ދިވެހިން ދަތުރު ގޮސް އުޅުނު ކުޑަބަނޑޮސް ދިވެހިންނަށް ގެއްލި ދިޔަތާ އެތައް އަހަރުތަކަކަށް ފަހު މިވަނީ އަނެއްކާވެސް ދަތުރު ދިއުމަށް މުޅިން އާރަށެއް ލިބިފައެވެ. މިފަހަރު ޒަމާނީ އެތައް ވަސީލަތްތަކަކާއި ހިދުމަތް ތަކަކާއި އެކު ޕިކްނިކް އައިލެންޑެއްގެ ގޮތުގައި ސަރުކާރުން ތަރައްގީ ކޮށްދީފައި މިވަނީ " ކުޑަގިރި " އެވެ. 

އަލަށްލިބުނު މިރަށާއި އެކު އަނެއްކާވެސް ޒަމާންވީ އެތައް ހަނދާންތަކެއް ހޭލައްވާލިކަހަލައެވެ. ފަތިހު މުނާޖާ ކޮނޑުއަޅައިގެން އާއިލާ މީހުންނާއި އެކުވެރިން ދަމާދަންކިއާފަ ގޮސްއުޅުނު މަޖާ ދަތުރުތައް އަނެއްކާވެސް އިޢާދަވީއެވެ. މަސައްކަތުން ހިންދެމިލާ ސިކުނޑި ހަމަޖައްސާލަން ހަފްތާ ބަންދުގައި ފަސޭހަކަމާއި އެކު ދަތުރު ގޮސްލާނެ މަގު ހުޅުވުނީއެވެ.ސްކޫލް ކުދިންނާއި ތުއްތު ކުދިންގެ ހިތްހަމަ ޖައްސާލުމަށް ހަފްތާ ބަންދުގައި އެކުދިންގެ ސިކުނޑި ތަނަވަސް ކޮށްލަން ފުރުސަތު ދެވޭނެ މަގު ތަނަވަސްވީއެވެ. 

ނަމަވެސް ދަތުރު ގޮސް އުޅޭއިރު ސަމާލުކަން ދޭންވާ ވަރަށް މުހިންމުކަމެއް އެބައޮތެވެ. އެއީ ރަށުގެ ސާފްތާހިރުކަމާއި ރަށުގެ ވަސީލަތްތައް ހެޔޮގޮތުގައި ބޭނުންކޮށް ރަށުގެ ތަންތަނާއި ތަކެއްޗަށް ގެއްލުންނުދީ ރަށުގެ ރީތިކަމާ ސާފުތާހިރުކަން ދެމެހެއްޓުމެވެ. ކިތަންމެ ގިނަ ބަޔަކު ރަށުތެރެ ސާފުކުރުމުގެ މަސައްކަތުގައި ތިބިކަމުގައިވިޔަސް ކޮންމެ މީހަކު ވެސް ފަރުދީ ޒިންމާ އަދާކުރުން މުހިންމެވެ. މިއީ ރައްޔިތުންގެ ތަންތަނާއި ރައްޔިތުންގެ ތަކެއްޗެވެ. އަޅުގަނޑުމެންގެ އާއިލާތަކާއި އެކުވެރިންނާ ދަރިން ގެ އުފަލަށް ހެދިފައިވާ ތަންތަނެވެ. ވީމާ މިތަންތަން ރަނގަޅަށް ބެލެހެއްޓުމަކީ އަޅުގަނޑުމެން އެންމެންގެ ޒިންމާ އެކެވެ. ދަތުރު ގޮސް އުޅޭ އިރު ގެންދާ އެއްޗެހި އަތިރިމަތީގެ އެކި ސަރަހައްދުތަކަށް އުކާލުމުގެ ބަދަލުގައި އެތަކެތި ވަކިން އެއްޗަކަށް އަޅާ އެތަކެތި އުކާލަން ހަމަޖެހިފައިވާ ތަންތަނަށް އުކާލުމަކީ ކޮންމެ މީހަކުވެސް ކުރަންޖެހޭ ކަމެކެވެ.

ރަށުތެރޭގައި ބެހެއްޓިފައި ހުންނަ ތަކެތީގަ އަދި ތަންތަނުގެ ފާރުތަކުގައި ހަޑި ހުތުރު ބަސްތަކާއި މަންޒަރު ކުރަހާ ތަންތަނުގައި ލިޔެ ހެދުން އެއީ ނާތަހުޒީބު އަމަލެކެވެ. މިފަދަ ކަމެއް ކުރަނިކޮށް ފެނުނަސް ފަސްނުޖެހި އެކަންކަން ހުއްޓުވާ ނަސޭހަތް ތެރި ވުން އެއީ އެދެވިގެންވާ ގޮތެވެ. ޕަބްލިކް ފާޚާނާ ތައް ބޭނުންކުރާއިރު ފާޚާނާތެރެ ހަޑިނުވާ ގޮތަށް ބޭނުން ކުރުމަށް ސަމާލުކަން ދޭންވާނެއެވެ. ޗޭންޖިންގ ރޫމްތަކުގެ ސާފުތާހިރުކަންވެސް ދެމެހެއްޓޭތޯ ބަލަންވާނެއެވެ. މިފަދަ ތަންތަނަކީ އެންމެންގެ ފަސޭހައަކަށް ހުންނަ ތަންތަން ކަމުގައި ވާއިރު ބޭނުން ކުރަންވާނީ އެހެން މީހުނަށްވެސް ވިސްނައިގެންނެވެ. 

ރަށު ތެރެއަށާއި ގޮނޑުދޮށަށް ކުނި އެޅުމުން ދުރުހެލިވާށެވެ. އަތުގައި އޮންނަ ކުނިކޮޅު ޑަސްބިނަށް އެއްލާލުމަށް އާދަކުރާށެވެ. މިގޮތަށް ގޮނޑުދަށަށް އުކާލެވޭ ކުނިން ގެއްލުންވަނީ ހަމައެކަނި އަޅުގަނޑުމެނަކަށް ނޫނެވެ. މިރީތި ވެށި އަދި މޫދުގައިވާ ދިރުންތަކަށްވެސް ކުނީގެ ސަބަބުން ގެއްލުން ލިބެއެވެ. ޕްލާސްޓިކް ފަދަ ފަސޭހައިން ނައްތާނުލެވޭ ކުނިބުނި މޫދާއި ގޮނޑުދޮށަށް އަޅަން ފަށައިފިނަމަ ވަރަށް ފަސޭހައިން ވެށީގެ ރީތިކަން ނެތިގެންދެއެވެ.މިވެށި ރައްކާތެރިކުރުމުގެ ޒިންމާއަކީ އެންމެންގެ މައްޗަށް އޮތް ކަމެއްގެ ގޮތުގައި ގަބޫލުކުރަންޖެހެއެވެ.

ދަތުރުގޮސް އުޅޭއިރު މިފަދަ ކަންކަމަށް ސަމާލުކަން ނުދޭ މަދު ބައެއްގެ މިފަދަ ޢަމަލުތަކުގެ ސަބަބުން އެންމެނަށް އޭގެ އުނދަގޫ ކުރިމަތިވާނެއެވެ. ގުދުރަތީ ރީތި މާހައުލުން ލިބިދޭ ހިތްހަމަޖެހުމާއި އުފާ އޭގެ އެންމެ ފުރިހަމަ ގޮތުގައި ހޯދުމަށްޓަކައި ކޮންމެ މީހަކުވެސް ރަށުތެރެ ސާފުތާހިރުކޮށް ބެހެއްޓުމަށް މަސައްކަތްކުރަންޖެހެއެވެ. ތަހުޒީބުވެ ތަރައްޤީވަމުން އަންނަ ދުނިޔޭގައި ޢާއްމު އިޖްތިމާޢީ މިންގަނޑުތަކާއި ޚިލާފަށް ޒިންމާދާރުކަން ކުޑަކޮށް އުޅުން ހުއްޓާލަންޖެހެއެވެ.

އެންމެންގެ އެއްބާރުލުން ލިބިއްޖެނަމަ މިރީތި " ކުޑަގިރި" މިހާރަށްވުރެންވެސް ރީތި ފެހި ރަށަކަށް މުސްތަޤްބަލުގައި ވެގެންދާނެއެވެ. ދަތުރު ގޮސް އުޅެން ހިތްގައިމު ރައްކާތެރި މާހައުލަކަށް  މިރަށް ހެދޭނީ އެންމެންގެ ހިތްވަރާއި މަސައްކަތާއި އެއްބާރުލުމުންނެވެ. އަޅުގަނޑުގެ އުންމީދަކީ ކޮންމެ މީހަކީވެސް އެމީހެއްގެ ޤައުމުގެ ވަސީލަތްތަކަށް އިޚްތިރާމްކުރާ، އެއީ އަމިއްލަ އެއްޗެއްހި ކަމުގައި ދެކިގެން ބެލަހައްޓާ ރައްކާތެރިކުރުމެވެ. ޤައުމުގެ ކުރިއެރުމާ ތަރައްޤީގައި ކޮންމެ މީހެއްގެ ޙިއްޞާވެސް މުހިންމުމެވެ.