ދިވެހިރާއްޖޭގައި އަސާސީ އެތައް ހިދުމަތެއް ދިވެހިންނަށްޓަކައި ދެވޭއިރު، ބައެއް އަސާސީ ހިދުމަތްތައް ދިނުމުގައި ޕްރައިވެޓް ސެކްޓާ ނުވަތަ އާއްމު ފަރާތްތަކުގެ ދައުރުވެސް ބޮޑެވެ. ސިއްހީ ހިދުމަތާއި ބޭންކިންގެ ހިދުމަތާއި ތައުލީމީ ހިދުމަތުގައިވެސް މެއެވެ. ދިވެހިރާއްޖެއަށް ބަލާއިރު، ވެރިކަންކުރާ މާލޭގައި، ޓެކްސީގެ ހިދުމަތަކީވެސް އަސާސީ ހިދުމަތެކެވެ. ޓެކްސީ ހިދުމަތަކީ މިއަދު މުޅިންހެން އާއްމުން ދެމުން އަންނަ ހިދުމަތެކެވެ. ނަމަވެސް ބައެއް ތަހުޒީބު ގައުމުތަކުގައި ޓެކްސީގެ ހިދުމަތަކީވެސް ދައުލަތުގެ ފަރާތުން ފޯރުކޮށްދޭ އަސާސީ ހިދުމަތެކެވެ.

ޓެކްސީގެ ހިދުމަތް މާލެ ސަރަހައްދުގައި ފައްކާވެފާ އޮތެއް ކަމަކު އަތޮޅުތެރޭގެ ރަށްތަކުގައިވެސް ޓެކްސީގެ ހިދުމަތް ފުޅާވެފައި އެބަ އޮތެވެ. ނަމަވެސް މިކަމުގައި އެއްމެ މަޝްހޫރު މަންޒިލަކީ މާލެ ސަރަހައްދެވެ. ނުވަތަ މާލެ ސިޓީއެވެ. ޓެކްސީ ގެ ހިދުމަތްތަކާއި ގުޅިގެން އެކި މީހުން އެކި ހިޔާލުތައް ފާޅުކޮށް އުޅެއެވެ. މި ރިޕޯޓުގައި ފާހަގަ ކޮށްލަން މިއުޅެނީ މާލެއިން ފެނުނު މަންޒަރެއްގެ ވާހަކައެވެ. އާނއެކެވެ! ބައެއް ޓެކްސީ ޑްރައިވަރުން ހަދަނީ ހަދާނެ އެއްޗެކެވެ! ހިތުހުރި ގޮތެކެވެ!

އެއްދުވަހުގެ ހަވީރުގެ ވަގުތެކެވެ! މާރުކޭޓުން ތަރުކާރީ އާއި މޭވައި ގަނެގެން، ދެ އަތްފުރާ ކޮތަޅުތައް ހިފައިގެން ނުކުތް މެދު އުމުރަށްވުރެ ދޮށީއުމުރުގެ އަންހެން ދައްތައެކެވެ. މާރުކޭޓާއި ދިމާލުން ބޮޑުތަކުރުފާނު މަގަށް ނުކުމެ، ޓެކްސީއެއް ލިބޭތޯ އުޅުނެވެ! ޓެކްސީބޯޑު ޖެހި ކޮންމެ ކާރަކަށް އެ ދައްތަ އަތް ނަގައެވެ! މަޑުނުކޮށް ދިޔަ އެތައް ޓެކްސީއެއް ދިޔައެވެ! ކާރުގެ އެތެރެ ފެންނަން ނެތުމުން އެއީ މީހުން އަރުވައިގެން ދިޔަ ކާރުތަކެއް ކަމަށް ނިންމީމެވެ! 

އަނެއްބައި ޓެކްސީތައް އައިސް އެ ދައްތަ ކައިރިއަށް މަޑުކޮށްލައެވެ! އެ ދައްތަ ކާރުގެ ދޮރާދިމާލަށް ކުޑަކޮށް ގުދުވެލާ، ކޮންމެސް އެއްޗެއް ބުނެއެވެ! ދެން އެ ކާރެއް ދުއްވާލާފައި ކުރިއަށް ދެއެވެ! ފެންނަ ފެނުމަށް ހީވަނީ ކާރު ދުއްވާ ޑްރައިވަރު ކުރެން ފައިސާއަށް ކިޔާ ހެންނެވެ! ހަގީގަތެއް ނޭނގެއެވެ! ކޮންމެ އަކަސް މިކަމެއް މިގޮތަށް ހިނގާތާ އެތައް އިރެއް ވެއްޖެއެވެ! އެ ދައްތަ މަޑުމަޑުން އިރުމައްޗަށް ޖެހެމުން ގޮސް އެމްއެމްއޭއާ ދިމާ ކަންމަތީގައި މަޑުކޮށް، އަނެއްކާވެސް ޓެކްސީއެއް ލިބޭތޯ މަޑުކޮށްގެން ހުއްޓެވެ! މިފަހަރުވެސް ކަންތައްވީ ހަމަ އެފަދައިންނެވެ. އަނެއްކާވެސް އިރުކޮޅަކު މިގޮތަށް މަޑުކުރުމަށްފަހު އެ ދައްތަ ޗާންދަނީ މަގުން އެތެރެއަށްވަނެވެ! ދެން އެ ދައްތަ އަޅުގަނޑުގެ ނަޒަރުން ގެއްލިއްޖެއެވެ! ވީ ގޮތެއް ދެނެއް ނޭނގުނެވެ!

އެކަމާ ކުޑަކޮށް ފިކުރުކޮށްލީމެވެ! ވެދާނޭ ހުރިހާ ގޮތަކަށް ވިސްނީމެވެ! ޖެހިގެން އައި ދުވަހެވެ! އޭޑީކޭ ހޮސްޕިޓަލު ކައިރިން ޓެކްސީއެއް ލިބޭތޯ އުޅުނީމެވެ! އެތައް އިރެއް ވީފަހުން ޓެކްސީއެއް މަޑުކޮށްލިއެވެ! އެރުމަށް އިޝާރާތް ކުރުމުގެ ބަދަލުގައި ތިރިކޮށްލީ ދޮރުފަތުގެ ލޯގަނޑެވެ! އަހާލީ ދާން ބޭނުންވަނީ ކޮންތަނަކަށް ތޯއެވެ! މަންޒިލު ބުނުމުން އަނގައިން ނުބުނެ ދުއްވާލީ ކުރިއަށެވެ! އަޅާނުލާ ހިނގައްޖެ އެވެ! މިގޮތަށް ދެ ކާރެއް ތަކުރާރުވުމަށްފަހު، ދެން އައި ކާރަށް އަރުވައިފިއެވެ!

މިކަމެއް ހިނގިފަހުން އަނެއްކާވެސް ވިސްނާލައިފީމެވެ! ކުރީ ދުވަހު އެ ދައްތައަށް ޖެހުނު ހާލަކީވެސް މިއީ ކަމުގައި ވެދާނެއެވެ! ދަތުރުވަރެއްގައި މާލެ އެރި މީހަކަށް މިކަންކަން މިވަރަށް ތަޖުރިބާކުރަން ޖެހުނުއިރު، މާލޭގައި އަބަދުމެ އުޅޭ މީހުންނަށް މިކަންކަން ކިހާވަރަކަށް ތަޖުރިބާކުރަން ޖެހޭނެބާއޭ ހިތަށް އަރައެވެ!

ބައެއް ޓެކްސީ ޑްރައިވަރުން ކިތައްމެހާވެސް ރަނގަޅެވެ! އޯގާތެރިއެވެ! ކަސްޓަމަރުންގެ އިހުސާސްތައް ދަނެއެވެ! ނަމަވެސް މިފަދަ ބައެއް ރުންކުރު، ބޮޑާވެރި ޓެކްސީ ޑްރައިވަރުންގެ ސަބަބުން މުޅި ޓެކްސީ ހިދުމަތުގެ އަގު ވެއްޓޭ ގޮތްވެއެވެ! ރައްޔިތުން ކުރާ ނަފްރަތު ބޮޑުވެއެވެ!

އެހެންކަމުން ޓެކްސީ ކުރާ ފަރާތްތަކުން މިކަމަށް ސަމާލުވުން މުހިއްމެވެ! އެހެނީ މިއަދު ޓެކްސީ ހިދުމަތަކީ އަސާސީ ހިދުމަތެކެވެ! އާދޭހެވެ! ތިޔައީ ވިޔަފާރި އެކޭވެސް ބުނެވިދާނެއެވެ! ވިޔަފާރިއަށް ގެއްލުންވާ ގޮތަށް، ވިޔަފާރިއެއް ނުކުރެވޭނެކަންވެސް ދަންނަމުއެވެ! އެހެނަސް މިއަދި ތިޔައީ ހަމަ އަސާސީ ހިދުމަތެކެވެ! ސަރުކާރުން ޓެކްސީ ކުރުމުން އެފަދަ ކަންކަން ހައްލުވާނެ ބާއެވެ؟ ހައްލުވާނަމަ، ސަރުކާރުން ޓެކްސީ ހިދުމަތް ފެށުމުގައި ގޯހެއް ނެތެވެ! ނޫންތޯއެވެ!