އަޅުގަނޑުމެންގެ ގިނަ ބައެއްގެ ލޯބި ހޯދާފައިވާ، ކުރީގެ ފިލްމީ ތަރި މަރިޔަމް ނިޝާގެ ލޯބިލޯބި ދަރިފުޅު ކައިސްގެ ހިތުގެ ބޮޑު އޮޕަރޭޝަނެއް ކުރަން ޖެހުނުކަން މިއީ މީޑިޔާތަކުން ގިނަބަޔަކަށް ފޯރާފައިވާ ޚަބަރެކެވެ. ސަރުކާރާއި އާންމުންގެ ގިނަ ބައެއްގެ އެހީތެރިކަމާއެކު ކައިސްގެ އޮޕަރޭޝަނަށް އިންޑިޔާއަށް ފުރީ އޮކްޓޯބަރު މަހުގެ 19 ވަނަ ދުވަހުއެވެ. ބޮޑު އެހެެން ނަމަވެސް ކާމިޔާބު އޮޕަރޭޝަނަކަށް ފަހު މިއަދު ކައިސްގެ އާއިލާ އަނބުރާ ރާއްޖެ އެބަ އާދެއެވެ.

ކައިސްގެ ހިތުގައިވާ 3 ސެންޓިމީޓަރުގެ ލޯވަޅެއް ބެއްދުމަށް ކުރެވުނު އޮޕަރޭޝަންގައި އިސްކޮށް މަސައްކަތް ކުރެއްވީ ޑރ. އެޑްވިން ފްރެންޗިސް އެވެ. އިންޑިޔާގެ ކޮޗިންގެ ލިސީ ހޮސްޕިޓަލުގައި ކުރެވުނު އޮޕަރޭޝަން ކާމިޔާބުވެ، ކައިސް ގެއަށް ދޫކޮށްލުމުގެ ކުރިން ހޮސްޕިޓަލުގެ ފަރާތުން ކައިސްއަށް ވަރަށް ފުރިހަމަ ފެއަރވެލް އެއް ވަނީ ދީފައެވެ.

ކައިސްގެ އޮޕަރޭޝަނަށް ފަހު އާއިލާ އިން އެނބުރި ރާއްޖެ އަންނަނީ ދަތުރު ކުރެވޭ ވަރަށް ކައިސްގެ ހާލު ރަގަޅުވުމުންނެވެ. ނަމަވެސް އަދި ކުރިއަށް އޮތް 3 މަހާއި 6 މަހާއި ދެމެދު އަދި އެއް ފަހަރު ކައިސް އިންޑިޔާއަށް ގެންގޮސް ފޮލޯއަޕް ހަދަން ޖެހެއެވެ.