ޖެންޑަރ މިނިސްޓްރީން ހުޅުމާލޭގައި ޤާއިމުކޮށްފައިވާ ކުޑަކުދިންގެ ހިޔާ "ފިޔަވަތި" ގެ ދަރިވަރުންނަށް ކ.ހުރާގައި ހިންގަމުންދާ ކޭމްޕްގައި އެމްއެންޑީއެފް މާލެ އޭރިއާ ކޮމާންޑުން ކުލާސްތަކެއް ކުރިއަށް ގެންގޮސްފިއެވެ.
މިގޮތުން އެ ކޭމްޕުގައި އެމްއެންޑީއެފް މާލޭ އޭރިއާއިން ވަނީ، އަލިފާނުގެ ހާދިސާތަކުން ރައްކާތެރިވުމަށް ހޭލުންތެރި ކުރުވުމުގެ ގޮތުން "ފަޔަރ އެވެއަރނަސް" ކުލާހަކާއި، "ފަސްޓް އެއިޑް އެވެއަރނަސް" ކުލާހެއްގެ އިތުރުން، ސްވިމިންގ ޕްރޮގްރާމެއް ހިންގާފައެވެ.
އިއްޔެ ހެނދުނު 08:30 އިން ހަވީރު 15:30 އަށް ހިންގި މި ކުލާސްތަކުގައި "ފިޔަވަތި" ގެ 32 ފިރިހެން ކުދިންނާއި 20 އަންހެން ކުދިންނާއެކު ޖުމްލަ 52 ކުދިން ބައިވެރިވިއެވެ.
މި ކުލާސްތަކުގައި ކިޔަވާދީފައިވަނީ އެ ދާއިރާތަކުން ތައުލީމާއި ތަމްރީނު ހޯދާފައިވާ އެމްއެންޑީއެފް މާލެ އޭރިއާ ކޮމާންޑްގެ ސިފައިންނެވެ.
ކުޑަކުދިންގެ ހިޔާ "ފިޔަވަތި" ގެ އެދިލެއްވުމުގެ މަތިން ހިންގި މި ކުލާސްތައް ކުރިއަށްދިޔައިރު އެ ކުދިންގެ ސަލާމަތާއި ރައްކާތެރިކަން ބެލެހެއްޓުމުގައި ކުޑަކުދިންގެ ހިޔާގައި މަސައްކަތް ކުރައްވާ މުވައްޒަފުންނާއި، އެމްއެންޑީއެފް މާލެ އޭރިއާ ކޮމާންޑްގެ ސިފައިން ވަނީ ހަރަކާތްތެރިވެފައެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން