ކުޅިވަރަކީ ލޭގެ އޮލަކަން އިތުރުކޮށްދޭ ކަމެކޭ ބުނެއެވެ. ލޭގެ ހޫނުކަންވެސް އިތުރުވެދާ ކަމެކޭ ބުނެއެވެ. އާދޭހެވެ! އެއީ ހަމަ ހަގީގަތުގައިވެސް ތެދެކެވެ. މިހާރު މުޅި ދުނިޔެ އެ ކުޅިވަރަކަށް ސަމާލުކަން ދެމުން މި އަންނަ ފުޓުބޯޅަ އަކީ ވެސް މިފަދަ ކުޅިވަރެކެވެ. ޤަތަރުގައި ކުޅެވޭ ފީފާ ވާރލްޑް ކަޕް ގައި ވެސް މިކަން ކަން ވަރަށް ސާފުކޮށް އެބަ ފެނެއެވެ. އާދޭހެވެ! ދައްކަން މިއުޅެނީ އުމުރުން އެއްމެ 24 އަހަރުގެ ފުޓުބޯޅަ ކުޅުންތެރިއެއްގެ ވާހަކައެވެ. މަޣްރިބުގެ (މޮރޮކޯގެ) އަޝްރަފް ޙަކީމީ ގެ ވާހަކައެވެ. 

ފީފާ ވާރލްޑް ކަޕް 2022 ގައި މޮރޮކޯއިން ދައްކަމުން މި އަންނަނީ ތަފާތު ކުޅުމެކެވެ. ފުޓުބޯޅައިގައި ދުނިޔޭގެ ބޮޑެތި ބާރުތައް އެ އަންނަނީ ބަލި ކުރަމުންނެވެ. މި ތަފާތު މޮޅު ކުޅުމާއި އެކު މޮރޮކޯ ޓީމުގެ ފަހަތް ބަލަހައްޓަމުން އަންނަ އަޝްރަފް ޙަކީމީ މި ދައްކަނީ ކޮންފަދަ ނަމޫނާއެއް ހެއްޔެވެ؟ އަދުގެ ގިނަ ޒުވާނުންނަށް މިއީ އިބުރަތްތެރި ނަމޫނާއެކެވެ. ކުޅިވަރުގެ ތެރެއަށް މީހާ ގޮސް ހުސްވެފައި ވާ އިރުގައިވެސް، މައިމީހާގެ ހަނދާން އަޝްރަފް ޙަކީމީގެ ހިތަކުން އެއްމެ ސާއަތަކަށްވެސް ނުފިލައެވެ.

2-0 ގެ ނަތީޖާއަކުން ފުޓުބޯޅާގެ ގަދަ ބާރެއް ކަމަށްވާ ބެލްޖިއަމްގެ މައްޗަށް މޮރޮކޯ ކުރި ހޯދި މެޗަށްފަހުގައިވެސް އެ ޒުވާނާ ދުވެފައި ދިޔައީ އޭނާގެ މަންމަގެ ގާތަށެވެ. ސަޕޯޓަރުންގެ ތެރޭގައި ހުރި އެ މަންމަ، ޙަކީމީ އާއި ބައްދަލުވެލަން ހުރީ ކައިރިއަށް ޖެހިގެންނެވެ. ދުވެފައި ގޮސް ޙަކީމީ އޭނާގެ މަންމަގެ ގައިގާ ބައްދާލައެވެ. އަދި އެ މަންމަގެ ނިއްކުރީގައްޔާއި މޫނުގައި ބޮސް ދެއެވެ. މި މަންޒަރު ވެގެން ގޮސްފައި ވަނީ މުޅި ދުނިޔޭގައި ދައުރުވި މަންޒަރަކަށެވެ. ދުނިޔޭގެ ބޮޑެތި މީޑިއާތަކުގައި ދައުރުވި މަންޒަރަކަށެވެ. ދެން އޮތީ ރޭގެ މެޗުގައި ޕެނަލްޓީ ޖަހައިގެން ފުޓުބޯޅާގެ ގަދަ ބާރެއް ކަމަށްވާ ސްޕެއިން ބަލިކުރުމަށްފަހު އަޝްރަފް ޙަކީމީ ކަންތައް ކުރި ގޮތުގެ ވާހަކައެވެ. ހަމަ ކުރި އެކޭ އެއްގޮތަށް ރޭގެ މެޗުގައިވެސް އޭނާގެ ފަރާތުން ފެނުނީ މައިމީހާއަށް އޮތް ލޯތްބާއި އިހްތިރާމެވެ. ރޭގެ މެޗުގައިވެސް ޙަކީމީ ވަނީ، މެޗު ނިމުމަށްފަހު އޭނާގެ މަންމަ އާއި ބައްދަލުކޮށްފައެވެ. އެ މަންމަގެ ނިއްކުރި އަށާއި މޫނަަށް ބޮސް ދީފައެވެ. މިއީ ކޮންފަދަ ނަމޫނާއެއް ހެއްޔެވެ؟ މިއީ އަސަރުން ފުރިގެންވާ ކޮންފަދަ މަންޒަރެއް ހެއްޔެވެ؟

އާދޭހެވެ! އަދުގެ ޒުވާނުން ނިކަން ވިސްނާލަ ބަލާށެވެ! މުޅި ދުނިޔެ އެ މަންޒަރުތަކެއް ބަލާނޭކަން އެނގޭ ހާލުގައިވެސް ލަދުވެތިކަމެއް ޙަކީމީގެ ކިބައަކު ނެތެވެ. މިއަދު އަހަރެމެންގެ ހާލަކީ ކޮބާ ހެއްޔެވެ؟ މަންމަ އާއި އެކު ފިހާރަ އަކަށް ދާންވެސް އަދުގެ ޒުވާނުން ލަދު ގަނެއެވެ. އާންމުންގެ ތެރޭގައި މަންމަ އާއި އެކު އުޅެން ލަދުގަނެއެވެ. ކަމެއް ކުރަން އުޅޭނަމަ އެކަމެއްގައި މަންމަ ބައިވެރި ކުރާކަށް ބޭނުމެއް ނުވެއެވެ. ތަނެއްގައި އެއްޗެކޭ ބުނެ ވާހަކަ އެއް ދައްކާނަމަ މަންމަ އަށް ޝުކުރު އަދާކުރަންވެސް ލަދު ގަނެއެވެ. މިއީ ހަގީގަތެވެ. ހިތި ނަމަވެސް ހަގީގަތެވެ.

އޭ ޒުވާނުންނޭވެ! ތިބާގެ މަންމަ އަކީ ކާކު ހެއްޔެވެ؟ އެ މަންމަގެ މަޤާމު ތިބާއަށް އެނގޭ ހެއްޔެވެ؟ އެ މަންމަގެ ހައްޤުތައް ތިބާއަށް އެނގޭ ހެއްޔެވެ؟ ވިސްނާލާށެވެ. އަޝްރަފް ޙަކީމީ ގެ މި އަމަލު ހަގީގަތުގައި މުޅި ދުނިޔެ ސިއްސުވާލައިފިއެވެ. ނަމަވެސް ސިހުމެއްލިބުނީ ވިސްނާ ފިކުރު ކުރި ބަޔަކަށް އެކަންޏެވެ. ކުޅިވަރުގެ ތެރޭގައި އުޅޭ އަދުގެ ޒުވާނުން ވިސްނާލާށެވެ. ދެކިބަލާށެވެ! ޙަކީމީމެން ފަދަ ކުޅުން ތެރިން އެ ދައްކަނީ ކުޅިވަރުގައި އުތުރި އަރަނީ މުޅި ލޭގެ އިހުސާސްތައް ކަމެވެ. މައިވަންތަ ލޯބި ކަމެވެ. އާއިލީ ރޫހު ކަމެވެ. ހުއްބުލް ވަޠަން ކަމެވެ. މިއީ އިބުރަތުން ފުރިގެންވާ ނަމޫނާ މިސާލުތަކެވެ. މިކަމުގައިވެސް ވިސްނާ ބަޔަކަށް ނޫނީ އިބުރަތެއް ލިބުމެއް ނެތެވެ.