ރުއްރުކަކީ އޭގެ ބާވަތްތައް ގުނާ އަދަދު ނުކުރެވޭހާ ގިނަ ބާވަތެކެވެ. މީގެ ތެރެއިން ގިނަ ރުއްރުކަކީ ބޯ ޖަންގަލިތަކުގައި ރަސްކަންކުރާ ރުއްރުކެވެ. ބައެއްރުއްރުކަކީ އިންސާނުންގެ ދިރިއުޅުމުގެ މާހައުލުގައިވެސް ރަނިކަން ކުރަމުންއަންނަ ރުއްރުކެވެ. ކަންމިހެން ހުރިކަމުގައިވީނަމަވެސް، ވަލުގައި ހެދިފައިހުންނަ ރުއްގަހުން އިންސާނުންނަށް އެތަށް މަންފާއެއް ލިބެއެވެ. ދިވެހިރުކަކީ މިކަމުގެ ލާމަސީލު މިސާލެކެވެ.

ވަލުގައި ހެދިފައި ހުންނަ ރުއްގަހުގެ ނަފާ ދިވެހިން ހޯދައި އުޅެނީ ޙިކުމަތުގެ ބޭނުން ކޮށްގެން، ރިވެތި ތަރުތީބަކުންނެވެ. އަދާއި މާދަމައަށް ވިސްނަައިގެންނެވެ. "ހަލާދަނޑީގެ ދެކޮޅު" ބަލައިގެންނެވެ. ދިވެހި ވަލުތަކަކީ އެތަންތަނުގައި ހިސާބަކަށް ދިވެހިރުއް ހެދިފައި ހުންނަ ތަންތަނެވެ. މިއިން ކޮންމެ ރުކަކީ އެއިން އެތަކެއް މަސައްކަތްތަކެއް އިންސާނާއަށް ދަސްކޮއްދޭ ރުކެކެވެ. ދިވެހީންނާއި ދިވެހި ވެށީގެ ކުރިމަގު ކުރަހާ ތަމްސީލު ކުރުމުގައި މިރުއްތަކުގެ ދައުރު ވަރަށްވެސް ބޮޑެވެ.

ރުކުފަނަކީ އެއިން އެތަކެއް ބޭނުންތަކެއް ކުރެވެމުން އަންނަ އެއްޗެކެވެ. ޒަމާނަށް އައި ބަދަލާއެކު، މިޒަމާނުގައި ރުކުފަނުން ކުރެވޭ މައިގަނޑު މަސައްކަތަކީ ފަންގި ވިނުމެވެ. އިހުދިވެހީންގެ ދިރިއުޅުމުގައި، ގެދޮރު ބިނާކުރުމުގައިވެސް ބޭނުންކޮށް އުޅުނީ ރުކުފަނެވެ. ވަށި، މުޅޯށި ފަދަ ތަކެއްޗަކީވެސް ހަމަ ރުކުފަނުން ދިވެހިން އުފައްދައި އުޅުނު ތަކެއްޗެވެ. މިފަދަ ގުދުރަތީ ވަސީލަތްތައް، ދެމެހެއްޓެނިވި ގޮތެއްގައި ދިވެހިންގެ މަސައްކަތުގެ މާހައުލުން ފެނުމަކީ، ދިވެހިންގެ މުސްތަގުބަލު ފަހިކޮށް ކުރަހާ ދައްކާ ކަމެކެވެ.

ދިވެހިރުކުގެ މޭވާ ކަމަށްވާ ކުރުނބާއަކީ ދިވެހީންގެ ހާއްސަ ބުއިމެކެވެ. ސިއްޙަތަށް އެހާމެ ފައިދާ ކުރަނިވި ބުއިމެކެވެ. ދިވެހި ރުއް ދިވެހީންގެ ކުރިމަގާއި ގުޅެނީ، މިދެންނެވި މޭވާ، އެ މޭވާގެ ހަޔާތުގެ ކޮންމެ މަރުހަލާއެއްގައިމެ ބޭނުން ކުރެވޭތީއެވެ. އެއީ ގޮބޮޅިއެއް، މިރިއެއް، ކިހަވަކެއް، ކުރުނބަލެއް، ކާއްޓެއް، ގަބުޅިއެއް، ކުރޮޅިއެއް ނުވަތަ މުޑިކާއްޓެއް ކަމުގައި ވީނަމަވެސް މެއެވެ. އަދި ކިއެއްތަ، އެއީ ހުއްސެއް ކަމުގައި ވީނަމަވެސް، އޭގެ ބޭނުންވެސް ދިވެހިން ކޮށް އުޅުނީ އިސްރާފަށް ތަން ނުދީއެވެ. ކާށި ހުންޏަކީ ދިވެހީންގެ ކެއުމުގައި ބޭނުން ކުރެވޭ ވަރަށް އަސާސީ އެއްޗެކެވެ. ހަމަ އެބީދައިން ކުރޮޅިއަކީ ވެސް ދިވެހި ހަވާދު ހެދުމަށް ދިވެހީން ބޭނުން ކުރާ އެއްޗެކެވެ. ދިވެހިންގެ ކެއުމާއި ދިވެހި ރުކާއި ވަނީ ގުޅި ލާމެހިފައެވެ. ދިވެހިންގެ މުސްތަގުބަލާއި ދިވެހިރުކަކީ ވަކި ނުކުރެވޭނެ ދެއެއްޗެކެވެ.

ރުކުގެ އެތަކީ، ޒާތަކަށް ކޮށާ މަށައިގެން، އެއިން ރުކުރާ ނަގާ އެއްޗެކެވެ. އާދެ! ރާވެރިކަމުގެ މަސައްކަތެވެ. ކަމުގައި ފަނުންވެރިކަން އިންތިހާއަށް ހުރި، މި މަސައްކަތަކީ ދިވެހި ވަލުތަކުގައި ހެދިފައި ހުންނަ ރުއްތަކުގެ ކުރިގަނޑުތެރޭގައި ހުރެ ކުރާ ބުރަ މަސައްކަތެކެވެ. މާތުރަ، އެކަމުގެ ނަތީޖާ ފޮނި މީރު މަސައްކަތެކެވެ. ހަމަ އެއާއި އެކު މިއީ އެކަމުން އެއްވެސް އެހެން އިންސާނަކަށް ނުވަތަ ޖަނަވާރަކަށް ނުވަތަ އެނޫންވެސް ސުއިއްޕަކަށް ގެއްލުމެއް ނުވަތަ ތުރާލެއް ދެނިވި ކަމެއް ނޫނެވެ. ދިވެހި ވެއްޓާއި ދިވެހީންގެ މުސްތަގުބަލު އުޖާލާ ކޮށްދެނީ މިސަބަބައްޓަކައެވެ.

ދިވެހި ވަލުތަކުގައި ހެދިފައިހުންނަ ރުއްރުކަކީ އޭގެ ސަބަބުން ދިވެހިންގެ ނަސްލު ދެމި އޮތް އެއް ސަބަބުކަމުގައި ދެންނެވުމަކީ ކުށަކަށް ނުވާނެއެވެ. ދިވެހިންގެ ކެއިން ބުއިމާއި ރުއްރުކާއި ވަނީ ގުޅި ލާމެހިފައެވެ. އެމުނި އެކުލެވިފައެވެ. ރުއްރުކުން ކާނާ ހޯދާނޭ ތަފާތުގޮތްތަށް ދިވެހިންވަނީ ދަސްކޮށްފައެވެ. ހަމައެއާއި އެކު ދިވެހިންނަކީ ރުކުފަނުން ފަންގި ވިނދެ އެއިން ގެދޮރު ބިނާކޮށް ގުދުރަތީ ތާސީރެއްގެ ތެރޭގައި ދިރިއުޅެމުން އައި ބައެކެވެ. ކަން މިހެން ހުރުމާއެކު، ދިވެހި ވަލުތަކުގައި ހުންނަ ރުއްގަސްތަކަކީ އެތަކެއްޗާއި ދވެހިންގެ ދިރިއުޅުމާއި ނުހަނު ގުޅިފައިވާ ތަކެއްޗެވެ. ދިވެހިންނަށް ފާގަތި މުސްތަގުބަލެއް އޮތީވެސް އެ ރުއްތަކުގެ ނަފާ އެދެވޭ ގޮތެއްގައި ހިފައިގެންނެވެ.