ދިރިއުޅުމުގައި ދިމާވާ ގޮންޖެހުންތަކާއި ކަންކަމުގައި ގޮތްހުސްވެ ދާންވީ މަގު ނޭގިފައިވަ ފަރާތްތަކަށް މަގުދައްކައިދީ އެހީތެރިވުމުގެ މަޤްސަދުގައި "ޕްރޮފެޝަނަލް ކޯޗިންގ އެންޑް މެންޓަރިންގ އެސޯސިއޭޝަން އޮފް މޯލްޑިވްސް (ޕިކޮމާ)" ރަސްމީކޮށް އިފްތިތާޚް ކޮށްފިއެވެ. މިއީ މިފަދަ ޖަމިއްޔާއެއް ރާއްޖެއަށް ތައާރަފް ކުރެވިގެންދިޔަ ފުރަތަމަ ފަހަރެވެ. މިރަސްމިއްޔާތު ޝަރަފްވެރި ކޮށްދެއްވައިފައި ވަނީ މިނިސްޓަރ އޮފް  ސްޓޭޓް ފޯރ ޖެންޑަރ އެންޑް ސޯޝަލް ސަރވިސަސް އަލްފާޟިލް މުޙައްމަދު ޝިހާބްއެވެ. 

ޕިކޮމާގެ ރައީސާ ޙައްވާ ޝަހީނާ މުޙައްމަދު ވިދާޅުވިގޮތުގައި ދިރިއުޅުމުގައި ދާންވީ ދިމާލެއް ނޭގި ގޮތް ހުސްވާ ވަގުތު ޕްރޮފެޝަނަލް ކޯޗެއްގެ އެހީތެރިކަން ވަރަށް މުހިއްމެވެ. ޕިކޮމާގެ ނަމުގައި މިއަދު ތައާރަފް ކުރެވުނު ޖަމްއިއްޔާ އަކީ 2011 ވަނައަހަރު "ކެރިއަރ ވިޓަމިން ސޮސައިޓީ"ގެ ނަމުގައި ރަޖިސްޓްރީ ކުރެވުނު ޖަމްއިއްޔާއެއްކަމުގައްޔާއި މިހާރު ޖަމްއިއްޔާގެ ނަން " ޕްރޮފެޝަނަލް ކޯޗިންގ އެންޑް މެންޓަރިންގ އެސޯސިއޭޝަން އޮފް މޯލްޑިވްސް (ޕިކޮމާ)" އަށް ބަދަލުކޮށް ރަސްމީކޮށް ތައާރަފްކުރެވުނީ ކަމުގައި ޝަހީނާ ވިދާޅުވިއެވެ. 
 
ސޯޝަލް މީޑިއާގައި އާއްމުން ދަންނަ ނަމުންނަމަ "ޑިއުޑްރޮޕް ޝަހީނާ" އަށް ދިރިއުޅުމުގައި ތަޖުރިބާ ކުރެއްވި ތަފާތު ގޮންޖެހުންތަކުން އަރައިގަތުމަށް ކުރެވުނު ބުރަމަސައްކަތްތަކުގެ ނަތީޖާ އެއްގެ ގޮތުން ދަސްވި ފިލާވަޅުތަކުގެ ބޭނުންކޮށް މިޖަމިއްޔާއިން މީހުން ބިނާ ކުރުމުގައި ގިނަ މަސައްކަތްތަކެއް ކުރެވެމުންދެއެވެ. ފުރަތަމަ ޖަމިއްޔާ ރަޖިސްޓްރީ ކުރެވުމާއި އެކު ޝަހީނާ ބޭނުންވީ ރާއްޖޭގެ ކޮންމެ ރަށެއްގައިވެސް ތަޖުރިބާހުރި ޕްރޮފެޝަނަލް ކޯޗެއް ހުރުމެވެ. ނަމަވެސް ބޭރުން މީހަކު ގެނެސްގެން މީހުން ތަމްރީނުކުރުމުގައި ދަތިތަކެއް ހުރިކަން އިހުސާސް ކުރެވުމުން ޝަހީނާއަށް ރާއްޖޭގައި ކޯޗުން ތަމްރީން ކުރެވޭ ފެންވަރަށް އަމިއްލަ އަށް އުނގެނުމަށް ބޭނުންވިއެވެ. އެގޮތުން މޯލްޑިވްސް ނޭޝަނަލް ޔުނިވަރސިޓީއިން އިން މާސްޓަރސް ޑިގްރީ ހެއްދެވިއެވެ. އެއަށްފަހު "ސަރޓިފައިޑް ޕްރޮފެޝަނަލް ކޯޗް" ޕޮރޮގްރާމް މެލޭޝިއާއިން އަދި "ސަރޓިފައިޑް އެކްޒެކެޓިވް ކޯޗް" އަދި "ސަރޓިފައިޑް ޓީމް ކޯޗް" މާރޝަލް ގޯލްޑް ސްމިތް ސްޓޭކްހޯލްޑާ ސެންޓަރޑް ކޯޗިން އިން ފުރިހަމަކުރެއްވިއެވެ. ހަމައެއާއިއެކު ޖޯން މެކްސްވެލްގެ "ލީޑަރޝިޕް ކޯޗް، ސްޕީކާރ، ޓްރެއިނަރ" ޕްރޮގްރާމް ފުރިހަމަ ކުރެއްވުމަށްފަހު "ސަރޓިފައިޑް ފެސލިޓޭޓަރ" ގްރޭޕް ޕީޕަލް، ފިންލޭންޑްއިން ފުރިހަމަކުރެއްވިއެވެ. އަދި "ކޮލިފައިޑް ބްރޭންޑިންގ ކޯޗް" ސިންގަޕޯރ ސްޕެންޑްލެސް އެކަޑަމީ އިން ފުރިހަމަކުރުމުގެ އިތުރަށް ލައިފް ސްކިލް ޓްރެއިނިން، ލިވިން ވެލިއު އެޑިއުކޭޝަން ޓްރެއިނިން، ޕަބްލިކް ސްޕީކިން، އަދި އެންޓަރޕްނިއަރޝިޕް ޓްރެއިން ދަ ޓްރެއިނަރ ފަދަ ޕްރޮގްރާމްތައް ފުރިހަމަ ކުރެއްވިއެވެ.  

ޝަހީނާއަށް ލިބުނު ތައުލީމާއި ތަމްރީންގެ ބޭނުންކޮށްގެން ކޯޗިންގ ސެޓްފިކެޓް އެއް ހިންގިދާނެކަން ޤަބޫލްކުރެވި 2022 ވަނަ އަހަރު "ޑިއުޑްރޮޕް ލީޑަރޝިޕް ސަރޓިފައިޑް ކޯޗް" ގެ ނަމުގައި ރާއްޖޭގައި ފުރަތަމަ ފަހަރަށް ކޯޗިންގ ސެޓްފިކެޓެއް ތައާރަފް ކުރެވުނެވެ. މިވަގުތު ޝަހީނާގެ ކޯޗިންގ ޕްރޮގްރާމްގައި އުނގެނެމުންދާ 18 ދަރިވަރުން އެބަތިއްބެވެ.  މިއާއި އެކު ޕިކޮމާއިން މިއަހަރު ތެރޭ ހިލޭ ހިންގާދޭނެ ދެ ޕްރޮގްރާމެއް ކަމުގައިވާ "ޑިއުޑްރޮޕް ލީޑަރޝިޕް ޔޫތު ކޯޗް" އަދި "ޑިއުޑްރޮޕް ލީޑަރޝިޕް ޓީން ކޯޗް" މިހާރު އިއުލާން ކުރެވިފައިވާނެ ކަމަށް ޝަހިނާ ފާހަގަކުރެއްވިއެވެ.  


"ދިރިއުޅުމުގައި ދިމާވެފައި ހުރި ގޮންޖެހުންތަކަކީ މައްސަލައެއް ނޫނޭ ބުނެ ދިރިއުޅުމުގެ ދެންހުރި ލެވަލްއަށް ގެންގޮސްދިނުމަށް ކޮއްޕާލަދޭނެ މީހަކު، އަދި ދިރިއުޅުމުގައި ކުރިއަރަމުންދާއިރު ވެއްޓިއްޖެނަމަ އަތްދިއްކޮށްލާފަ ހިފަހައްޓާލާނެ މީހަކު ހުރުން މުހިއްމު. މިއީ އަޅުގަނޑުމެނަށް ކޯޗިންގ މުހިއްމުވާ ސަބަބަކީ، މިމުޖުތަމައުގައި ގެއްލިފައިވާ އިޖުތިމާއީ ފޭރާން އަނބުރާ ގެނެސްދިނުމަކީ މިޖަމްއިޔާގެ އެންމެ މުހިއްމު އެއް މަސައްކަތް. އަޅުގަނޑުމެންގެ ވިޝަން އަށް ބަލާލާއިރު ރާއްޖޭގައި ފުޅާ ދާއިރާއެއްގައި ކޯޗިން ޗެމްޕިއަން ކުރުމައްޓަކައި މަސައްކަތް ކުރާ ޖަމިއްޔާއެއްގެގޮތުގައި އަޅުގަނޑުމެން މަސައްކަތް ކުރަންބޭނުންވަނީ. ކޯޗިންއަކީ އަޅުގަނޑުމެން ކޮންމެ ލެވަލް އެއްގައިވެސް ބޭނުންކުރަންޖެހޭ ހިދުމަތެއް، ހަމައެކަނި ގޭތެރޭގައި ނުތެދުވެވޭ މީހާ ނުވަތަ މަގުމަތިވެފައިވާ ކުޑަކުއްޖާއަށް ބޭނުންވާ ކަމަކަށްވުރެން ދިރިއުޅުމުގެ ހުރިހާ ލެވަލް އެއްގައިވެސް ކޯޗިންބޭނުންކުރަން ޖެހޭ، މިކަން މިހެން ކުރާނާމަ އަޅުގަނޑުމެންގެ ރާއްޖޭގެ އިޤްތިޞާދާއި ދިރިއުޅުމުގެ ފެންވަރާ ހުނަރު 100 ޕަރސެންޓް ކުރިއަރައިގެންދާނެކަމުގެ ޔަގީންކަން އެބައޮތް" ޝަހީނާ ވިދާޅުވިއެވެ. 
ކުންފުނިތަކުގެ ސީއީއޯއިން، މިޑްލް މެނޭޖަރސް  އަދި ސަރުކާރުގެ އިދާރާތަކުގައި ތިއްބަވާ އިސްވެރިން ކޯޗިން ހިދުމަތް ބޭނުންކުރައްވައިގެން އެއިދާރާ އަކުން ދެވޭ ޚިދްމަތުގެ ފެންވަރު އެތައް ގުނައަކަށް އިތުރު ކުރެވޭނެ އަދި އެމީހުންގެ ދިރިއުޅުމުގައި ޗެލެންޖިން ސިޗުއޭޝަން އެއް ދިމާވެއްޖެނަމަ ބައުންސް ބެކްވާން ދަންނަ، ކޮރަޕްޝަން ފްރީ އަދި އިސްލާމިކް ވެލިއުސް ތަކުގައި އުޅޭ ބަޔަކަށް ވުމަށް މަގުފަހިވެގެންދާނެ ކަމުގައި ޝަހީނާ ވިދާޅުވިއެވެ. 


މިރަސްމިއްޔާތުގައި ވާހަކަފުޅު ދައްކަވަމުން ޖެންޑަރ މިނިސްޓްރީގެ ސްޓޭޓް މިނިސްޓަރ އަލްފާޟިލް މުޙައްމަދު ޝިހާބް ވިދާޅުވީ އަޅުގަނޑުމެންގެ ތެރޭގައި ބޭނުންވަނީ ދާންބޭނުންވާ ހިސާބް ކަނޑައަޅާ އެހިސާބަކަށް ދެވެންދެން މަސައްކަތް ކުރާ ފަދަ ބައެއްކަމުގައެވެ. އަޅުގަނޑުމެން ކޮންމެ މީހަކީ ވެސް ކޮންމެ ދުވަހަކު އެތައް ދަތިތަކާއި އުދާސްތަކަކާއި ކުރިމަތިލާން ޖެހޭ ބައަކަށް ވާއިރު މިއަދު މަގުދައްކާދޭނެ ބަޔަކު ބޭނުންވާކަން ސްޓޭޓް މިނިސްޓަރ ފާހަގަކުރެއްވިއެވެ. މިޒަމާނަށް ފެތޭގޮތަށް މަގުދައްކައިދޭނެ ބަޔަކު ބޭނުންވާ ކަމަށާއި، އަޅުގަނަޑުމެންގެ މުޖުތަމައުގައި ތަފާތު އެތައް މިޒާޖުގެ ބަޔަކު ދިރިއުޅެމުން ދާއިރު، އެންމެން އެއްކޮށް ހިތްހަމަ ޖެހިގެން އުފަލުގައި އުޅޭނެ ގޮތެއް ހޯދަން އެބަޖެހޭ ކަމުގައި ޝިހާބު ވިދާޅުވިއެވެ.  އަދި މިހާ ހަލަބޮލި އުނދަގޫ ދުނިޔެއެއްގައި އުޅެމުންދާއިރު ދަތިއުނދަގޫ ކަމެއް ދިމާވާ ވަގުތު ވިސްނަންވީ ކޮންމެ ދަތި އުދަގުލަކާ އެކު ފަސޭހަކަމެއް ވާކަން ކަމުގައި ސްޓޭޓް މިނިސްޓަރ ފާހަގަ ކުރެއްވިއެވެ. މިޖަމިއްޔާއިން މިފަށާ ދަތުރަކީ ބޮޑު ދަތުރެއްގެ ފެށުންކަން ޔަގީން ކަމަށާއި މިޖަމްޢިއްޔާ އަކީ ބައިނަލް އަޤްވާމީ ފެންވަރުގެ އަދި އެއަށްވުރެންވެސް ރަނގަޅު ފެންވަރުގައި ކުރިއަރައިގެން ދާނެ ޖަމިއްޔާއަކަށްވުމަށް އުއްމީދުކުރައްވާ ކަމުގައި މިނިސްޓަރ ފާހަގަ ކުރެއްވެވިއެވެ. 


މިރަސްމިއްޔާތުގައި މިހާރު ކޯޗިންގ ސެޓްފިކެޓް ގައި ބައިވެރިގެން ކޯޗިން ނަންގަވަމުންދާ ބައެއް ދަރިވަރުންގެ ވަހާކަތައް އަޑުއިވުނުއިރު ފާހަގަ ކުރެވިގެންދިޔައީ އެކުދިންނަށް ލިބިފައިވާ ހިތްވަރާއި ކުރިއެރުމަށް ދެކޭ ހުވަފެންތަކެވެ. އެކުދިންގެ ދިރިއުޅުމުގައި ދިމާވެފައިވާ އެކި ކަހަލަ ގޮންޖެހުންތަކުން އަރައިގަނެ ދިރިއުޅުމުގެ ރޭހުގައި ޕްރޮފެޝަނަލް ކޯޗިންގގެ އެހީތެރިކަމާއި އެކު ބަދަލުވެފައިވާ މިންވަރު ފާހަގަ ކުރެވުނެވެ. މިއީ މުޖުތަމައު އަށް ބޭނުންތެރި ގިނަބައެއްގެ ދިރިއުޅުމަށް ހެޔޮ ބަދަލުތަކެއް ގެނެސްދޭނެފަދަ ހިދުމަތެއްކަން ޔަޤީނެވެ.  
ޕިކޮމާއިން އިއުލާން ކޮށްފައިވާ ޑިއުޑްރޮޕް ލީޑަރޝިޕް ޔޫތް ކޯޗް ޚާއްސަވެގެންދަނީ 17 އަހަރާއި 21 އަހަރުގެ ޒުވާނުންނަށެވެ. މިއީ އޮންލައިންކޮށް ކިޔަވައިދެވޭނެ ކޮންމެ އަތޮޅަކުން 2 ޒުވާނުންނަށް ފުރުސަތު ހުޅުވާލެވިފައިވާ ޕްރޮގްރާމެކެވެ. އަދި ޑިއުޑްރޮޕް ލީޑަރޝިޕް ޓީން ކޯޗް ޚާއްސަ ވަނީ މާލޭގައި ސްކޫލްތަކުގައި ކިޔަވާ 13 އަހަރާއި 17 އަހަރާއި ދޭތެރޭގެ ކުދިންނަށެވެ. ފުރަތަމަ ބެޗްގައި މާލެގައި ހިންގާ ކޮންމެ ސްކޫލަކަށް ދެފުރުސަތު ހުޅުވިފައިވެއެވެ. މިއީ ޕިޒިކަލްކޮށް ކްލާސްތަކަށް ޙާޒިރުވެގެން ދަރިވަރުން ކިޔަވާނެ ޕްރޮގްރާމެކެވެ. ދެ ޕްރޮގްރާމްގައިވެސް ބައިވެރިވުމަށް ބޭނުންވާ ކުދިންނަށް އެޕްލިކޭޝަން ލިންކް ޕިކޮމާގެ ފޭސްބުކް https://www.facebook.com/pcomamaldives  އަދި އިންސްޓަރގްރާމް ޕޭޖް  
https://www.instagram.com/pcomamaldives އިން ލިބިވަޑައިގެންނަވާނެއެވެ. އިތުރު މައުލޫމާތު ހޯއްދެވުމަށް 7943031 އަށް ވަޓްސްއަޕް އިން މެސެޖް ކޮށްލައްވާށެވެ.