ގައުމީ ދުވަހުން ހާސިލް ކުރަންވީ ކޮން އިބުރަތެއް ހެއްޔެވެ؟ ގައުމީ ދުވަހެއް އަޅުގަނޑުމެންނާއި ބައްދަލުކޮށް، އެ ދުވަހުގެ ޒިކުރާތައް އައު ކުރެވިގެންދާއިރު، އަޅުގަނޑުމެން މި ދުވަހުގެ ތާރީހުން ލިބިގަންނަންވީ ކޮން އިބުރަތެއް ތޯއެވެ؟ ދޮންބަންޑާރައިންގެ މަތިވެރި ޖިހާދުގެ ޒިކުރާ އައު ކުރެވޭ މި ދުވަހުގައި މުހައްމަދު ތަކުރުފާނު ނުވަތަ ބޮޑުތަކުރުފާނުގެ މަތިވެރި ޖިހާދުން އަޅުގަނޑުމެން ހާސިލް ކުރަންވީ ކޮން އިބުރަތެއް ތޯއެވެ؟

ލޮބުވެތި ދިވެހި ރައްޔިތުންނެވެ! ޕޯޗުގީޒުން ދިވެހި ރާއްޖެ އިސްތިއުމާރުކޮށް އަޅުވެތިކޮށް ދިވެހިންގެ ކަރަށް ގަދަކަމުން ރާ އަޅަމުން ދިޔައީ އަނިޔާވެރިކަމުގައި ހައްދުފަހަނަ އަޅައިގޮސްފައިވާ ހާލުގައެވެ. އެ އަނިޔާވެރި ބާޒުގެ ވަކިތަކުގެ ދަށުގައި ދިވެހިން ލޭކޮށެވި އެތައް އަހަރެއް ހޭދަ ކުރިއެވެ. ޕޯޗްގީޒުންގެ އަނިޔާވެރިކަމުގައި ދިވެހިން 15 އަހަރަށްވުރެ ގިނަ ދުވަސް ހޭދަކުރިފަހުން އެ އަނިޔާވެރިކަން ހައްދު ފަހަނައަޅައި، ދިއުމުން ޕޯޗްގީޒުންނާ ދެކޮޅަށް ބޮޑުތަކުރުފާނު އިސްވެ ހުންނަވައި، އެތަކުރުފާނުގެ ބޭބޭފުޅު އަލީ ތަކުރުފާނާއި ކޮއްކޯފުޅު ހަސަން ތަކުރުފާނާއި ދެ ހާޖީންނާއި ދުވާފަރު ދަންޑަހެލާއެކު ޕޯޗްގީޒުންނާ ހަނގުރާމައަށް ނުކުމެވަޑައިގަތް ކުރެއްވި ވަރުގަދަ ޖިހާދުން ނަސްރު ލިބުނީ މީލާދީން 2 ޖުލައި 1573 ގައެވެ. އެއީ 981 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ވިލޭރެއެވެ. އެ ހަނގުރާމައިގައި އަލީ ތަކުރުފާނު ތަކަންދޫގައި ހުންނަވަނިކޮށް، ޕޯޗުގީޒުން އެތަކުރުފާނު ގަތުލުކޮށް އިސްތަށިފުޅު މާލެ ގެނައެވެ. އުތީމު ތިންބެއިން ޕޯޗްގީޒުންނާ ހަނގުރާމައަށް ނުކުންނެވީ އާއިލާ މަލިކަށް ބަދަލުކުރައްވާފައެވެ.

ދިވެހި ތާރީޚުގައި ނުދެކޭފަދަ އަނދިރި ދުވަސްތަކެއް ދިވެހިންނަށް ކުރިމަތިކުރުވައި ދިވެހި ވެރިކަމުގެ ސިންގާސަނާ އާއި ޕޯޗްގީޒުންނާއި މަތިކުރުމުގެ އިސްމޭސްތިރި އަކީ ނުވަ ވަނަ ހަސަން ރަސްގެފާނެވެ. ނުވަވަނަ ހަސަން ރަސްގެފާނު ގައުމަށްވެފައިވާ އެންމެ ބޮޑު ޚިޔާނާތަކީ 19 މެއި 1558، އަދި 1 ޝައުބާން 965 ގައި ޕޯޗްގީޒުން ރާއްޖެ ގެނެސް، ރާއްޖޭގެ ރަސްކަމުގައި ހުންނެވި އަލީ ރަސްގެފާނު ޝަހީދުކޮށްލުމެވެ. ޕޯޗްގީޒުން ރާއްޖެ އަޅުވެތިކުރީ އަލީ ރަސްގެފާނު ޝަހީދުކޮށްލުމަށްފަހު އެވެ.

ރާއްޖެތެރޭ ރަށަކަށް ނިސްބަތްވާ ގައުމީ މި ބަޠަލުގެ ޒިކުރާ އަހަރެމެން އައު ކުރާއިރު، ބޮޑުތަކުރުފާނަކީ އަމިއްލަ އެދުމެއް ވިޔަފާރީގެ މަސްލަހަތެއް އަދި ވެރިކަމުގެ މަސްތެއްވެސް ހުރި ބޭފުޅެއް ނޫނެވެ. އެހެންކަމުން މިއަދު ގައުމާއި ދީނުގެ ނަމުގައި ވާހަކަ ދައްކަވާ ބޭފުޅުން މިފަދައިން އިހްލާސްތެރި ވާން ޖެހޭނެއެވެ. ވެރިކަމުގެ ދަހިވެތިކަމުގައި ގައުމިއްޔަތުގެ ނަން ބޭނުން ކުރުމަކީ ދިވެހި އަބުޠާލުންނަށް ކުރާ މަލާމާތެކެވެ. މަގާމާއި އާރާއި ބާރުގެ ދަހިވެތި ކަމުގައި ދީނޭ ގައުމޭ ކިޔުމަކީ ދިވެހި ތާރީހު ދަންނަ ދިވެހިންގެ ސިފައެއް ނޫނެވެ. ގައުމު އަޅުވެތި ކަމަކާއި ދިމާލަށް މިސްރާބު ޖަހާފައިވާ ވާހަކަ އެއްބަޔަކު ދައްކާއިރު، އަޅުވެތި ވެފައިވާ ވާހަކަވެސް އެއްބަޔަކު އެބަ ދައްކައެވެ. ސުވާލަކީ މި ވާހަކަ ތަކާއި މިފަދަ އެތައް ކަމެއްގެ ވާހަކަ ހާމަކޮށް ތިލަކުރަންވީ ވެރިކަން ބަދަލުކުރަން ހިލާޔު ހޯދާ ދުވަސްވަރެއްގައި އެކަނި ހެއްޔެވެ؟ ދެތިން އަހަރު ކުރިން ގައުމު އަޅުވެރި ކަމަކަށް ގެންދަން ބަޔަކު ކުރާ މަސައްކަތް ބަލަން އެބައިމީހުންގެ ތެރޭގައި ހުރެ، ބަހެއް ނުކިޔާ، ތިމާގެ ކޮންމެވެސް އަމިއްލަ މަސްލަހަތެއް ހިމާޔަތްކުރުމަށް ބަސްކިޔާ، އެކަން ނުވުމުން އަޅުވެތިކަމޭ ގައުމިއްޔަތޭ ކިޔަނީ ހަގީގަތުގައި ގައުމިއްޔަތުގެ ލޭ ނުހިނގާތީއެވެ.

ގައުމު ދެކެ ލޯބިވާ ވަފާތެރިއެއްނަމަ، ގޯސް ހުއްޓުވާނީ ގޯސް ހަދާ ހިސާބުންނެވެ. ގޯހުގެ ތެރޭގައި ބައިވެރިވެ ހުރެ، ތިމާ ބޭނުން ކަމެއް ނުވުމުން ދެން ނުކުމެ ގޯސް އެއީ ގޯސް ކަމުގައި ދައްކަން އުޅިގެން ބަލައިގަންނާނެ މީހަކު ނުވާނެއެވެ. ވާނީ އިތުރަށް ބޭޒާރެވެ! ގެއްލޭނީ ތިމާގެ އަގެވެ. މިއީ ގައުމީ ދުވަހެއް އަޅުގަނޑުމެންނާ ބައްދަލު ކުރާއިރު، ވިސްނާލުން ރަނގަޅު ނުކުތާއެވެ!