ވިލުފުށީގައި ޖަމުއިއްޔާއަކުން އިސްނަގައިގެން އެރަށުގެ ޢުމަރުފާރޫޤު މިސްކިތުގެ އަންހެނުން ނަމާދުކުރާބައި އޭސީ ކޮށްފިއެވެ.

މި މަސައްކަތަކީ އެރަަށު ކައުންސިލުގެ އެދުމުގެ މަތިން އެރަށުގައި އަލަށް ރަޖިސްޓްރީކޮށްފައިވާ ޖަމުއިއްޔާއެއްކަމުގައިވާ “ހެޔޮބަސް ޖަމުއިއްޔާ” އާއި ވިލުފުށީ ކައުންސިލް އަދި ހެޔޮއެދޭ ގިނަފަރާތްތަކެއްގެ އެހީތެރިކަމާއެކު ކުރެވުނު މަސައްކަތެކެވެ. 

މިމަސައްކަތަކީ ކުރިއަށްއޮތް ރަމަޟާން މަހަށް ތައްޔާރުވުމުގެ ގޮތުންނާއި، އެމިސްކިތުގެ އަންހެނުން ނަމާދުކުރާބައި މާބޮޑަށް ހޫނުވާތީ އެރަށުކައުންސިލްގެ އެދުމުގެމަތިން އެޖަމުއިއްޔާއިން އެރަށުގައި ހިންގި މަޝްރޫއެކެވެ. 
އެރަށު ކައުންސިލުގެ ރައީސް ވިދާޅުވިގޮތުގައި ހެޔޮބަސް ޖަމްއިއްޔާ އަކީ ވިލުފުށީގައި އިސްލާމީ ޢަޤީދާ ވަރުގަދަކުރުމަށް ގިނަގުނަ މަސައްކަތްތަކެއް ކުރަމުންއަންނަ ޖަމާއަތެކެވެ. އެގޮތުން، އެރަށުގައި ދީނީހޭލުންތެރިކަން އިތުރުކުރުމަށް ރަށުގެ މުއައްސަސާތަކާގުޅިގެން ގިނަމަސައްކަތްތަކެއް ކުރަމުންދެއެވެ. އަދި ކޮންމެ އަހަރަކު ރަށުގެ ރައްޔިތަކަށް ޢުމްރާ ދަތުރެއްވެސް އެޖަމުއިއްޔާއިން ހަދިޔާކޮށްދެއްވާކަމަށް ވިދާޅުވިއެވެ.

މި މިސްކިތަކީ ނަލަހިޔާ ޓްރޭޑިންގ ޕްރައިވެޓް ލިމިޓެޑްގެ ޗެއަރމަން، އިބްރާހީމް ވަހީދުގެ ބައްޕާފުޅުގެ ހަނދާނުގައި އެބޭފުޅާ ޢިމާރާތްކުރައްވާފައިވާ މިސްކިތެއްކަމަށް ވިލުފުށީ ކައުންސިލުގެ ރައީސް ހުސެއިން ޖަބީން ވިދާޅުވިއެވެ. އަދި މައުލޫމާތު ލިބިފައިވާގޮތުގައި މި މިސްކިތަކީ ދިވެހިރާއްޖޭގެ 3 ވަނައަށް އެންމެބޮޑު މިސްކިތެވެ.

ހެޔޮބަސް ޖަމްއިއްޔާގެ ރައީސް އަހުމަދު ނާފިއު ވަނީ ތީރު މީޑިއާ އަށް ދެއްވި އިންޓަވިއުއެއްގައި އެ ޖަމްއިއްޔާ އަކީ ވިލުފުށީގެ އިޖުތިމާއީ އެކި ކަންކަމުގައި އަބަދުވެސް އިސްނަގައިގެން އެހީތެރިވާ ޖަމްއިއްޔާއެއްކަން ފާހަގަކޮށްފައެވެ. އަދި އެ މިސްކިތުގެ އާބާތުރަ ފިލުވުމުގެ ގޮތުން ދެ ފަހަރެއްގެ މަތީން ލައިޓާއި، ފަންކާ ބަދަލުކޮށް ދޮރުތަކުގައި ވަރުނީސް ލާފައިވާ ކަމަށް ވެސް ވިދާޅުވިއެވެ.

"ވިލުފުށި ދެކެ ލޯބިވާ ވިލުފުށީ ކުދިންގެ މަސައްކަތް މިއީ. އެކުދިންގެ އަތުން ޗަންދާ ނަގައިގެން ޖަމްއިއްޔާ އަށް ހޭދަކުރަމުން އަންނަނީ،" ނާފިއު ވިދާޅުވިއެވެ.

އެރަށުގެ ކައުންސިލް ރައީސް ޖަބީންގެ ފަރާތުން ލިބިވަޑައިގަންނަވާ އެހީތެރިކަން ވެސް ނާފިއު ވަނީ ފާހަގަކުރައްވާފައެވެ.

އިންޓަވިއު ނިންމާލަމުން ނާފިއު ވަނީ ކުރިއަށް އޮތް ތާނގާވެސް އެ ޖަމްއިއްޔާގެ މާލީ ތަނަވަސްކަން ހުރި މިންވަރަކުން ރަށުގެ ތަރައްގީ އާއި ކުރިއެރުމަށް މަސައްކަތްކުރަމުން ދާނެ ކަމަށް ވިދާޅުވެފައެވެ.

މީގެއިތުރުން، ތީރު މީޑިއާ އަށް މައުލޫމާތު ލިބިފައިވާ ގޮތުގައި ކައުންސިލާއި ގުޅިގެން މިސްކިތަށް އެއާކޯން ހަދިޔާކޮށް، ހަރުކުރުމުގައި ހެޔޮބަސް ޖަމްއިއްޔާގެ ރައީސް ނާފިއު ވެސް އަމަލީގޮތުން ބައިވެރިވެ ވަޑައިގަންނަވާފައިވެއެވެ. އަދި މި މަސައްކަތުގައި ކައުންސިލްގެ ރައީސް ޖަބީން ވެސް ބައިވެރިވެ ވަޑައިގެންނެވިއެވެ.