ރާއްޖޭގެ އެވެނި މިވެނި ހޮސްޕިޓަލެއްގައި އެވެނި މިވެނި ފަރުވާއެއް ދޭން ފެށިކަމުގެ ހަބަރަކީ މިއަދު ނިކަން ގިނައިން އިވޭ އަޑެކެވެ. ސިއްހީ ދާއިރާގައި ގިނަ ކުރިއެރުންތައް މި ރާއްޖެ ހޯދަމުން ދާ ކަމީވެސް މިއަދު އަަޅުގަނޑުމެންނަަށް ފެންނަ ހަގީގަތެކެވެ. މިއީ އުފާކުރުން ހައްގު ކަމެކެވެ. އެހެންނަމަވެސް މިއީ ހިތާމަވެސް ހުރި ކަމެކެވެ. އެހެނީ މިކަމުގައި ވަކި ބަޔަކު ވިޔަފާރި ކުރާތީއެވެ. ނިކަމެތި ރައްޔިތުންގެ ސިއްހަތުން ބޮޑު ވިޔަފާރި ކުރާތީއެވެ.

ހިދުމަތްތަކުގެ ފެންވަރު ރަނގަޅު ވުމީ އެ ހިދުމަތްތަކުގެ އަގުވެސް އުފުލިދާ ކަމެކެވެ. އެކަމާ ދެކޮޅު ހަދާކަށް ނެތީމެވެ. އަދި ރާއްޖޭގެ ބޮޑެތި ހޮސްޕިޓަލު ތަކުން ދެވޭ ހިދުމަތްތަކުގެ އަގުތަކާއި އެއްވަރަށް، ދެވޭ ސިއްހީ ފަރުވާގެ ފެންވަރުވެސް ރަނގަޅެވެ. ވަސީލަތްތައް މަދު ކަމާއި އިންސާނީ ވަސީލަތްވެސް އެހާ މަދު މި ގައުމުގައި ދެމުންދާ ސިއްހީ ހިދުމަތްތަކަކީ ސަރަހައްދީ ފެންވަރުގައިވެސް ބަަލައިގަންނަ ސިއްހީ ފަރުވާތަކަކަށް މިއަދު މި ވަނީ ވެފައެވެ. ބޮޑެތި ނުރައްކާތެރި އޮޕަރޭޝަންވެސް މި ރާއްޖޭގައި މިއަދު އެބަ ކުރެވެއެވެ. ތަފާތު އެކި ބަލިތަކަށް ފަރުވާވެސް ކުރެވެއެވެ. ކުރާ ފަރުވާގެ ފެންވަރުވެސް އެހާމެ ރަނގަޅެވެ.

އާދޭހެވެ! ފަރުވާގެ ފެންވަރު ރަނގަޅު ވުމާއި ފަރުވާގެ އަގު ބޮޑުވުމަކުން އަދި ނުފުދެއެވެ. އެ ފަރުވާއަށް އެދޭ ފަރާތްތަކަށް މާ ބޮޑު ދަތިކަމެއް ނެތި އެ ފަރުވާއެއް ލިބިދޭން އެބަ ޖެހެއެވެ. މި ދައްކަނީ އިންސާނީ ވަސީލަތުގެ ވާހަކައެވެ. ރާއްޖޭގެ ބޮޑެތި ހޮސްޕިޓަލުތަކުގައި ބޮޑު އަގު ނަގައިގެން ޑަކްޓަރަށް ދެއްކޭއިރު، އެކަމުގައި ބަލި މީހާ އުފުލަން ޖެހޭ ތަކުލީފު ލުއިވާން އެބަ ޖެހެއެވެ.

އެންމެ އަގުބޮޑު އެކައްޗަކީ ވަގުތޭ އަބަދުވެސް އަހަރެމެން ބުނަމުއެެވެ. ނަމަވެސް އެ މަންޒަރު ގިނަ ފަހަރަށް ނުފެނެއެވެ. އެކަމަށް ތަބާވާ ބަޔަކުވެސް ނުފެނެއެވެ. ޑަކްޓަރަށް ދައްކަން ނަންބަރު ނަގަން ޖެހެނީ ކިއުގައި ޖެހޭށެވެ. އަނެއްބައި ފަހަރަށް ޖެހެނީ ގުޅައިގެން ބައިގަޑިއެއްހާއިރު މަޑު ކުރާށެވެ. އެތަންތަނުގެ ކޯލް ސެންޓަރުތަކެއް އަޅުގަނޑުމެން ނުދެކެމެވެ. ނަމަވެސް އެތަންތަނުގެ ކައުންޓަރުތައް ފެނެއެވެ. ހިދުމަތް ދޭނެ ފަސް ހަ ކައުންޓަރު ގާއިމް ކޮށްފައި ހުރެއެވެ. ނަމަވެސް ހިތާމައަކީ އަގުބޮޑު އެ ހިދުމަތްތަކުގައި ބަލި މީހާގެ އެ އަގުބޮޑު ވަގުތުތައް ބޭކާރުވުމެވެ. އެހެނީ އިސްވެ ދެންނެވިހެން ކައުންޓަރުންތައް ގިނަ ނަމަވެސް ހިދުމަތް ދެވެނީ އެންމެ ކައުންޓަރަކުންނެވެ. ދެން ހުރި ހުރިހާ ކައުންޓަރެއް ބަންދެވެ. އެހާ ގިނަ ބަލި މީހުން ނަންބަރު ނަގާފައި ހުންނަ އިރުވެސް، ހިދުމަތްދެނީ އެންމެ ކައުންޓަރަކުންނެވެ. ހިތަށް އަރައެވެ! ދެން އެހެރަ ކައުންޓަރު ތަކުގެ ބޭނުމަކީ ކޮބާ ހެއްޔެެވެ؟

އާދޭހެވެ! ވިސްނާލުމުން މި ވާ ގޮތް އެބަ އެނގެއެވެ! މިވާ ގޮތަކީ، މިކިޔާ ސިއްހީ ހިދުމަތުން ބަޔަކު ވިޔަފާރި ކުރުމެވެ. މަދު މުވައްޒަފުންކޮޅެއް ލައިގެން ހިދުމަތްތަކުގެ އަގު ބޮޑު ކުރަނީއެވެ. އޭރުން މުވައްޒަފުންގެ މުސާރައިގެ ގޮތުގައި ޖުމުލަ ހޭދަކުރާ އަދަދު މަދުވާނެއެވެ. ނަމަވެސް ހިދުމަތުގެ އަގު ބޮޑުވުމުން، ތަނަށް ލިބޭ ފައިދާ ބޮޑުވާނެއެވެ. މިއީ އިންސާނީ ވަސީލަތް ނަހަމަ ގޮތުގައި ބޭނުން ކުރުން ފަދަ ކަމެކެވެ.

ޑަކްޓަރުންވެސް ހަގީގަތަށް މަދެވެ. ނަރުހުންވެސް މަދެވެ. ލެބޯޓަރީގައި ތިބޭ މީހުންވެސް މަދެވެ. އަދިވެސް އެހެނިހެން ސިއްހީ އެހީތެރިން މަދެވެ. އެ މީހުން ވަޒީފާތަކުގައި "ގަނަތެޅެނީއެވެ". ވިޔަފާރިވެރިން ނަގަނީ އެކަމުގައި ބޮޑު ފައިދާއެވެ. މިކަމުގައި ރާއްޖޭގެ ކްލިނިކު ތަކާއި ހޮސްޕިޓާ ތަކާއި އަދި ރިސޯޓުތައްވެސް ހިމެނެއެވެ. މިއީ ހަގީގަތެވެ. މުވައްޒަފުން މަދުކޮށް މަސައްކަތް ކުރުވަނީ ހަރަދު ކުޑަ ކުރުވާށެވެ. ހަގީގީ މަގުސަދަކީ ބޮޑު ފައިދާ ހޯދުމެވެ.

ބައެއް ރިސޯޓުތަކުގައި ޑަކްޓަރުންނެއް ނުގެންގުޅެއެވެ. އެތަންތަނުގައި ގެންގުޅެނީ އެންމެ ނަރުހެކެވެ. އޭރަށް ކިހާ ހަރަދު ކުޑަވާނެ ތޯއެވެ؟ ލިބޭ ފައިދާ އެހާ ބޮޑުވާނެ ނޫންތޯއެވެ؟ މިކަމުގައި ސިއްހީ އެހީތެރިންގެ ހާލު ދެކޭނޭ ބަޔަކު ނެތެވެ. ބަލި މީހުންގެ އިހުސާސްތަކުގެ އަޑު އިއްވާނޭ ބަޔަކު ނެތެވެ. އެހެނީ މަތީފަޑީގެ މީހެެއްނަމަ، ތަނަކު މަޑުނުވެ ގޮސް ފަސޭހަ ކަމާއި އެކު ޑަކްޓަރަށް ދެއްކެއެވެ. ގަދަމީހާ ގަދަވާނެއެވެ. ދެރަމީހާ ދެރަވާނެއެވެ. ސިއްހީ ހިދުމަތަކީ ތަފާތުކުރުން ނެތް ހިދުމަތެއް ނަމަވެސް ތަފާތުކުރުން ފެނެއެވެ. މިއީ ބަޔަކު ނުދައްކާ ވާހަކައެކެވެ. އެހެނަސް ގިނަ ބަޔަކު ދަންނަ ވާހަކައެކެވެ.

އިންސާނުންގެ ސިއްހަތުން ވިޔަފާރި ކުރާއިރު، ބިރުވެތިކަމެއް ނުހުރެއެވެ. ތަންދޮރު ނުދަންނަ ވަރުގެ ދޮށީއުމުރުގެ މީހުންނަށް އޮޅުވާވެސް ލަނީއެވެ. ކޮންމެހެން ބޭނުން ނުވާ ޓެސްޓްތަކާ އެއްޗެހި ހަދަން ދެނީއެވެ. މިއީ މުޅި ދުނިޔޭގައިވެސް ކަން ހިނގާ ގޮތެވެ. އިންސާނާގެ ނިކަމެތި ސިއްހަތުން ވިޔަފާރި ކުރުމެވެ. އެ ވިޔަފާރީގައި ތަނަވަސްކަމާއި މުއްސަނދިކަން ބަޔަކު މީހުން ހޯދައެވެ.