އިސްލާމީ މުޖުތަމައެއްގައި ނުވަތަ އިސްލާމީ ގައުމެއްގައި ކަންކަން ހިނގަންވާނީ އިސްލާމީ އުސޫލުތަކާއި ހަމަތަކުގެ މަތިންނެވެ. އެހެންކަމުން މިފަދަ ގައުމުތަކުގައި އެ ގައުމުތަކުގެ ސިޔާސަތުތައް ކަނޑައެޅުމުގައި ދީނީ ކަންކަމަށް އަހައްމިއްޔަތުކަން ދޭން ޖެހެއެވެ. ދީނާ ސިޔާސަތު ވަކިނުކުރެވޭނެ ސަބަބަކީ މިއީއެވެ. ޢަލްމާނީ ފިކުރުތަކުގެ މަތީގައި އިސްލާމީ ގައުމުތަކުގެ ސިޔާސަތުތައް ފައްކާވަމުންދާ ކަމީ އެގައުމުތަކުގެ އިސްލާމީ އެއްބައިވަންތަކަމާއި އެއް އުއްމަތެއް ވަންތަކަން ނެތިވެދާ ސަބަބުތަކެވެ.

އާދޭހެވެ! ކަންއޮތީ މިހެން ކަމުގައި ވުމުން، ދީނާއި ސިޔާސަތުތައް އެއްވެސް އިސްލާމީ ގައުމެއްގައި ވަކި ކުރެވިގެން ނުވާނެއެވެ. އެ ގައުމެއްގެ ވެރިން އެ ގައުމެއްގެ ސިޔާސަތުތައް ކަނޑައަޅާއިރު، އިސްލާމް ދީނުގެ ހަމަތަކާއި އުސޫލުތަކަށް ވަރަށް ބޮޑަށް ބަލަން ވާނެއެވެ. އެ އުސޫލުތަކަށް ފަރުވާލެއް ނުބަހައްޓާ، ހަމަ އެކަނި ގައުމާ ގައުމުގެ އިގްތިސާދުގެ މަސްލަހަތު އިސްކުރާނަމަ އެ ދެވެނީ ދީނާ ސިޔާސަތު ވަކިކުރެވިފައިވާ ޢަލްމާނީ ފިކުރަކާއި ދިމާލަށެވެ. އިސްލާމީ ގައުމެއްގެ ހަމަ ކޮންމެ ސިޔާސަތެއް ބައްޓަންކުރަންވާނީ އިސްލާމީ ގިޔުގަނޑުން ބޭރު ނުވާނޭ ގޮތަކަށެވެ. އިސްލާމްދީނުގެ ހަމަތަކާއި އަސްލުތަކާއި ފުށު ނާރާނޭ ގޮތަކަށެވެ.

ޒަމާން ބަދަލުވެ، ދުނިޔޭގެ ގިނަ ގައުމުތަކުގައި ޑިމޮކްރަސީގެ އުސޫލުތަކުން ކަންކަން ތަރުތީބުވަމުން ހިނގާ، އަދި މުޅި ދުނިޔެ ބަވަނަވެފައިވާ މިފަދަ ދުވަސްވަރެއްގައި ދީނާއި ސިޔާސަތު ވަކި ނުކޮށް ހިފެހެއްޓުމީ އިސްލާމީ ވެރިކަންތަކުގައި ވަރަށްވެސް އުނދަގޫ ކަމަކަށް އޮންނަނީ ވެފައެވެ. އެހެންކަމުން އިސްލާމީ ވެރިކަންތަކުގައި ބަސްކިޔޭ ހިސާބުގައި ހަރުދަނާ ދީނީ ޢިލްމުވެރިން ތިބެން އެބަ ޖެހެއެވެ. ސިޔާސީ ގޮތުން ދީނީ ޢިލްމުވެރިން ބަސްކިޔަން ޖެހެއެވެ. ސިޔާސަތުތައް ބައްޓަންކޮށް ފައްކާ ކުރުމުގައި ދީނީ ޢިލްމުވެރިންގެ އިރުޝާދާއި ލަފާ ހޯދަން ޖެހޭނެއެވެ. ނޫންނަމަ، ދީނާއި ސިޔާސާތު ވަކިވެ، މުޅިން ގޯސް މިސްރާބަކަށް ދީލާލަފާނެއެވެ.

އާދޭހެވެ! ދީނީ ޢިލްމުވެރިން ސިޔާސީ ކަންކަމާ ގޮތް ކިޔާ ހެދުމަކީ މިއަދު ވަރަށްގިނަ މީހުން އެކަންކަމާ ނަފްރަތު ކުރާ ކަމެކެވެ. އަދި ފާޑުކިޔާ ކަމެކެވެ. ނަމަވެސް އަހަރެމެން މުސްލިމުންނަށް ވީ ހިނދު، ގަބޫލުކުރަން ޖެހޭނެ އެއް ކަމަކީ ސިޔާސަތުތަކާއި ދީނާ ވަކި ކުރުމަކީ ޢަލްމާނީ ފިކުރުގެ ކަމެއް ކަމެވެ. އެހެންކަމުން ސިޔާސީ ގޮތުން ސިޔާސަތުތަކަށް ދީނީ ޢިލްމުވެރިން ބަސްކިޔަން އެބަ ޖެހެއެވެ. އަދި ދީނީ ޢިލްމުވެރިންގެ މި ބަސްތައް، އިސްލާމީ ގައުމުތަކުގެ ވެރިން އަޑުވެސް އަހަން ޖެހޭނެއެވެ. ހަމަ ގައިމުވެސް ޢިލްމު ލިބި ހުރި މީހަކާއި ޢިލްމު ލިބިފައިނުވާ މީހާގެ ފަރަގު އުޑާއި ބިމާހާ ތަފާތުވާނެއެވެ.

ޑިމޮކްރަސީގެ އުސޫލުތަކުން ކަންކަން ހިނގާއިރު، ސިޔާސަތުތައް ކަނޑައެޅުމުގައި ސިޔާސީ ބާރުވެރިކަމެއް އޮންނަން އެބަ ޖެހެއެވެ. މަގުމަތީގައި އަޑުގަދަ މީހާ، މީސްމީޑިޔާގައި ހަރަކާތްތެރި މީހާ އެއީ ގައުމެއްގެ ސިޔާސަތުތައް ކަނޑައެޅުމުގައި އެއްވެސް އުރަތްޕެއް ހުރި މީހެއް ކަމަށް، ޑިމޮކްރަސީގެ ހަމަތަކުން ނުބެލެވެއެވެ. އެހެންކަމުން ޑިމޮކްރަސީ އޮންނަ އިސްލާމީ ގައުމުތަކުގެ ސިތާސަތުތައް ކަނޑައަޅާ ހިސާބުގައި، ބަސްކިޔާ ގޮތް ނިންމޭ ހިސާބުގައި، ސިޔާސީ ބާރުވެރިކަމުގައި ދީނީ ހަރުދަނާ ޢިލްމުވެރިން ތިބެން ޖެހޭނެއެވެ. ދީނާ ސިޔާސަތު ވަކިނުކުރެވި، ހަރުދަނާ އިސްލާމީ ސިޔާސަތުތަކެއް ކަނޑައެޅޭނީ އޭރުންނެވެ.

އާދޭހެވެ! ދީނާއި ސިޔާސަތު ވަކިވެ، ޢަލްމާނީ ނިޒާމަކުން އިސްލާމީ ގައުމެއް ހިނގާނަމަ ވާނީ ކިހިނެއްތޯއެވެ؟ ދީނީ މިނިވަންކަން އޮންނާނެއެވެ. ބޭނުން ދީނަކަށް އުޅެވޭނެއެވެ. ދީނީގޮތުން މަނާކަމެއް ގާނޫނު އަސާސީގައި ނޯންނާނެއެވެ. ޝައުރީ ނިޒާމުގައި ދީނީ ހުކުމެއް ނުކުރެވޭނެއެވެ. އިސްލާމީ މުޖުތަމައަކަށް މިހިރަ މިހިރަ ކަންކަން މެދުވެރިވުމުން ދެން ވާނީ ކިހިނެއްތޯއެވެ. ވިސްނާ ފިކުރު ކުރައްވާށެވެ. 

ދީނީ ޢިލްމުވެރިން، ސިޔާސަތުތައް ކަނޑައެޅުމުގައި ބައިވެރިނުވާނަމަ، ޢަލްމާނީ ސިޔާސަތުތައް އިސްލާމީ މުޖުތަމައުތަކުގައި ފެތުރިގަންނާނެތޯއެވެ؟ މިއީވެސް ވަރަށްގިނަ މީހުން ކުރާސުވާލެކެވެ. އެހެނީ ދެން ތިބޭ މީހުންނަކީވެސް ހަމަ މުސްލިމުންތާއެވެ. އީމާންތެރިކަން ހުރި މީހުންތާއެވެ. އާދޭހެވެ! މިހެން ހީވެދާނެއެވެ. ނަމަވެސް ދުނިޔެއަށް ލޯހުޅުވި، ތަންދޮރު ސާފުވާ ބަޔަކަށް، އިސްލާމީ މުޖުތަމައުތަކަށް ޢަލްމާނީ ފިކުރުގެ ނުފޫޒު ފޯރާ މިންވަރު އެނގޭނެއެވެ. ގައުމެއްގެ ސިޔާސަތުތަކުގައި ހަރުދަނާ ދީނީ ސިޔާސަތުތަކެއް ނެތްނަމަ، ހަމަ ޔަގީނުންވެސް، މިޒަމާނުގައި ޢަލްމާނީ ބާރުތަކުން އެ ގައުމެއްގެ ސިޔާސަތުތައް އަޅުވެތި ކުރާނެއެވެ. މިއީ މުސްލިމުންނާ ދެކޮޅަށް ކުރާ ވަރުގަދަ ހަނގުރާމަ އެކެވެ. ފިނި ހަނގުރާމައެކެވެ. ވިސްނުމާ ފިކުރާއި ކުޅެ، ވިސްނުން އަޅުވެތި ކުރުމުގެ ހަނގުރާމައެކެވެ. އެހެންކަމުން އިސްލާމީ ގައުމުތަކުގައި ސިޔާސަތުތައް ކަނޑައަޅާއިރު، އިސްލާމީ ޝަރީއަތުގައި ވަރުގަދައަށް ހިފަހައްޓައިގެން ތިބޭ ހަރުދަނާ ދީނީ ޢިލްމުވެރިންގެ ބަސް، ސިޔާސަތުތައް ކަނޑައަޅާއިރު ވަރުގަދައަށް ހުންނަން ވާނެއެވެ. ކިރިޔާވެސް މިފަދަ ކަންކަމުގައި ދީނީ ގޮތުން ދުލެއް ދެވިއްޖެނަމަ، ފޫނުބެއްދޭވަރުގެ ބޮޑެތި ގެއްލުންތަކާއި ކުރިމަތިވެދާނެއެވެ. ކަންމިހެން ހުރުމާއި އެކު، ދަންނަވަން ޖެހޭނީ ދީނާއި ސިޔާސަތަކީ ވަކި ނުކުރެވޭނެ ދެއެއްޗެކޭއެވެ.