އިސްރާއީލުން ފަލަސްޠީނަށް ދެމުންދާ އަނިޔާވެރި ހަމަލާތަކަކީ މުޅި ދުނިޔޭގެ ސަމާލުކަން ލިބެންޖެހޭ މައްސަލައެކެވެ. ނަމަވެސް، މިއަދު މި މައްސަލައަށް ލިބެންޖެހޭ ސަމާލުކަން ނުލިބި، ގިނަ ބަޔަކު މިކަން ހަނދާން ނައްތާލައިފިއެވެ. ޚާއްޞަކޮށް މީޑިޔާގެ ސަމާލުކަން ފަލަސްޠީނުގެ މައްސަލައިން ދުރަށް ގެންގޮސް، އެހެން މައްސަލަތަކަށް އަމާޒުކޮށްފައިވާކަން މިއަދު އެބަ ފާހަގަކުރެވެއެވެ.

ފަލަސްޠީނުގެ މައްސަލައަކީ އަޅުގަނޑުމެން ދިވެހިންނާވެސް ގުޅުންހުރި މައްސަލައެކެވެ. އިސްލާމީ އުއްމަތުގެ ބައެއްގެ ހައިސިއްޔަތުން، އަޅުގަނޑުމެންގެ އަޚުންނާއި އުޚުތުންނަށް ދިމާވާ ދަތިތަކާމެދު ކަންބޮޑުވެ، އެކަމަށް އަޑުއުފުލަންޖެހެއެވެ. ނަމަވެސް، ފަހަކަށްއައިސް ދިވެހިންގެ ތެރޭގައިވެސް މިކަމާމެދު ހޭލުންތެރިކަން ދަށްވެ، އަޅާލުން ކުޑަވެފައިވާކަން ފާހަގަކުރެވެއެވެ.

އަޅުގަނޑުމެން އިވި ފެނި ހާމަވަމުން މިދާ ޙަޤީޤަތަކީ، އިސްރާއީލުން ފަލަސްޠީނަށް ދޭ ހަމަލާތަކަށް އެއްވެސް މަޑުޖެހުމެއް ނާންނަކަމެވެ. މިކަމުގެ ސަބަބުން ކުޑަކުދިންނާއި އަންހެނުންނާއި މުސްކުޅިން ހިމެނޭހެން އެތައް މައުސޫމު ފުރާނައެއް ގެއްލެމުންދާއިރު، ދުނިޔޭގެ ބާރުވެރި ޤައުމުތަކުން މިކަމާމެދު އެކަށީގެންވާ ފިޔަވަޅުތަކެއް ނާޅައެވެ. އިއްޔެ އެކޭ އެއްވަރަށް މިއަދުވެސް އެތައް ބޮމެއް އަޅާ އެބަ ގޮއްވައެވެ. އެތައް ބަޔަކު ޝަހީދުކޮށް އަނިޔާވެރި ޒަހަމްތަކުން އެތައް ބައެއްގެ ދިރިއުޅުން ބަރުބާދުކޮށްލައެވެ. އިމާރާތްތަކާއި ގެދޮރުތައް ތަޅާ ސުންނާފަތި ކުރެއެވެ. ދިރިތިއްބާ އަލިފާން ޖަހާ އަންދައެވެ. ޔަހޫދީ އިސްރާއީލުންގެ ނުބައި ނުލަފާ ކަމާއެވެ!

މިކަންކަން މިހެން މިއަދުވެސް ތަކުރާރުވެ ހިނގާއިރު، ސޯޝަލް މީޑިޔާގައިވެސް މިއަދު މިކަމުގެ ސަމާލުކަން ކުޑަވެއްޖެއެވެ! ފޫހި ވީ ބާވައެވެ! ހަނދުމަ ނެތުނީ ބާވައެވެ! ނުވަތަ އަޅާނުލަނީ ބާއެވެ! ހެޔޮވާނީ ކިހިނެއް ހެއްޔެވެ؟

އަޅުގަނޑުމެން ދިވެހިންގެ ޒިންމާއަކީ މިކަމާމެދު ހޭލުންތެރިވެ، ފަލަސްޠީނުގެ މައްސަލައަށް އަލުން ސަމާލުކަން ގެނައުމެވެ. އަޅުގަނޑުމެންގެ ސަރުކާރުން މިކަމާމެދު ބަސްބުނެ، ބައިނަލްއަޤްވާމީ މުޖުތަމަޢުގައި ފަލަސްޠީނުގެ ޙައްޤުގައި ވަކާލާތުކުރަންޖެހެއެވެ. އެ ނުބައި ޔަހޫދީ ޤާތިލުން، މި ފަސްގަނޑަށް އެރުން މަނާ ކުރަން ޖެހޭނެއެވެ! އަދި އަމިއްލަ ފަރުދުންގެ ހައިސިއްޔަތުން، އަޅުގަނޑުމެންނަށް ކުރެވެން އޮތް ކޮންމެ ކަމެއް ކުރަންޖެހެއެވެ. އެއީ ދުޢާކުރުމުން ފެށިގެން، ހޭލުންތެރިކަން އިތުރުކުރުމާއި، އެހީތެރިކަން ފޯރުކޮށްދިނުމާ ހަމައަށެވެ.

ފަލަސްޠީނުގެ މައްސަލައަކީ އަޅުގަނޑުމެން ހަނދާން ނައްތާލައިގެން ނުވާނެ މައްސަލައެކެވެ. އިސްރާއީލުގެ އަނިޔާވެރިކަމަށް ނިމުމެއް ގެނައުމަށްޓަކައި، އަޅުގަނޑުމެން އެންމެން ގުޅިގެން މަސައްކަތްކުރަންޖެހެއެވެ. ﷲ ސުބުޙާނަހޫ ވަތަޢާލާ އަޅުގަނޑުމެންނަށް މިކަމުގައި ހެޔޮ ތައުފީޤު ދެއްވާށިއެވެ. އާމީން.