ފަލަސްޠީނުގައި އިސްރާއިލުން ހިންގާ ގަތުލް އާއްމުގެ ތެރޭގައި ޒަޚަމްވެފައިވާ އެތައް ތުއްތު ކުދިންނެއް ޔަތީމުވެ، އަޅާލާނޭ މީހަކު ނެތި އެއްވެސް އެހީތެރިކަމެއް ނެތި އެބަ އުޅެއެވެ. އެއް ޒަމާނެއްގައި ހިނިތުންވުމެއް ހުރި މޫނު ތަކުގެ އުޖާލާކަމުގެ ބަދަލުގައި މިއަދު ފެންނަނީ މާޔޫސް ކަމާ މޮޅިވެރިކަމެވެ. އެ ތުއްތު ކުދިންގެ ނަފްސު އެ ހޭދަކުރަނީ ހިތާމަވެރި ހިމޭންކަމެއްގައެވެ. އަނިޔާވެފައިވާ އެ ތުއްތު މައުސޫމު ޔަތީމު ކުދިންނަށް، ގިސްލާ ރޯލުން ނޫން ގޮތެއް ނެތެވެ.

ފަނާވެފައިވާ އިމާރާތްތަކުގެ ތެރޭގައްޔާއި ރެފިއުޖީ ކޭންޕުތަކާ، ސުކޫލުތަކާ ހަސްފިތާލު ތަކުގައި ހިޔާވަހިކަން ލިބިފައިވާ އެ ކުދިންތައް ދަނީ މި ފަނާކުރަނިވި ހާދިސާތަކުގެ ޖިސްމާނީ އަދި ނަފްސާނީ ޒަޚަމްތައް ބަރުދާސްތު ކުރަމުންނެވެ. އިރެއްގައި މައިންބަފައިންނާ އެއްބަނޑުއެއްބަފާ ކުދިންނާ އެކު ސަކަރާތް ޖަހާ އުޅުނު ގޭ އެ އޮތީ ބިމާ ހަމަވެފައެވެ. މަޔަކު ބަފަޔަކު ނެތި ޔަތީމު ވެފައެވެ. އެއްބަނޑު އެއްބަފާ މީހަކު ނެތި އަޅާލާނޭ ޔާރެއް އިޔާރެއް ނެތިފައެވެ. އަނިޔާތަކާ އެކު ހަރު ތަޅުމުގައި ބޯ ބާއްވާލަނީ އެނޫން ގޮތެއް ނެތީމައެވެ. އެ ވޭނާ އާހުގައި ރޯލުން ނޫން ގޮތެއް އެ ކުދިންނަކަށް ނެތެވެ.

އެ މައުސޫލު ލޯތަކުން ކަރުނައެއް ނުހިކެއެވެ. މައިންބަފައިންނާ އެއްބަނޑު އެއްބަފާ ކުދިންގެ ހަނދާނުގައި އެ މައުސޫމު ތުއްތު ކުދިން ތިބެނީ އަބަދުމެ ރޯލަ ރޯލައެވެ. ތިބިފައިވާ ޒަހަމްތަކާ އަނިޔާތަކުގެ ވޭނާއި ރިހުމުގައި ރޯލަ ރޯލައެވެ. އެ މައުސޫމު ޔަތީމު ލޯތަކުން ފެންނަނީ ޖިސްމާނީ އަނިޔާތަކުގެ ވޭންތަކެއް ނޫނެވެ. ނަފްސާނީ ގޮތުން އެ ތުއްތު ތުއްތު ކުދިން އެ ތިބެނީ މުޅިންހެން ބަލިވެ ބިރުވެރިކަމާ ނާމާންކަމުގެ ތެރޭގައެވެ. ދަރިފުޅާއޭ ކިޔާ ލޯބިން ގޮވާލާނޭ މީހަކު ނުހުންނާނޭ ކަން އެނގޭ ހާލު އެ ތުއްތު ކުދިންނަށް ރޯލުން ނޫން ގޮތެއް ނެތެވެ.

ޖިސްމާނީ އަދި ނަފްސާނީ އަނިޔާތަކުން ވަށާލެވިފައިވާ މި ބިރުވެރި ހާލަތުގައި އެކުދިންނަށް ތަސައްލީއެއް ލިބުނީ ހަމައެކަނި ލޮލުން އޮހޮރާލެވޭ ކަރުނަތަކުންނެވެ. އެ ކަރުތަކަށް ފަރުވާލެއް ސަމާލުކަމެއް ދޭނޭ ހަމަ އެކަވެސް މިދުނިޔޭގައި އެކުދިންނަކަށް ނެތެވެ. ކޮންމެފަދަ ހާލަކައިގެންވެސް ރޯލުން ނޫން ގޮތެއް ނެތެވެ.

ކޮންމެ މީހަކުވެސް އެމީހެއްގެ ހާލައިގެން، އެމީހެއްގެ ދަރިންގެ ހާލައިގެން އުޅޭ އިރު، ޔަތީމުވެ އަޅާލާނޭ މީހަކު ނެތް އެތައް ތުއްތު ކުދިންނެއް އަނިޔާތަކުގައި ބޭސް ބަދަލު ނުކުރެވި، ހަމަ ނިދި ނިދާނުލެވި އަބަދު ރުއިމުގާ ހޭދަ ކުރެއެވެ. އެކުދިންނަށް އަޅާލާނީ ފަހެ ކާކު ހެއްޔެވެ؟ މިއީ ގަލަމަކުން ޅެމަކުން ބަޔާންކޮށްދެވޭނޭ އިހުސާސްތަކެއް ނޫނެވެ.

މިފަދަ ފުން ގެއްލުމަކާއި އުންމީދެއް ނެތް މުސްތަގުބަލެއްގެ ކުރިމަތީގައި، ޒަޚަމްވެފައިވާ އެ ޔަތީމު ކުދިންނަށް، މި ފުން، ބޮޑު ހިތާމައާ ހަވާލުވުން ނޫން ގޮތެއް ނެތެވެ. އަނިޔާތަކުގެ ސަބަބުން އަޅާ ވޭނާއި ރިހުމުގައި ރޯލުން ނޫން ގޮތެއް ނެތެވެ. މައިންބަފައިން ހަނދާންވެ އަޅާލާނޭ މީހަކު ނެތްކަން އިހުސާސްވުމުން އެ ތުއްތު ކުދިންނަށް ކުރެވޭ ހިތްދަތި އިހުސާސްތަކުގައިވެސް ރޯލުން ނޫން ގޮތެެއް ނެތެވެ. އެކުދިންގެ ޖިސްމާނީ އަދި ނަފްސާނީ ހަމައެކަނި ފަރުވާ އަކީ ރޯލުމެވެ. ހެޔޮވާނީ ކިހިނެއް ހެޔެއްވެ؟

މާތް ﷲ އެ ތުއްތު ކުދިންނަށް ކެތްތެރިކަން މިންވަރު ކުރައްވާށިއެވެ. އަދި ފަލަސްޠީނަށް ނަޞްރުދެއްވާ ޔަހޫދީންގެ އެ ގޮތެއް ފޮތެއް ނެތް އަމަލުތައް ނެތިކުރައްވާ އެ ބައިގަނޑު ބަލިކުރައްވާށިއެވެ.