ދިވެހިރާއްޖޭގެ ރައްތައް އުފެދިފައި ހުރިގޮތުން މިއީ ބިންތިރި ރަށްތަކެކެވެ. ރަށްފުށުގެ ރަށްތަކުގެ ބިން ތިރިކަމާއި ރަށްތައް އުފެދިފައިވާ ގޮތުން އެކިއެކި އުނދަގޫތަކާއި ކުރިމަތިލާން ޖެހެއެވެ. ހަތައެއްގެ ބައްޓަމަށް ފެތުރިފައިވާ ކުދި ބިންތަކެއްގައި އަހަރެމެން އުޅޭއިރު، އެ ބިންތަކުގައި ނުވަތަ އެ ރަށްތަކުގައި ފެން ހެދޭ މައްސަލަ އަކީ ވަކި ކުޑަ މައްސަލައެއް ނޫނެވެ. މި މައްސަލައަށް ތަފާތު އެކި ހައްލުތައް އަންނަނީ މަޑުމަޑުން ހޯދެމުންނެވެ. ނަމަވެސް މި ރިޕޯޓުގައި މި ބަލާލަނީ މިފަދަ ތަފާތު ނަޒަރިއްޔާ އަކަށެވެ.

ރަށުގައި ފެން ހެދޭ މައްސަލައަށް ހައްލެއް ހޯދުމަށް "ޑްރައިނޭޖް" ސިސްޓަމެއް ގާއިމު ކުރުމަކީ ކުރެވޭ ކަމެކެވެ. އަދި މަގުގައި ތާރު އަޅާ ކާނު ހަދާ އޭގެ ތެރެއިން ފެން ހިނދޭ ގޮތެއްވެސް ހަދައެވެ. މި ނިޒާމު ތަކުގައި ރަށްތައް ތަރައްގީ ކުރަމުން އަންނަ އިރު މިއީ ބޮޑު ހަރަދެއް ހިނގާ ބޮޑެތި މަޝްރޫއުތަކެވެ. އަދި މަގުތަކުގައި ތާރު އެޅުމަކީ ދިވެހިވަންތަ ނުވަތަ ޖަޒީރާ ވަންތަ ވިސްނުމެއް އަދި ފަލްސަފާއެއްވެސް ނޫނެވެ. އެހެންކަމުން މިކަމުގައިވެސް ޖަޒީރާ ވަންތަ، ދިވެހި ވަންތަ އަދި ދެމެހެއްޓެނިވި ހައްލެއް ބޭނުން ވެއެވެ. "ޑްރައިނޭޖް" ސިސްޓަމާއި މަގު ހެދުމަކީ އޭގެ "މާރާމާތުގެ" ތަކުލީފު ބޮޑު މަސައްކަތްތަކެކެވެ.

ވިއްސާރަ މޫސުމުގައި ވެހޭ ވާރޭގެ ސަބަބުން ރަށުގައި ހެދޭ ފެންގަނޑު ރަށުގެ ވަކި ހިސާބަކަށް ޖަމާކޮށް ރަށަށް ހިންދުމާއި ނުވަތަ ރަށުން ބޭރުވާނޭ ގޮތް ހެދުމަކީ މިކަމުގައި އޮތް ވަރަށް ފަސޭހަ ހައްލެކެވެ. މިއީ ބައެއް ރަށްރަށުގައި މިއަދު އަމަލީގޮތުން ތަޖުރިބާ ކުރަމުން އަންނަ ކާމިޔާބު މަޝްރޫއެކެވެ.

މިކަމުގައި ކަން ކުރާ ގޮތަކީ މިއަދުވެސް ގިނަ ރަށްރަށުގައި ކަން ކުރާ ގޮތެވެ. އެއީ މަގަށް ފަސް އެޅުމެވެ. ތަފާތަކީ މަގަށް ފަސް އަޅާ ގޮތެވެ. ފެން ހެދޭ ތަނަށް ނުވަތަ ފެން ހެދޭ ކަންމައްޗަށް ގޮސް ވެލި ޕިކަޕެއް އަޅާލުމަކީ އަދި ހައްލެއް ނޫނެވެ. އޭރަށް މިވާ ގޮތަކީ އެތަނުގައި އޮންނަ ފެންގަނޑު އަނެއްކާ ކޮންމެވެސް އެހެން ދިމާލަކަށް ޖަމާވެ އެހެން ސަރަހައްދެއްގައި ފެން ބޮޑުވުމެވެ. 

މަގަށް ފަސް އަޅާ އިރު، ރަށުގެ އަޑި ދިމާލަށް އަޑިވާނޭ އުސޫލަކުން، ކައްޗެއް ލުމަށްފަހު މަގަށް ފަސް އެޅިދާނެއެވެ. އަދި އެ ކަތި މުޅި ރަށުގައިމެ ދެމެހެއްޓިދާނެއެވެ. ބިންގަނޑު ހަރުކޮށް މިގޮތަށް ކަތިކޮށް ފަސް އެޅުމުން ބިންގަޑުގައި ކައްޗެއް ވާނެއެވެ. ފެން ފަހިވާނެ ގޮތަކަށެވެ. މިގޮތަށް ރަށުގެ އަޑި ސަރަހައްދަށް ފެން ޖަމާވާ ގޮތަށް ހެދުމަށްފަހު، އެ ހިސާބުން އަނެއްކާ ކައްޗެއް ލުމަށްފަހު ރަށުން ބޭރަށް އެ ފެން ހިނގާނޭ ގޮތަށް ފަސްގަނޑު ފެންފަހި ކުރެވިދާނެއެވެ. ނުވަތަ ފެންގަނޑު ހިންދަން ބޭނުންވާ ސަރަހައްދަކަށް އެ ކަތި ލެވިދާނެއެވެ.

ރަށުގައި އަޑިކޮށް އޮންނަ ސަރަހައްދަށް ނުބަލާ މުޅި ރަށުގައި އެއް ހަމަ އަކުން ފެންފަހިކޮށްގެން ފަސް އަޅައިގެން ވެސް މިކަން ކުރެވިދާނެއެވެ. މި ގޮތަށް އަޅާ ފަސްތައް ނުވަތަ ވެލިތަށް، އާލާތްތައް ބޭނުން ކޮށްގެން ހަރުކޮށް ގަންނުވާ ގޮތަށް ހެދޭނެއެވެ. މިއަށް "ކޮމްޕެކްޓް" ކުރުމޭ ކީދާނެއެވެ. އަދި "ރަހަ" ބަލާ އާލާތްތަކުން މި ކަތި ދަމަހައްޓާ، "ސްލޯޕް މެއިންޓެއިން" ކުރެވިދާނެއެވެ. 

ބިން ކުދި ރަށްތަކުގައި ފެން ހެދޭ މައްސަލަ ހައްލުކުރުމަށް މިއީ ފަސޭހަ އަދި ހަރަދު ކުޑަ މަޝްރޫއެކެވެ. އަދި މިއީ ދެމެހެއްޓެނިވި ގޮތެއްގައި ކުރެވިދާނެ ކަމެކެވެ. ޒަމާނީ ވަސީލަތްތަކާއި އެކު މިއީ ވަރަށްވެސް ފަސޭހަ ކަމެކެވެ. ކޮންމެ ރަށަކަށް ވަކި ހާއްސަ ދިރާސާއެއް ކުރުމަށްފަހު، ތައްޔާރު ކުރެވޭ ވަކި ހާއްސަ ކުރެހުމަކާއި ފަރުމާ އަކާއި އެކު މިއީ ނުކުރެވޭނެ ކަމެއް ނޫނެވެ.

މަގުތަކުގައި ފެން ހެދޭ މައްސަލަ އަކީ ރަށްފުށުގައި ބޮޑު މައްސަލައެކެވެ. އޭގެ ސަބަބުން ބޮޑެތި އެތައް ގެއްލުން ތަކެއް ލިބޭ ކަމެކެވެ. އަދި ރަށުގެ ރީތިކަން ގެއްލި ޗަކަވަމުންދާ ކަމެކެވެ. މަދިރިފަދަ ސޫފިތައް ގިނަ ވުމާއި ތަފާތު ބަލިތައް ޖެހުން އިތުރުވާ ކަމެކެވެ. އިންސާނުންގެ ނަފްސަށާއި މުދަލަށްވެސް ގެއްލުން ލިބިދާ ކަމެކެވެ. އެހެންކަމުން މިއީ ހަމަ ކޮންމެ ރަށެއްގައިވެސް އަވަސް ހައްލެއް ބޭނުން ވެފައިވާ މައްސަލައެކެވެ. ވީއިރު އިސްވެ މި ފާހަގަ ކުރެވުނު ތަފާތު ފަލްސަފާ މިކަމުގައި ތަންފީޒު ކުރުން ވާނީ ލުއި އަދި ދެމެހެއްޓެނިވި ހައްލަކަށެވެ.