ދިވެހި ރާއްޖޭގައި ހަށިވިއްކުމޭ މިކިޔާ ވިޔަފާރި ފުޅާވެ އެތައް ބަޔަކު އެކަމުގެ ތެރޭގައި ގެނބި ގޮސްފައިވާ ވާހަކައަކީ އިއްޔެއަކު މިއަދަކު ދައްކާ ވާހަކައެއް ނޫނެވެ. ނަމަވެސް މި ފަހަކުން މި ވަނީ ހަށިވިއްކުމުގެ ހާލަތު ރާއްޖޭގައި އޮތްމިންވަރު ބަޔާންކުރާ ތަފާސް ހިސާބުތަކެއް އާންމު ކޮށްފައެވެ. ހަމަ އެއާއި އެކު ހަށިވިއްކުމުގެ މި މުޑުދާރު އަމަލު ރާއްޖޭގައި، ހާއްސަކޮށް މާލޭ ސަރަހައްދުގައި އާންމުވެފައިވާ މިންވަރު ސާފުކޮށް ހާމަވާން އޮތެވެ. ގިނަ އޮންލައިން ނޫސް މަޖައްލާތަކުގައިވެސް އެވާހަކަތައް އާންމުވެފައި އޮތެވެ.

އާދޭހެވެ! ހަށިވިއްކުމުގައި ހިނގަނީ، އޭގެ މުޑުދާރުކަން ބޮޑު، އޭގެ ބިރުވެރިކަމާއި ނުބައިކަން އިންތިހާއަށް ގޮސްފައިވާ ފާހިޝް އަމަލެކެވެ. އެއީ ޒިނޭގެ ބޮޑު ފާފައެވެ. ޒިނޭގެ ބޮޑު ފާފަ ކުރަމުން އަދި އެ ފާފަ ކުރުމަށް ބޮޑު ހަރަދުވެސް ކުރަމުންނެވެ. ދުނިޔޭގެ ވަގުތީ އަރާމަކާއި ލައްޒަތަށްޓަކައި އެ ހޭދަކޮށްލަނީ ފައިސާގެ ނޫޓުތަކެވެ. އާހިރުގައި މިކަމުގެ ވޭނާ އަޒާބު ހިތަށްވެސް ނާރާ ކަހަލައެވެ. ފައިސާ ދީގެން ކުރެވޭ މި ޒިނޭގެ މުޑުދާރު އަމަލުތަކުގެ ވާހަކަ ދެކެވޭއިރު، ފައިސާ ނުދީ ރުހުމުގައި ކުރެވޭ ޒިނޭގެ ވާހަކަ އަކީވެސް ރަށުތެރޭގައި ގިނައިން ދައްކާ އުޅޭ ވާހަކައެކެވެ. އާދޭހެވެ! އެއްވެސް މީހެއްގެ ބޮލުގައި ޒިނޭގެ ތުހުމަތެއް އަޅުވަނީއެއް ނޫނެވެ. އަދި ނުވެސް އަޅުވާނަމެވެ. ނަމަވެސް ރަށުތެރޭގައި މިވާހަކަތައް ދައްކާ އަޑު ގަދައަށް އިވިފާ، މީސްމީޑިޔާގައިވެސް މިފަދަ ވާހަކަތައް ފެތުރިފައި ހުންނާތީ މި ވާހަކަ މިގޮތަށް ދެއްކީއެވެ.

ގަބޫލުކުރައްވާށެވެ! އެފަދަ މުޑުދާރު އަޑުތަކެއް އަރާނީ ހަމަ ގައިމުވެސް ކޮންމެވެސް ކަހަލަ ކަމެއް ހިނގީމަތާއެވެ. މިއަދު އެވެނި މިވެނި މީހަކު ނުވަތަ އެވެނި މިވެނި ރަށެއްގައި ނަހަލާލަށް ބަލިވެ އިނދެ ވިހޭ މީހެއްގެ ވާހަކަ އަކީ ހަމަ އާއްމުކޮށް ދައްކާ ވާހަކައެކޭ ބުނެވިދާނެއެވެ. ހޮސްޕިޓަލުތަކުގައި އުޅޭ އެކި މީސްމީހުންގެ ފަރާތުންވެސް ނަހަލާލަށް ބަލިވެ އިނދެ ވިހާ މީހުން ނިސްބަތުން ގިނަކަން ހާމަވެއެވެ. ހަމައެއާއި އެކު ނަހަލާލަށް ބަލިވެ އިނދެ، ދަރި ވައްޓާލާ މީހުންނީވެސް މަދު ބައެއް ނޫން ކަމަށް ވާހަކަ ދައްކާތީ އަޑު އިވެއެވެ. ރައްޓެހިވެގެންނޭ ކިޔައިގެން އުޅޭ ޒުވާންފުރައިގެ ކުދިން، ފާހިޝް އަމަލުތަކުގެ ތެރެއަށް ދާކަމުގެ ވާހަކަ އަކީވެސް އިވޭ އަޑުތަކެވެ. މި ހުރިހާ ކަމެއް މިހެން ހުރުމާއި އެކު މިއީ މުޖުތަމައެއްގެ ހައިސިއްޔަތުން ކަންބޮޑުވާން ޖެހޭނެ ކަމެކެވެ.

ނޫސްމަޖައްލާ ތަކުގައި މި ވާހަކަތައް މިހެން ދެއްކުމަކީ އަދި މާ ރީތި ކަމަކަަށް ފަހަރުގައި ނުވެދާނެއެވެ. ނަމަވެސް މިއީ މުޖުތަމައުގައި ވަރަށް އާންމު ކަމެކޭ ބުނެވިދާނެއެވެ. އެހެންކަމުން މިކަމަށް ގިނަބައެއްގެ ސަމާލުކަން ހޯދާ، މި މުޑުދާރު އަމަލުތަކުން މުޖުތަމައު ސަލާމަތް ކުރުމަށް، މުޅި މުޖުތަމައު އެއްކޮށް އެކައްޗެއް ކިޔަން އެބަ ޖެހެއެވެ. ޒިނޭ ފަދަ ފާހިޝް، މުޑުދާރު އަމަލުތައް އާންމު ވުމީ މާތް ﷲ ގެ ކޯފާއެއް އައިސްދާނޭފަދަ ކަމެއްކަން ހަމަ ކޮންމެ މީހަކުވެސް ހަނދާންކުރަން އެބަ ޖެހެއެވެ.

މުޖުތަމައުގެ ހާލަތްތަކާއި ގުޅުވައިގެން އަބަދުވެސް ފިލްމު ތަކާއި ޑްރާމާތައް އުފައްދާފައި ހުރެއެވެ. އެގޮތުން މި ފަހުން ރާއްޖޭގައި އުފައްދާ ގިނަ ފިލްމުތަކާއި ޑްރާމާތަކުގައި ޒިނޭގެ އަމަލުތައް ހިނގާކަން ދޭހަކޮށްދީފަައި ހުރެއެވެ. މިކަމުން ހާމަވެގެން ދަނީ މުޖުތަމައުގައި މިކަން އާންމުވެ ފެތުރިފައިވާ މިންވަރެވެ. އަދި މިކަން 'ނޯމަލައިޒް' ވެފައިވާ ވަރެވެ. މުހްޞަނުންނާއި ޣައިރުމުހްޞަނުން ޒިނޭކުރާކަން ދޭހަކޮށްދޭ މަންޒަރުތައްވެސް ދިވެހި ފިލްމުތަކާއި ޑްރާމާތަކުގައި ހުރެެއެވެ. އެއަށް ސާފުކޮށް ޒިނޭއޭ އެ ފިލްމުތަކުގައި ނުކިޔާތީ އެ ބަލާ މީހުންނަށްވެސް އެއީ އާންމު އާދައިގެ ކަމެކޭ ހީވާ ކަހަލައެވެ. ނެޓްފްލިކްސް ފަދަ ތަންތަނުން ބަލާ ފަރަންޖީ ފިލްމުތަކާއި ޑްރާމާތަކުގައިވެސް މި މުޑުދާރު އަމަލު އޮންނަނީ އާދައިގެ ކަމެއްގެ ގޮތުގައި ދައްކުވާފައެވެ. މިފަދަ މަންޒަރުތައް ދިވެހިން މިއަދު ބަލާ، އެކަންކަމަކީ ކުށެއް ކަމުގައި ނުދެކެވޭ ހާލަތަށް ގައުމު މި ވަނީ ގޮސްފައެވެ.

އާދޭހެވެ! ބޮޑެތިވަމުން އަންނަ ޒުވާނުން މި ނުބައި ފާހިޝް އަމަލުގެ ތެރެއަށް ވަނުމުގެ ކުރިން އެކަން ހުއްޓުވާށެވެ! އެއީ ބެލެނިވެރިންނާއި މައިންބަފައިންނާއި މުދައްރިސުންގެ ބޮޑު ޒިންމާއެކެވެ. އާދައިގެ ކަމެއް ކަމުގައި ދެކިގެން ބޮޑެތިވެފައި ތިބޭ ތަސައްރަފު ފުދިފައި ތިބޭ މީހުންވެސް މިފަދަ ފާހިޝް އަމަލުތަކުގެ ތެރެއަށް ވަނުމުގެ ކުރިން ތަންދޮރު ދަންނަން އެބަ ޖެހެއެވެ. ދުނިޔެމަތީގައި މާ އާދައިގެ ކަމެއް ކަމުގައި ދެކުނު ނަމަވެސް މިއީ އާހިރުގައި އޭގެ އުގޫބާތް ބޮޑު، ވޭން ބޮޑު ކަމެކެވެ. އެކަން މުސްލިމެއްގެ ހައިސިއްޔަތުން އަހަރެމެން ކޮންމެ މީހަކުމެ ދަންނަން ވާނެއެވެ. މާތް ﷲ ގެ ކޯފާއެއް އައުމުގެ ކުރިން މިފަދަ ފާހިޝް އަމަލުތަކުން މުޖުތަމައު ސަލާމަތް ކުރަމާ ހިނގާށެވެ!