ވެލެންޓައިންސް ޑޭގެ ނަމުގައި ކޮންމެ އަހަރެއްގެ ފެބްރުއަރީ މަހުގެ 14 ވަނަ ދުވަސް، ކާފިރުން ފާހަގަކޮށް އުޅެއެވެ. މިއީ ލޯބިވެރިންގެ ދުވަސް ކަމުގައި ހަދައިގެންނެވެ. މި ދުވަހުގެ އަސްލު އުފަންވެފައިވަނީ ގަދީމީ ރޯމަނުންނާއި ކްރިސްޓިއަންނުންގެ ސަގާފަތްތަކުގެ ބިންގަލެއްގެ މަތީގައި ކަމަށް ދިރާސާވެރިން ފާހަގަ ކުރެއެވެ. ވީއިރު މިއީ އިސްލާމީ މުޖުތަމައެއްގައި ކުލަގަދަކޮށް ފާހަގަ ކުރުން ހުއްދަވާނޭ ދުވަހެއް ނޫންކަމަށް އިސްލާމީ ޢިލްމުވެރިން ފާހަގަކުރެއެވެ.

ވެލެންޓައިންސް ޑޭގެ އަސްލަށް ބަލާލާއިރު، ދެ ނަޒަރިއްޔާއެއް ތާރީހު އިލްމުވެރިން ގެނެއެވެ. އޭގެ ތެރެއިން ފުރަތަމައީ ޤަދީމީ ރޯމަނުންގެ ސަގާފަތެއްގެ ވާހަކައެވެ. މި ނަޒަރިއްޔާއަކުން ދައްކާ ގޮތުގައި ވެލެންޓައިންސް ޑޭ އުފެދުނީ ފެބްރުއަރީ މަހުގެ މެދުތެރޭގައި ފާހަގަކުރި ޤަދީމީ ރޯމަނުންގެ އީދެއް ކަމަށްވާ "ލުޕަރކަލިއާ" އިންނެވެ. ލުޕަރކަލިއާ އަކީ ރޯމަނުންގެ ދަނޑުވެރިކަމުގެ ކަލާނގެއޭ ކިޔުނު ފައުނަސްގެ އިތުރުން ރޯމްގެ ބާނީން ކަމަށްވާ ރޮމޫލަސް އަދި ރެމޫސް އަށް ޚާއްސަކޮށްގެން ބާއްވާ ދަރިމައިވުމުގެ ފެސްޓިވަލެކެވެ. ލުޕަރކާލިއާގެ ދުވަސްވަރު ރޯމަނުން ޖަނަވާރު ޤުރުބާން ކުރުމާއި ދަރިމައިވުމުގެ އާދަތައް ހިމެނޭ ގޮތަށް އެބައިމީހުން އެ ދީނުގެ އަޅުކަންތައް ކުރުމާއި އުފާފާޅުކުރުންތައް ކުރިއަށް ގެންދިޔައެވެ. މި އީދު ފާހަގަކުރުން ޒަމާންތަކަކަށް ދެމިގެން ގޮސް، މިކަން ތަރައްގީވެގެން ދިޔައީ ކްރިސްޓިއަނުން ނުފޫޒުފޯރުވަމުން ދިޔަ ޗުއްޓީއަކަށެވެ. މިއީ ވެލެންޓައިންސް ޑޭ ފާހަގަ ކުރެވެން ފެށުނު ގޮތުގެ އެއް ނަޒަރިއްޔާއެވެ. މި ނަޒަރިއްޔާ އަކީވެސް އަހަރެމެން މުސްލިމުން އެއްގޮތަކަށްވެސް ތަބާވެގެން ވާނޭ ނަޒަރިއްޔާއެއް ނޫނެވެ.

ދެވަނަ ނަޒަރިއްޔާއަކީ ވެލެންޓައިންސް ޑޭ އާއި، މީލާދީން 3 ވަނަ ޤަރުނުގެ ތެރޭގައި ދިރިއުޅުނު ކްރިސްޓިއަން ފާދިރީ ވެލެންޓައިން އާއި ގުޅުވައިގެން ގެންނަ ނަޒަރިއްޔާއެކެވެ. ބުނެވޭ ގޮތުގައި ފާދިރީ ވެލެންޓައިން އަކީ ޒުވާން ސިފައިނުންނަށް ކައިވެނި ކުރުން މަނާކުރި ރޯމަނުންގެ ފައްޅީގެ ވެރިއެކެވެ. މި މަނާ ކުރުން މަނާ ވެފައި އޮތެއް ކަމަކު ފާދިރީ ވެލެންޓައިން ވަނީ ޒުވާން ސިފައިނުންނަށް ސިއްރުގައި ކައިވެނިތައް ކުރުވާފައެވެ. މިކަން ފާޅުވެ، އެންމެ ފަހުން އޭނާ ހައްޔަރުކުރިއެވެ. ބުނެވޭގޮތުގައި މީނާގެ މައްޗަށް މަރުގެ އަދަބު ތަންފީޒުކޮށް، މި ފާދިރީ މަރާލެވިފައިވަނީ ފެބްރުއަރީ މަހެއްގެ 14 ވަނަ ދުވަހު އެވެ. މި ވާހަކައިގެ ނިމުންވެސް ތަފާތުކޮށް އެކި މީހުން ކިޔާ އުޅޭ ކަމަށް ބުނެވެއެވެ.

 

ދުވަސްތައް ފާއިތުވަމުން ދިޔަ ވަރަކަށް މި ޤަދީމީ ރޯމަނުންނާއި ކްރިސްޓިއަން ސަގާފަތްތައް އެއްވެ، ވެލެންޓައިންސް ޑޭ ގެ ނަމުގައި މި ދުވަހެއް ފާހަގަ ކުރަން ފެށިއެވެ. މި ދުވަހަށް ވެލެންޓައިންސް ގެ ނަމުން ނަން ދީފައިވަނީ ނަމާ ކޮށްފައިވާ ކަންތައްތަކެއް ޒުވާނުން ލައްވާ، ސިއްރުގައި ކުރުވަމުން ގެންދިޔަ ކްރިސްޓިއަން ފާދިރީ ވެލެންޓައިން ގެ ނަމުންނެވެ. ދުނިޔޭގެ އެކި ކަންކޮޅުތަކުގައި މި ދުވަސް ފާހަގަ ކުރަމުން ދަނީ ލޯބިވެރިންގެ ދުވަހެއްގެ ގޮތުގައެވެ. ނަމަވެސް ބުއްދި ހުރި ކޮންމެ މީހަކަށްވެސް އެނގޭނޭ ފަދައިން ލޯބިވެރިންގެ ދުވަހަކީ އަހަރަކު އަންނަ އެއްމެ ދުވަހެއް ނޫނެވެ. ނަމަވެސް ކާފިރުންގެ މި ދުވަހަށް މި ނަންނ ކިޔާ ފާހަގަ ކުރަނީ އެބައިމީހުންގެ ދީނީ ތާރީހާ ގުޅުވައިގެންނެވެ.

އެއްމެހާ މުސްލިމުތަކުންނޭވެ! ލޯބިވެރިންގެ ދުވަހުގެ ނަމިގައި ކާފިރުން ފާހަގަ ކުރާ މި ދުވަހަކީ ޒިނޭ އާއި ފާހިޝް އަމަލުތަކުން އެބައިމީހުން ހަލާކުގެ ތެރެއަށް ގެނބިގަންނަ ދުވަހެކެވެ. އެ ދުވަހުގެ އެ ކުލަމަޖާ ތަކުގައި މުސްލިމުން ނެޖެހޭށެވެ. އެފަދަ ފާހިޝް އަމަލުތަކާ ދުރުވާށެވެ. މިއީ ސީދާ ކްރިސްޓިއަނުންނާ ފާސިދު ދީންތަކެއްގެ ތާރީހާ ސީދާ ގުޅިފައިވާ ދުވަހެކެވެ. މި ދުވަހު، މިބައިމީހުން ފަތުރާ ނުބައި މެސެޖު ތަކުގައި ޖެހި، ހަލާކާ ފަސާދައިގެ ތެރެއަށް އެއްވެސް މުސްލިމަކު މުދާށެވެ. މާތް ﷲ އަޅަމެންނަށް ހެޔޮ މަގު ދައްކަނާ ފާފަތައް ފުއްސަވާންދޭވެ!