ވެފައިވާ ވަރުބަލިކަމާހުރެ އެނދުގައި ހަމަޖެހިލައި ފޯނު ނެގީމެވެ. އަދި ފަހަރަކު އެޕެއް ހާވަމުން ގޮސް ސްނެޕް ޗެޓް އެޕް ހުޅުވާލައި އެކި މީހުންގެ ސްނެޕްތައް ބަލަމުން ދިޔައީމެވެ. ސަހަރޯ ހީވިއެވެ. އެކަކު މާލެ ދިޔުމަށް ގެއިން ފޮށި ހިފައިގެން ނުކުތް ވަގުތުން ފެށިގެން މާލެ ގޮސް ހުންނަ ކޮޓަރިއަށް ދެވެންދެން މިއޮތީ ސްނެޕް ކޮށްފައެވެ. ދެން އެ ހުޅުވައިލެވުނީ އޭގެ އަނެއް މީހާގެ ސްނެޕެވެ. އޭނާ ބެލި ފިލްމު ފެށިގެން ނިމެންދެން އަހަރެންނަށްވެސް ބެލުނެވެ. އަނެއް މީހާ ހެނދުނު ފަޅުރަށަކަށް ދަތުރުދާން ނައްޓައިލި ވަގުތުން ފެށިގެން އެ ދަތުރު ނިމެންދެން ކުރި ހުރިހާކަމެއް މިއޮތީ ސްނެޕް ކޮށްލާފައެވެ. މިއީ މިހާރު އާދައެވެ.

ރަނގަޅެވެ. ސްނެޕް ކުރަނީ 'ފްރެންޑް ރިކުއެސްޓް' ގަބޫލު ކުރީމައެވެ. ގަބޫލު ކުރަންޖެހޭނީ ސްނެޕް އަންނާނެކަން ދަނެގެންތާއެވެ. އަދި އުނދަގޫ ބޮޑުވާނަމަ، 'އަން ފްރެންޑް' ކޮށްލުމުގެ އިޚްތިޔާރުވެސް އެބަ އޮތެއް ނޫން ހެއްޔެވެ؟ ސްނެޕް އަންނަލެއް ގިނަކަމުން ތިޔަ ބުނާ 'އަންފްރެންޑް' ކޮށްލީމާ އަދި ޖެހެނީ އެހެންތަނެއްގައެވެ. ކުރިމަތިން ދިމާވެ އަބަދު ވާހަކަ ދައްކާ މީހަކު ނުވަތަ އާއިލާ މީހަކު ނުވަތަ ގާތް ރައްޓެއްސަކު 'މާ ދުރު' ކޮށްލުމުގެ ޝަކުވާއެވެ. އޭނާއާއި ދެމެދު އޮންނަ ގުޅުން ކެނޑުނު ކަމުގެ ޝަކުވާއެވެ. ދިމާވާ ކޮންމެތާކުން ނުވަތަ މީސްމީޑިއާ އެހެން މަންސަތަކުން އެކަމުގެ ޝަކުވާގެ މެސެޖްތަކާ ކުރިމަތިލާންޖެހި އަސްލަށްވެސް ބައެއް ފަހަރު ދުރުވާތަން އާދެއެވެ.

ދެން އޮތީ 'އަން ފްރެންޑް' ނުކޮށް މަޑުމަޑުން ދުރުކޮށްލުމުގެ އުކުޅެވެ. ސްނެޕް ނުކޮށް ހުރުމާއި ކުރާ ސްނެޕްތައް ނުބެލުމެވެ. ސްނެޕް ބޭނުންކުރާ މީހުންގެ އެއް ޝަކުވާއަކީ ކުރާ ސްނެޕްތައް ނުބެލުމެވެ. އެހެން ހަދާ މީހުން 'އަންފްރެންޑް' ކޮށްލާނެކަމުގެ އިންޒާރުވެސް ދޭ މީހުންވެސް އުޅެއެވެ. 'ސްނެޕް އޮޑިޓް' ޖައްސައި 'ސްނެޕް ރައްޓެހިން' މުރާޖާ ކުރާ މީހުންވެސް އުޅެއެވެ. އެލިސްޓަށް އަރައިގެން 'އަންފްރެންޑް' ވީމާ، ކުރިން މި ދެންނެވި ހަނގުރާމައާ ކުރިމަތި ނުލައި ސަލާމަތްވީއެވެ.

ވަކި ދުވަހެއްގައި ނުވަތަ ވަކި ދުވަސްވަރެއްގައި ސްނެޕް ގިނަވެދާނެކަމަށް އިންޒާރު ދިނުމަށްފަހު، ސްނެޕް ކުރާ މީހުންވެސް އުޅެއެވެ. އެމީހުން ސްނެޕް ކުރަން ފެށުމުގެ ކުރިން އިންޒާރުގެ މެސެޖެއް ފޮނުވާލާނެއެވެ. ބަލަން ބޭނުން މީހަކު ބެލުމަށާއި، އުނދަގޫ ވާނަމަ، 'އަންފްރެންޑް' ކޮށްލުމުގެ އިޚްތިޔާރު އޮންނާނެކަން ހަނދާން ކޮށްދޭނެއެވެ.

ކަޅު ސްނެޕް ކުރުމަކީ، އަދި އެއްބަޔަކު ވަރަށް ގަޔާވެގެން ކުރާކަމެކެވެ. ހެނދުނު ހޭލަމުންވެސް، ދުވާލު ދެއިރުވެސް، ރޭގަނޑު ނިދަމުންވެސް ހަމައެކަނި ކަޅު ސްނެޕެއް ކޮށްލާ މީހުން މަދެއް ނޫނެވެ. އާންމުކޮށް އެހެން މަންސަތަކުގައި ކަޅު ފޮޓޯއެއްލުމަކީ، ހިތާމަވެރިކަން ރަމްޒުކޮށްދޭ ކަމަކަށްވީ ނަމަވެސް، ސްނެޕް ބޭނުންކުރާ މީހުން ކަޅު ސްނެޕް ކުރުމުގެ މަޤުޞަދަކީ ހަމައެކަނި 'ސްޓްރީކް' ކުރުމެވެ. އެ ޖެހުނީ އަނެއް ކަންތަކާއެވެ. 'ސްޓްރީކް' ގެއްލިއްޖެނަމަ، އެ ޖެހުނީ ބޮޑުތާނގައެވެ. ކިތަންމެ އެއްކޮށް އުޅޭ ދެމީހެއް ވިޔަސް އެބުނާ 'ސްޓްރީކެއް' ހިނގައްޖެނަމަ، ދަންވަރެއް ރޭގަނޑެއް ނުބަލައި ގުޅައިގެން، މެސެޖްކޮށްގެންވެސް 'ސްޓްރީކް' ނުގެއްލޭވަރު ކުރާ މީހުން މަދެއް ނޫނެވެ.

ދިވެހި ޒުވާނުންގެ ބޮޑު އިންސައްތައެއްވެސް މި ސްނެޕްގައި ޖެހިފައިވާއިރު، ދުވަހުގެ މުހިންމު އުސްއަލިތަކާއި ޙިއްޞާކޮށްލަން ބޭނުންވާ މުހިންމު މަންޒަރުތައް ސްނެޕް ޗެޓުން ޙިއްޞާ ކޮށްލުމަކުން މައްސަލައެއް ނެތެވެ. ބޮޑެތި ލަވަތަކާއި ފިލްމުތަކާއި ސީރީޒްތައް ސްނެޕުން ފޮނުވާލީމާ، ލޯޑު ބޮޑުވަނީ އަނެކާގެ ފޯނަށެވެ. ކާލަނީ އެ ބަލާ މީހެއްގެ މޮބައިލް ޑޭޓާ ނުވަތަ އިންޓަނެޓް އެލަވަންސްކޮޅެވެ. ބޮޑުވަނީ ފޯނުބިލާއި އިންޓަނެޓްބިލެވެ.