އެޕަލްއިން އައިފޯންގެ ކުރީގެ ތިން މޮޑެލްއެއް ރަސްމީކޮށް ވިއްކުން ހުއްޓާލައިފި

އެޕަލްއިން މިހަފްތާގައި ބޭއްވި އެ ކުންފުނީގެ "އިޓްސް ގްލޯޓައިމް" އިވެންޓްގައި އައު ހަތަރު އައިފޯން މޮޑެލްއެއް ވަނީ ތަޢާރަފްކޮށްފައެވެ. މިއާއެކު، އާދައިގެމަތީން ކަން ކުރަމުންއައިސްފައިވާ ގޮތަށް އައު އައިފޯންތައް އިޢުލާނުކުރުމަށްފަހު، އެޕަލްއިން ވަނީ ކުރީގެ އައިފޯންތަކެއް މާކެޓުން ނެގުމަށް ނިންމާފައެވެ.

މިދިޔަ ހޯމަ ދުވަހު، އެޕަލްއިން އައިފޯން 16، އައިފޯން 16 ޕްލަސް، އައިފޯން 16 ޕްރޯ އަދި އައިފޯން 16 ޕްރޯ މެކްސް ތަޢާރަފުކުރިއެވެ. 

މިއީ މިހާރު މާކެޓުގައި ހުރި އައިފޯން 14، އައިފޯން 14 ޕްލަސް، އައިފޯން 15، އައިފޯން 15 ޕްލަސް އަދި ތިންވަނަ ޖީލުގެ އައިފޯން އެސްއީ އަށް އިތުރުކުރެވުނު މޮޑެލްތަކެކެވެ. އެއަށްފަހު، އެންމެ ފަހުގެ އައިފޯންތަކަށް ޖާގަ ހޯދުމަށްޓަކައި، އެޕަލްއިން އައިފޯން 13، އައިފޯން 15 ޕްރޯ އަދި އައިފޯން 15 ޕްރޯ މެކްސް ރަސްމީކޮށް ވިއްކުން ވަނީ ހުއްޓާލާފައެވެ.

މާކެޓުން ނެގުމަށް ނިންމާފައިވާ އައިފޯން މޮޑެލްތައް ތާޑްޕާޓީ ވިޔަފާރިތަކުގައި އަދިވެސް ކޮންމެވެސް މުއްދަތަކަށް ލިބެން ހުންނާނެއެވެ. ބައެއް ހާލަތްތަކުގައި، މި މޮޑެލްތައް ބޮޑެތި ޑިސްކައުންޓްތަކާއެކު ވިއްކަން ހުރެދާނެއެވެ. 

އެޕަލްއިން މި ފޯނުތައް ވިއްކުން ހުއްޓާލި ނަމަވެސް، މި ފޯނުތަކަށް އައިއޯއެސް އަދި ސެކިއުރިޓީ އަޕްޑޭޓްތައް ދިގު މުއްދަތަކަށް ލިބެމުންދާނެއެވެ. މިސާލަކަށް، އެޕަލްއިން ނެރުމަށް ތައްޔާރުވަމުންދާ އައިއޯއެސް 18 އަޕްޑޭޓް 2018 ވަނަ އަހަރުގެ މޮޑެލްތަކަށް ވެސް ސަޕޯޓްކުރާނެއެވެ. މީގެ ތެރޭގައި އައިފޯން އެކްސްއެސް، އައިފޯން އެކްސްއެސް މެކްސް އަދި އައިފޯން އެކްސްއާރް ހިމެނެއެވެ.

ކުރީގެ ފޯނެއް ގަތުމުގެ ކުރިން، އެޕަލް އިންޓެލިޖެންސް ސަޕޯޓްކުރާނީ ހަމައެކަނި އައިފޯން 16 ސީރީޒް އަދި އައިފޯން 15 ޕްރޯ އާއި އައިފޯން 15 ޕްރޯ މެކްސްގައި ކަން ފާހަގަކޮށްލުން މުހިންމެވެ. މި ފީޗަރ އެހެން އެއްވެސް ކުރީގެ އައިފޯން މޮޑެލެއްގައި މަސައްކަތެއް ނުކުރާނެއެވެ. އައިފޯން 16 ޕްރޯ އަދި އައިފޯން 16 ޕްރޯ މެކްސް ތަފާތުވަނީ އެހެން ފޯންތަކަށްވުރެ ބޮޑު ސްކްރީނެއް އޮތުމުންނެވެ.

އައިފޯން 16 ސީރީޒް ވިއްކަން ފަށާފައިވަނީ ސެޕްޓެންބަރު މަހުގެ 13 ވީ ހުކުރު ދުވަހުއެވެ. އަދި، އެންމެ ފުރަތަމަ އޯޑަރުތައް ފޮނުވަން ފަށާނީ އޭގެ އެއް ހަފްތާ ފަހުން މި މަހުގެ 20 ވަނަ ދުވަހުން ފެށިގެންނެވެ. މި ފޯނުތަކުގައި އެތައް އައު ފީޗަރތަކެއް ހިމެނެއެވެ. މިފަހަރު އެޕަލް އިން ތަޢާރަފްކުރި ފަހުގެ ފޯންތަކުގައި ހިމެނޭ އައު ފީޗާސްތަކުގެ ތެރޭގައި އައު ޗިޕްތައް، އައު ކެމެރާ ކޮންޓްރޯލް ފީޗަރއެއް، އައު ކުލަތައް، އަދި އިތުރު ކަންތައްތައް ހިމެނެއެވެ. އައިފޯން 16 ސީރީޒްގެ މި ހަތަރު މޮޑެލްއަކަށްވެސް ކެމެރާއަށް ވަނީ އިތުރު ކުރިއެރުންތައް ގެނެސްފައެވެ.

އައު އައިފޯންތަކުގެ އިތުރުން، އެޕަލްއިން ވަނީ އެޕަލް ވޮޗް ސީރީޒް 10، އެއަރޕޮޑްސް 4، އަދި އެޕަލް އަލްޓްރާ 2، އެއަރޕޮޑްސް މެކްސް، އަދި އެއަރޕޮޑްސް ޕްރޯ 2 އަށް ކޮންމެވެސް ވަރަކަށް ކުރިއެރުންތައް ގެނެސްފައެވެ.