އިންޑިޔާ ކަނޑުގައި މިވާ ދިވެހިރާއްޖޭގެ ސަރަހައްދުގެ 99 އިންސައްތައަކީ ފެނެވެ. އަދި ދިވެހިރާއްޖެ އަށް ކުރިން ޒިޔާރަތްކުރި ސައްޔާޙުންގެ ލިޔުންތަކުގައި ވެސް އެންމެ އާންމު އެއް ވާހަކައަކީ ވެސް އެއީއެވެ. ދިވެހިން ކަނޑުން ރޯދި ހޯދާ ވާހަކައެވެ. ކަނޑަށް ދިވެހިން ގަދަވާހަކައެވެ. ދިވެހި ފިރިހެނުންނަކީ އަބަދުވެސް ކަނޑުގައި އުޅޭ ބައެއްކަމެވެ. ދިވެހިންގެ ހުރިހާ މުހުތާދެއްވެސް ކަނޑާއި ގުޅި ލާމެހިފައި ވާވާހަކައެވެ. އިހުގައި ދިވެހިން އެންމެ ކުޑައިރުންސުރެ މޫދާ ނުލާހިކު ދޯޅަވާނެއެވެ. ފުރާވަރުގެ ސޮރުމެން ރާޅާ އެޅުމާއި އެކިއެކި ކުޅިވަރުތަކުގައި މޫދުގައި ގިނަ ވަގުތު ހޭދަކުރެއެވެ. މަސްހިފުމާއި މަސްބޭނުމަށް ޒުވާނުން ބައިހަދާފައި އަބަދުމެ އުޅޭނެއެވެ. އަދި ވަރަށް ޅަ އުމުރުގައި ފަތަން ދަސްކޮށްލާ ކަމީ އޭރު ހައިރާންވާން ޖެހޭ ކަމެއް ނޫނެވެ.

ޒަމާން ބަދަލުވެ ދިވެހިންގެ ދިރިއުޅުމުގެ ވައްޓަފާޅިއަށް އައި ބަދަލުތަކާއި ގުޅިގެން ހާލަތު މިވަނީ ބަދަލުވެފައެވެ. މިއަދު ދިވެހިންގެ ތެރޭގައި ފަތަން ނުދަންނަ ގިނަ ބަޔަކު ތިބި ކަމީ އެންމެނަށް އެނގޭ ހަގީގަތެކެވެ. ސީދާ ކިތައް އިންސައްތަކަން އެނގޭނޭ ދިރާސާއެއް ހެދިފައި ނެތްނަމަވެސް، މިއީ ކަންބޮޑުވާން ޖެހޭ ކަމެކެވެ. ވަށައިގެންމިވާ މާކަނޑަށް ކޮންމެ އިރަކުމެ ނުކުންނަން ޖެހިދާނެކަމަށް ވީއިރުވެސް، ފަތަން ދަސްކުރުމަކީ އާދައިގެ ކަމެއްކަމަށް ދެކުމަކީ ބޮޑު މައްސަލައެކެވެ.

ފަތަން ދަސްކުރާން ޖެހެނީ ކީއްވެ؟

ރަށްތައް އުފެދިފައިވާ ގޮތާއި، ވަޞީލަތްތައް ލިބެން ހުރި ގޮތްތަކަށް ބަލާއިރު އަހަރުމެން އެއް ރަށުން އަނެއް ރަށަށް ދަތުރު ކުރަން ޖެހެއެވެ. ގިނައިން ކަނޑުމަގުންނެވެ. ވައިގެ މަގުން ބޭނުން ކޮންމެ ރަށަކަށް ދަތުރު ކުރެވޭނޭ އިންތިޒާމެއް އަދިއެއް ނެތެވެ. އެކަން އެހެން ވިޔަސް ވާން އަދި ލައްކަ ދުވަސް ނަގާނެއެވެ. އެހެންކަމުން މުހުތާދެއް ފިލުވުމަށް އެހެން ރަށަކަށް ކުރަން ޖެހޭ ދަތުރެއް ކުރަން މިޖެހެނީ ކަނޑުމަގުންނެވެ. އަދި ކޮންމެ ދަތުރަކީ އަމާން ދަތުރަކަށް ނުވެއެވެ. އެހެންކަމުން ކަނޑުމަތީގައި ދިމާވެދާނެ ކާރިސާއަކަށް ވިސްނަން ޖެހެއެވެ. އެފަދަ ކާރިސާއެއް ދިމާވެއްޖެނަމަ ސަލާމަތްކަން ހޯދުމަށް ފަތަން އެނގިފައި ހުރުމަކީ ވަރަށް މުހިންމު ކަމެކެވެ. ފަތަން ނޭނގުމުގެ ސަބަބުން ހިތާމަވެރި ކިތަންމެ ހާދިސާތަކެއް ކުރިމަތިވެފައި އެބަ ހުއްޓެވެ. ކުރުކޮށް ބުނާނަމަ، ދިވެއްސަކަށް ވީތީ ފަތަން އެނގުމަކީ ލާޒިމުކަމެކެވެ.

މިކަން ހައްލު ކުރެވޭނީ ކިހިނެއް؟

މި މައްސަލަ ހައްލު ކުރެވޭނީ ކޮންމެ މީހަކީ ފަތަން ދަންނަ މީހަކަށް ހެދިގެންނެވެ. ވަކި އުމުރަކަށް އެޅޭއިރު ފަތަން އެނގުމަކީ ލާޒިމުކަމެއް ކަމެއްކަމުގައި ހެދިގެންނެވެ. ސުކޫލު ތެރެއިން މިކަމަށް އިންތިޒާމްތަކެއް ހަމަޖެހިގެންނެވެ. މިހާރުވެސް ފަތަން ދަސްކޮށްދޭ ޕްރޮގްރާމްތައް ހިންގި ނަމަވެސް، އެއީ ވަކި އުޞޫލަކުން ދެމެހެއްޓެނިވި ގޮތެއްގައި ހުރިހާ ރަށެއްގައި ހިންގޭ ހަރަކާތްތަކަށް ވާން އެބަ ޖެހެއެވެ. އެކަން ވާނީ ސަރުކާރުން ހޭލުންތެރިކުރުވުމުގެ ޕްރޮގްރާމްތަކެއް މުޅި ރާއްޖެއަށް ފަތުރާލައިގެންނެވެ. ކޮންމެ ރަށެއްގައި ފަތަން ދަސްކޮށްދޭން ތަމްރީން ލިބިފައިވާ އެކަކު ނަމަވެސް ހުރެގެންނެވެ. އޭރުން އެ ފަރާތުގެ ބެލުމުގެ ދަށުން އެ ރަށެއްގެ ހަރަކާތްތައް ވިލަރެސް ކުރެވިގެންދާނެއެވެ.