފާހަގަ ކުރެވުނު އެއްމެ ތަފާތު އަދި އެއްމެ އަޖައިބު ކުރުވަނިވި އެއް ކަމަކަށް ވެގެން ދިޔައީ ދުނިޔޭގެ ފުޓުބޯޅާގައި ގަދަ އެއް ބާރު ކަމުގައިވާ އާޖެންޓީނާ އާއި ސައުދީއަރަބިއްޔާ އާއި ބައްދަލު ކުރި މެޗުގައި ސައުދީ ކުރިހޯދުމެވެ. އާޖެންޓީނާ ވެގެން ގޮސްފައިވަނީ ދުނިޔޭގެ އެއްމެ މޮޅު ކުޅުންތެރިޔާގެ މަގާމު އެކިފަހަރުމަތިން ހޯދާފައިވާ މެސީ އެގައުމަކަށް ކުޅޭ، އަދި އެހެން މަޝްހޫރު ގިނަ ކުޅުންތެރިންނާ އެކު ކުޅޭ މޮޅު ގައުމަކަަށެވެ. އަދި މިއަހަރުގެ މުބާރާތުގައި އެއްމެ ސަޕޯޓަރުން ގިނަ އެއް ގައުމުކަމުގައިވެސް އާޖެންޓިނާ ވަނީ ވެފައެވެ. އާޖެންޓީނާގެ މައްޗަަށް 2 - 1 ގެ ނަތީޖާ އަކުން ސައުދީ ކުރި ހޯދާފައިވަނީ ފަހަތުން އަރާ މޮޅު ހޯދައިގެންނެވެ. މި ނަތީޖާ އާއި އެކު މުޅި ދުނިޔެ ހައިރާން ވެފައިވާ ވާއިރު ރޭ ކުޅެވުނު މެޗަކުންވެސް މިފަދަ އާދަޔާހިލާފު ނަތީޖާއެއް ވަނީ ފެނިފައެވެ.

ފީފާ ވާރލްޑް ކަޕް ހަތަރު ފަހަރު ހޯދާފައިވާ، ފުޓުބޯޅާގެ ގަދަ ބާރެއްކަމަށްވާ ޖަރުމަނު ވަނީ ރޭގެ މެޗުގައި ޖަޕާނު އަތުން ބަލިވެފައެވެ. މި ނަތީޖާވެސް ވަނީ މުޅި ދުނިޔެ ހައިރާން ކޮށްފައެވެ. މިފަދަ ކަންކަމާއި އެކު ބައެއް ފަރާތްތަކުން ގަބޫލުކުރާ ގޮތުގައި މިފަހަރުގެ މި މުބާރާތް ވަރަށްވެސް ތަފާތެވެ. ވަރަށަވެސް އާދަޔާ ހިލާފެވެ.

މިކަންކަމުގެ ސަބަބުތަކާ ބެހޭގޮތުންވެސް އެކިގޮތްގޮތަށް އެކި މީހުން ވާހަކަ ދައްކައެވެ. ނަމަވެސް ފާހަގަ ކޮށް ހާއްސަކޮށް އަޅައިގަންނަ އެއް ސަބަބެއްކަމަށް ގިނަ މީހުން ފާހަގަ ކުރާ ސަބަބަކީ އިސްލާމީ ގައުމެއްގައި މި މުބާރާތް ބޭއްވުމެވެ. އަދި އިސްލާމީ ޝިޔާރުތައް އިސްކުރެވޭ މުބާރާތަކަށް މި މުބާރާތް ވާތީއެވެ. އެހެނީ މުބާރާތް ހޮޅުވުމުގެ ރަސްމިއްޔާތުގައި ކީރިތި ޤުރުއާނުގެ އާޔަތެއްވެސް ވަނީ ކިޔަވާފައެވެ. އަދި ހަމަ އެއާއި ފުޓުބޯޅަ ދަނޑުތަކުގައި ވުލޫކޮށް ނަމާދު ކުރެވޭނޭ އިންތިޒާމުތައްވެސް ވަނީ ގާއިމު ކޮށްފައެވެ. ކުޅިބަލާ ސަރަހައްދުގައި ބަނގުރަލުގެ ހުރިހާ މުއާމަލާތަކާއި އިސްތިއުމާލު ކުރުން އޮތީ މަނާކޮށްފައެވެ. އަދި ހުޅަނގުގެ ބައެއް ގައުމުތަކުން ފަތުރަމުން އަންނަ ނަޖިސް އެއް ޝިއާރު ކަމުގައިވާ އެއްޖިންސުން ގުޅުން ހިނގުމުގެ ޝިއާރު ފާޅު ކުރުމާ އެކަމަށް ތާއިދު ކުރެވޭ ދިދަ އާއި ބެނާފަދަ ތަކެތި ބޭނުން ކުރުން ވެސް އޮތީ ހަރުކަށި އިބާރާތުން މަނާކޮށްފައެވެ. ގަތަރުގައި ބޭއްވޭ މި މުބާރަތަކީ، ފީފާ ވާރލްޑް ކަޕެއް އިސްލާމީ ގައުމެއްގައި ބޭއްވޭ ފުރަތަމަ ފަހަރެވެ.

މިކަންކަމުގެ އިތުރުން ގަތަރުގެ އެކި ހިސާބުތަކުގައި ދީނީ ޝިއާރުތަކާއި ޤުރުއާނުގެ އާޔަތްތަކާއި، ރަސޫލާގެ ހަދީޘް ބަސްފުޅުތައް ވަނީ ބޮޑުކޮށް ފެންނާނޭހެން ލިޔެ އާންމުކޮށްފައެވެ. އަދި އެ ބިމުގެ އެކި ހިސާބުތަކުގައި އިސްލާމް ދީނުގެ ދަރުސްތަކާ ފަތުވާތައް ދަނީ ދެމުންނެވެ. ކޮންމެ ނަމާދު ވަގުތެއްގައި ހަރު އަޑުން ބަންގީގެ އަޑު ދަނީ ގުގުމަމުންނެވެ. މި މުބާރާތް ތަފާތުވެ އާދަޔާ ހިލާފު ވުމުގެއް މައިގަނޑު ސަބަބަކީ މިއީ ކަމުގައި ގިނަ ބަޔަކު ބުނެއެވެ.

މުބާރާތުގެ ކުޅުން އަދި އޮތީ ކުރިއަށެވެ. މިމަގުން މި މުބާރާތުގެ ނަތީޖާތަކުގައި އިތުރު އަޖައިބު ކުރަނިވި ނަތީޖާތައް ފެނިގެންދާނޭކަމަށްވެސް ގިނަ ބަޔަކު އަންނަނީ ބުނަމުންނެވެ. އެހެނަސް ކަން ވާނޭ ގޮތެއް، ވަމުންދާ ގޮތުގެ ސީދާ ސަބެބެއް އަހަރެމެންނަށް ބުނާކަށް ނޭނގޭނެއެވެ. ހުރިހާކަމެއް މޮޅަށް ދެނެވޮޑިގެންވަނީ މާތް ﷲ އެވެ.