ސީރިޔާގެ ރައީސް ބައްޝާރު އަލް-އަސަދުގެ ވެރިކަން ވެއްޓުމަކީ މުޅި އިސްލާމީ ދުނިޔެއަށް ބޮޑު އަސަރެއް ކުރުވި ހާދިސާއެކެވެ. މި ހާދިސާއާ ގުޅިގެން މުސްލިމުންގެ މެދުގައި ހިޔާލުތަފާތުވުންތަކެއް މި ވަނީ އުފެދިފައެވެ. އެއް ބަޔަކަށް މިއީ އުފާވެރި ދުވަހެއް ކަމުގައި ވީއިރު، އަނެއް ބަޔަކަށް މިއީ ހިތާމަވެރި ދުވަހެކެވެ. އުފާކުރުމުގައިވެސް މުސްލިމުން ބައިވެރިވާއިރު، ހިތާމަ ކުރުމުގައިވެސް މުސްލިމުން އެބަ ބައިވެރިވެއެވެ.

ބައްޝާރުގެ ވެރިކަން ވެއްޓުމަކީ އުފާވެރި ކަމެއް ކަމުގައި ދެކޭ ފަރާތްތަކުން ބުނާ ގޮތުގައި، ބައްޝާރަކީ އޭނާގެ ރައްޔިތުންނަށް އަނިޔާވެރިވެފައިވާ، އިންސާނީ ޙައްޤުތަކަށް އިޙްތިރާމް ނުކުރާ ވެރިއެކެވެ. 50 އަހަރަށްވުރެ ދިގުލައިގެން ދިޔަ އާއިލީ ވެރިކަމުގައި ބައްޝާރު ވެރިކަމާ ހަވާލުވީ 2000ވަނަ އަހަރުގައެވެ. އެއީ ބައްޝާރުގެ ބައްޕާފުޅު ނިޔާވުމުން ވާރުތަވި ވެރިކަމެއްގެ ގޮތުގައެވެ. އެއިރު ބައްޝާރަކީ އިނގިރޭސިވިލާތުގައި ޑޮކްޓަރުކަން ކިޔަވަންހުރި ދަރިވަރެކެވެ. ބައްޝާރު ވެގެން ގޮސްފައިވަނީ ގޮތް ދޫނުކުރާ، ހަރުކަށި ވެރިއަކަށެވެ. އޭގެ ފަހުން 2011ވަނަ އަހަރުން ފަށައިގެން، ސީރިޔާގައި ދިޔައީ ދާހިލީ އެތައް ހަމަނުޖެހުމެއް ހިނގަމުންނެވެ. ސީރިޔާގެ ދާހިލީ ހަނގުރާމަތަކުގައި އެތައް ހާސް މުސްލިމުންނެއް ޝަހީދުވެފައިވަނީ ބައްޝާރުގެ ސަބަބުން ކަމަށް ދެކޭ ފަރާތްތައް މަދެއް ނޫނެވެ. އެހެންކަމުން، މިފަދަ ވެރިއެއްގެ ވެރިކަން ނިމުމަކަށް އައުމަކީ އެތައް ބަޔަކަށް ލިބޭ ހިތްހަމަޖެހުމެއް ކަމުގައި އެފަރާތްތަކުން ދެކެއެވެ.

އެހެންނަމަވެސް، ބައްޝާރުގެ ވެރިކަން ވެއްޓުމަކީ ހިތާމަވެރި ކަމެއް ކަމުގައި ދެކޭ ފަރާތްތަކުން ބުނާ ގޮތުގައި، ބައްޝާރަކީ ސީރިޔާގެ ސިޔާދަތު ހިމާޔަތްކޮށް، ބޭރުގެ ނުފޫޒުތަކުން ޤައުމު ސަލާމަތްކޮށްދިން ވެރިއެކެވެ. ބައްޝާރާ ދެކޮޅު ފަރާތްތަކުން ބުނަމުންދާ ގޮތްދޫނުކުރުމާއި ހަރުކަށިކަމަކީ މިއީ ކަމަށް، ބައްޝާރުގެ ސަޕޯޓަރުން ބުނެއެވެ. އެމެރިކާ އާއި އިސްރާއީލާއި އަދި ހުޅަނގުގެ ބައެއް ބާރުތަކުގެ ކުރިމަތީގައި ގަދަބަސް ބުނެ ގޮތްދޫނުކޮށް ބައްޝާރު އިސްކުރަނީ ގައުމުގެ ސިޔާދަތު ކަމަށް މިބައިމީހުން ދެކެއެވެ. ބައްޝާރުގެ ވެރިކަން ވެއްޓުމުން، ސީރިޔާގެ ސިޔާސީ މަޝްރަޙު އިތުރަށް ހަލަބޮލިވެ، ޤައުމުގެ ހާލަތު އިތުރަށް ގޯސްވެގެން ދާނެ ކަމަށް އެފަރާތްތަކުން ބިރުގަނެއެވެ.

މި ދެ ފަރާތުގެ ޚިޔާލު ތަފާތުވުމުގެ މައިގަނޑު ސަބަބަކީ، ސީރިޔާގެ ހަނގުރާމައިގެ އަސްލު ސަބަބާ މެދު އޮތް ތަފާތު ނަޒަރިއްޔާތުތަކެވެ. އެއް ބަޔަކު ދެކޭ ގޮތުގައި މި ހަނގުރާމައަކީ ބައްޝާރުގެ އަނިޔާވެރިކަމާ ދެކޮޅަށް ރައްޔިތުން ތެދުވި ތެދުވުމެކެވެ. އަނެއް ބަޔަކު ދެކޭ ގޮތުގައި މިއީ ބޭރުގެ ބާރުތަކުން ސީރިޔާގެ ސަރުކާރު ވައްޓާލުމަށް ރޭވި ރޭވުމެކެވެ. ބައްޝާރުގެ ސަރުކާރަށް ވާގިވެރިވަމުން ދިޔައީ އީރާނާއި ރަޝިޔާއިންނެވެ. ބައެއް ރިޕޯޓުތައް ބުނާ ގޮތުން ލުބުނާނުގެ ހިޒްބު ﷲ ޖަމާއަތުންވެސް ބައްޝާރުގެ ވެރިކަމަށް ތަރުހީބު ދެއެވެ. ބައްޝާރާއި ދެކޮޅަށް ހަނގުރާމަ ކުރި ހަނގުރާމަވެރި ޖަމާއަތްތަކަށް ވާގިވެރި ވުމުގައި ތުރުކީގެ އަތެއް ވެއެވެ. އަދި އެމެރިކާ އާއި ހުޅަނގުގެ އަތްތަކެއް ވާކަމަށްވެސް ރިޕޯޓުތައް ބުނެެއެވެ.

ސީރިޔާގައި އޮތް ބައްޝާރުގެ އާއިލީ ވެރިކަން ނިމުމަކަށް އައި އައުމަކީ އެ ގައުމު ޑިމޮކްރަސީއަށް ކުރާ ފުރަތަމަ ދަތުރު ކަމުގައި ވެދާނެއެވެ. ޑިމޮކްރެޓިކް ނިޒާމަކުން ސީރިޔާގެ ވެރިކަން ހިނގުން ްެއެއީ ބައްޝާރުގެ ވެރިކަމާ ދެކޮޅަށް ހަނގުރާމަ ކުރި ބައެއް މީހުން ބޭނުންވާ ގޮތެކެވެ. ދުނިޔޭގެ ބައެއް ބޮޑެތި ލީޑަރުންނާއި އިސްލާމީ ބައެއް ލީޑަރުންވެސް ބައްޝާރުގެ ވެރިކަން ނިމުމުން އެކަމާ އުފާކުރަނީ އަނިޔާވެރިކަމެއް ނިމުނީތީއެވެ. އެތައް ގަތުލް އާއްމަކާއި ލޭ އޮހޮރުވުމެއް ނިމުނީތީއެވެ. އެހެނަސް މިބައިމީހުންވެސް ދެކޭ ގޮތުގައި ކުރިއަށް އޮތީ ސީރިޔާއަށް ދަތި ދުވަސްތަކެކެވެ. ބައްޝާރުގެ ސަޕޯޓަރުން ނުކުމެ، އިތުރު ހަތިޔާރު އެޅި ޖަމާއަތެއް އުފައްދާ އަނެއްކާ ގައުމު ހަލަބޮލިކޮށްފާނެ ކަމުގެ ބިރަކީ ވަކި ކުޑަ ބިރެއް ނޫނެވެ.

ބައްޝާރުގެ ވެރިކަން މިފަދަ ގޮތަކަށް ނިމިގެން ދިއުމުން، ކަންބޮޑުވާ ފަރާތްތަކުން ފާހަގަ ކުރާ ގޮތުގައި މިއީ ހުޅަނގުގެ ނުފޫޒު ސީރިޔާއަށް ވަރަށް ބޮޑަށް ކުރާނެ ކަމެކެވެ. ސީރިޔާގެ ތެޔޮވަޅުތަކުގެ މިލްކިއްޔާތު އެމެރިކާ މީހުން ނަގާފާނެ ކަމެކެވެ. އިސްރާއީލުން، "ދަ ގްރޭޓް އިސްރާއީލުގެ" ހަން ފަތުރާ، ސީރިޔާގެ ބިން ހިފާފާނެ ކަމެކެވެ.

ކޮންމެ އަކަސް މި ދެ ފަރާތުންވެސް އެއްބަސްވާ ކަމަކީ، ސީރިޔާގެ ރައްޔިތުންނަށް ލިބެމުންދާ ގެއްލުމާއި ވޭނުގެ ބޮޑުކަމެވެ. އެހެންކަމުން، މުސްލިމުންގެ ހައިސިއްޔަތުން އަޅުގަނޑުމެން ކުރަންޖެހޭ ކަމަކީ، ސީރިޔާގެ ރައްޔިތުންނަށްޓަކައި ދުޢާކުރުމާއި، އެމީހުންނަށް ވެވުނު އެހީތެރިކަމެއް ފޯރުކޮށްދިނުމެވެ. އަދި މުސްލިމުންގެ މެދުގައި އޮތް ބައިބައިވުން ނައްތާލައި، އެއްބައެއްވަންތަ ކަމުގެ ރޫހު އާލާކުރަން އެބަ ޖެހެއެވެ. ހުޅަނގުގެ ގައުމުތަކުން ޖަހާ މަޅީގައި އަހަރެމެން މުސްލިމުން ޖެހިގެން ނުވާނެއެވެ. މުސްލިމުންގެ މައްޗަށް ހަރުކަށިކަމާއި ބޮޑާކަމާއި ކިބުރު، އިސްކުރާ ވެރިންނެއްވެސް އަހަރެމެން ބޭނުމެއް ނޫނެވެ!