ގައުމެއްގެ ހަޔާތުގައި އުސްގަނޑުތަކާއި އަޑިގަނޑުތައް އަންނާނެއެވެ. ކޮންމެ ގައުމެއްގެ ހަމަ ކޮންމެ އަފުރާދަކުވެސް އެކަން ގަބޫލު ކުރަންވާނެއެވެ. ދިވެހިރާއްޖޭގައިވެސް ކަން ވަމުންދާގޮތަކީ އެއީއެވެ. މުޅި ދުނިޔޭގައި ކަންކަން ތަރުތީބުވަމުންދާ އުސޫލަކީވެސް އެއީއެވެ. 

ދުނިޔޭގެ ހަޔާތަށް ބަލާއިރު، މި ފަހުގެ ތާރީހެއްގައި މުޅި ދުނިޔެ އިނދަ ޖައްސާލި ބިރުވެރި ކަމަކަށް ވެފައި އޮތީ ކޮވިޑް 19 ގެ އާލަމީ ވަބާއެވެ. މި ބަލީގެ އަސަރު ނުފޯރާ ގައުމެއް މި ދުނިޔޭގައި ނެތެވެ. ހަމައެކަނި، ބަލީގެ އަސަރެއް ނޫނެވެ. ބަލީގެ ސަބަބުން ކުރިމަތިވި އިގްތިސާދީ އެތައް ގޮންޖެހުންތަކެކެވެ.

ކޮވިޑް 19 ގެ އާލަމީ ވަބާއަށް ވެކްސިންތަކާއި، ދެވުނު ފަރުވާތައް ކުރިއަރާގޮސް މިއަދު އަހަރެމެންގެ ތެރޭގައި ކޮވިޑް 19 ގެ ބިރުވެރިކަމާއި އެކަމުގެ ނުތަނަވަސްކަން މުޅިންހެން ފިލާ ގޮސްފިއެވެ. އަދި އަހަރެމެންގެ ހަނދާނުގައި ކޮވިޑް 19 ގެ ބިރުވެރިކަންވެސް ހުރިހެއްނެއް ހިޔެއްނުވެއެވެ. ނަމަވެސް ދަންނަވަންތޯއެވެ! ކޮވިޑް 19 ގެ ސަބަބުން ގައުމަށް ގެނުވި ބިރުވެރިކަން އަލުން ހަނދާންކޮށްލާށެވެ! 

ކޮވިޑް 19 ގެ ވޭދަނަތައް އިތުރުވެ، އެތައް ބަޔަކު ބަލިވެ، ހާލުބޮޑުވެ، ފަރުވާދޭން ވަކި ހާއްސަ މަރުކަޒުތައް (ފެސިލިޓީތައް) ގާއިމު ކުރެވުނެވެ. އަދި އިތުރައް ބަލި ފެތުރުނަ ނުދިނުމަށް ގައުމުގެ ބޯޑަރު ބަންދުކޮށް، ރާއްޖެތެރޭގެ ދަތުރުތައް ބަންދުކޮށް މުޅި ގައުމު ލޮކްޑައުނަކަށް ދާން ޖެހުނެވެ. އެތައް ހާސް ދިވެހި މަސައްކަތްތެރިންގެ ވަޒީފާ ގެއްލުނެވެ. އެއްލައްކައަށްވުރެ ގިނަ މީހުންނަށް ބަލި ޖެހި 300 އަށްވުރެ ގިނަ މީހުން މި ބަލީގައި ރާއްޖެއިން ވަނީ ނިޔާވެފައެވެ. އެއްދުވަސްތެރޭ ފަސް، ހަ މީހުން ބަލީގައި ނިޔާވި ދުވަސްވެސް ދިޔައެވެ. ކޮންފަދަ ބިރުވެރިކަމެއްތޯއެވެ!

ރާއްޖޭގެ އިގްތިޞާދު ބަރޯސާވެފައިވާ ފަތުރުވެރިކަން މުޅިންހެން ހުއްޓުނެވެ. ފަތުރުވެރިކަމުގެ ސިނާއަތުން ދައުލަތަށް ވަންނަމުންދިޔަ އާމްދަނީ އެއްކޮށް ހުއްޓި ބަންދުވިއެވެ. ލޯލާރި ފޮއްޗެއްވެސް ދައުލަތަށް ނުވަދެ ދިޔައެވެ. މިދައްކަނީ ގައުމެއްގެ ދައުލަތުގެ ވާހަކައެވެ! ކޮންފަދަ ބޮޑު އިގްތިސާދީ ގޮންޖެހުމެއްތޯއެވެ! އެކަމުގެ ބިރުވެރިކަމުގައި ރައްޔިތުން ނަފްސާނީ ބިރުވެރިކަމަކަށްވެސް ދިޔައެވެ. އެއް ބަޔަކު ނުކުމެ، ގައުމު ބަނޑަށްޖެހިދާނެ ކަމުގެ ބިރުގައި ކާނެ އެއްޗެއް ލިބޭތޯ ތަފާތު ވައްތަރުގެ މޭވާ އަޅާ ގަސްތައް އެތަންމިތަނުގައި ދިޔައީ އިންދަމުންނެވެ. މިދައްކަނީ އޭރު ގައުމު އޮތް ހާލަތުގެ ވާހަކައެވެ.

އިގްތިޞާދީ މި ބޮޑު ގޮންޖެހުމުގައިވެސް ދައުލަތުން އިސްކުރީ ރައްޔިތުންގެ މަސްލަހަތެވެ. ރައްޔިތުންގެ ފުރާނައެވެ. އެ ރައްޔިތުންނަށް ފަރުވާ ހޯދައިދިނުމަށް ފެސިލިޓީތައް ގާއިމު ކުރިއެވެ. ނަމުގައި ފެސިލިޓީއެވެ. އެ ފެސިލިޓީތަކުން ނުލިބެނީ ކޮން "ފެސިލިޓީ" އެއް ތޯއެވެ؟ ފުރިހަމަ ހޮސްޕިޓަލެއްގެ ސިފަ އެތަންތަނުގައި ޖެއްސުވިއެވެ. އަގުބޮޑު ބޮޑެތި ސިއްހީ މެޝިނަރީތަކާއި ޓެކްނިކަލް ސާމާނު ގެނައީ ދައުލަތުގެ ބަޖެޓުންނެވެ. އެތައް ސަތޭކަ އެނދަކާއި އެ އެނދުގައި އޮންނަ ބަލި މީހާއަށް ބޭނުންވާ ހުރިހާ ހިދުމަތެއް ގާއިމުކޮށްދިނެވެ. ފެސިލިޓީ ތަކުގައި ހަތަރު އިރުގެ ކެއުން ކޮވިޑް ޖެހިފައިތިބި ބަލި މީހުންނާއި އެމީހުންގެ އެހީތެރިންނާއި އަދި އެ ފެސިލިޓީތަކުގައި ތިބޭ ނަރުހުންނާއި ޑަކްޓަރުންނާއި މަސައްކަތު މީހުންނާއި ޑްރައިވަރުންނާއި އިދާރީ މީހުންނަށް އިންތިޒާމުވެފައި އޮތީ ދައުލަތުގެ ހަރަދުގައެވެ. މާލޭ ދަރުބާރު ގޭގައި ގާއިމްކޮށްފައި އޮތް އާރް.އާރް.ޓީ ގައި މަސައްކަތް ކުރަމުން ދިޔަ ކޮންމެ ސިއްހީ އެހީތެރިއަކަށާއި އެތަނުގެ ކޯލް ސެންޓަރާއި އިދާރީ ކަންކަމުގައި އުޅުނު ހަމަ ކޮންމެ މީހަކަށްވެސް ހަތަރު އިރު ކެއުން ހަމަޖައްސައިދިނީ ދައުލަތުންނެވެ.

އަދި ނިމުނީކީއެއް ނޫނެވެ. ކޮވިޑް 19 އަށް ފަރުވާ ކޮށްދިނީ ދައުލަތުގެ ދީލަތި އެހީގައެވެ. ފެސިލިޓީ ތަކުގައި ފަރުވާ ހޯދި އެއްވެސް މީހަކަށް އެމީހެއްގެ އަތުން އެންމެ ލާރިއެއްވެސް ހަރަދު ކުރަން ނުޖެހި އެ ފަރުވާ ލިބިގެން ދިޔައީ ދައުލަތުން އެކަމަށް ހަރަދު ކުރީތީއެވެ. ދުވާލަކު ކިތައް އިންޖެކްޝަން ތޯއެވެ. ކިތައް ގުޅަ ބޭސް ތޯއެވެ! ކިތައް ސިރިންޖުގެ ލޭ ތަހުލީލު ކުރި ތޯއެވެ! 

ކޮވިޑް 19ގެ ސަބަބުން ވަޒީފާ ގެއްލިފައި ތިބި އެތަށް ހާސް ދިވެހި ރައްޔިތުންނަކަށް އިންކަމް ސަޕޯޓުގެ ނަމުގައި މަހަކު 5000 ރުފިޔާ، އެތައް މަހެއް ވަންދެން ދައުލަތުން ދިން ނޫންތޯއެވެ! ނަގާފައި ހުރި ލޯނުތަކުގެ މުއްދަތު އިތުރުކޮށް ނުދޭތޯއެވެ! ފްރޮންޓް ލައިނުގައި މަސައްކަތްކުރި އެތައް ހާސް ސިއްހީ އެހީތެރިންނާއި އެނޫންވެސް އެތައް ބަޔަކަށް ފްރޮންޓްލައިން އެލަވަންސްގެ ނަމުގައި ކިހާ ފައިސާއެއް ދިންތޯއެވެ!

އާދޭހެވެ! މިއީ ދައުލަތުގެ އާމްދަނީ އެއްކޮށްމެ ހުއްޓިފައި ހުއްޓައި ދައުލަތުން ދިވެހި ރައްޔިތުންނަށްޓަކައި ކުރި ހޭދަތަކެކެވެ! މިއަދު މިކަންކަން މަތިން ހަނދާން ހުރީ ކޮން ބައެއްތޯއެވެ! ވިސްނާ ބައްލަވާށެވެ! ގައުމުގެ އިގްތިސާދު ހުއްޓިފައި އެތައް ދުވަހަކު އޮވެމެ، އެ ދުވަސްތަކުގައި އެތައް ހަރަދެއް ކޮށް، އެވަރުންވެސް ތަރައްގީގެ އެތައް މަޝްރޫއެއް މުޅި ރާއްޖޭގައި އެބަ ހިންގައެވެ. އާނއެކެވެ! ބައެއް ކަންކަން ހިނގާލެއް ލަހެވެ! ލަސް ނުވާންވީ ކީއްވެ ހެއްޔެވެ! އިސްވެ ބުނެވުނު ސަބަބުތައް ނުފުދޭ ހެއްޔެވެ؟ މިއަދު ކޮވިޑު 19ގެ ބިރުވެރިކަމުގައި ދައުލަތުން ރައްޔިތުންނަށްޓަކައި ކޮށްދިން ކަންތައްތައް އަހަރެމެންގެ ހަނދާނުގައި ނުހުންނަނީ މިއަދު އެ ބިރުވެރިކަން ނެތީމައެވެ. މިއަދު އެ އިގްތިސާދީ ބިރުވެރިކަން ނެތީމައެވެ. ކޮވިޑުގެ ބިރުވެރިކަން ފިލާ މުޖުތަމައާއި އިގްތިސާދަށް އަމާންކަން ލިބިފައި އޮތީމައެވެ. މިވަރު ނުދަނެ ތިބެ، ކަންކަން ނުވާ ވާހަކައާއި ލަސް ވާހަކަ އާއި ދަރަނީގެ ވާހަކަ ދައްކަން ހެޔޮވާނީ ކޮން ހަމައަކުން ހެއްޔެވެ؟!

ކޮވިޑް 19 އަކީ ގައުމުގެ ހަޔާތުގައްޔާއި އަދި ދުނިޔޭގެ ހަޔާތުގައި އައި ބޮޑު އަޑިގަނޑެކެވެ. އުސްގަނޑަކަށް އަރަން ކުރާ މަސައްކަތުގައި ވެއްޓިވެސްދާނެއެވެ. އަނިޔާވެސް ވެދާނެއެވެ. ލޮލަށާއި ބޮލަށާއި މޫނަށް ވެލިވެސް އެޅިދާނެއެވެ. އަދި އެހެން މީހެއްގެ ނުވަތަ ބައެއްގެ އެހީތެރިކަންވެސް ހޯދަން ޖެހިދާނެއެވެ. އެއަކު މައްސަލައެއް ނެތެވެ. އުސްގަނޑަށް އެރުމާއި އެކު އޮތީ އުފާވެރިކަމާއި އަމާންކަމެވެ.