މި ޑިސެމްބަރ މަހު 14 ވަނަ ދުވަހު ކައިވެނިކުރި، އަންކިތާ ލޯކާންޑޭ އަށް އޭނާގެ ފިރިމީހާ ވިކީ ޖެއިންގެ ފަރާތުން ކައިވެނީގެ ހަދިޔާއަކަށް ދިވެހިރާއްޖޭގެ ރިސޯޓަކުން 50 ކްރޯޑް ރުޕީސްގެ އަގުބޮޑު ގެއެއް ދީފިއެވެ. އިންޑިޔާގެ ނޫސްތަކުން މި ޚަބަރު ކަށަވަރު ކޮށްދިން ނަމަވެސް މިއީ ކޮން ރިސޯޓެއްގެ ވިލާއެއްކަން ވަނީ ޔަގީން ނުވެއެވެ.

ހަމަ އެ ގޮތަށް އަންކިތާވެސް ވަނީ ކައިވެނީގެ ހަދިޔާއަކަށް 8 ކްރޯޑް ރުޕީސްގެ ޔޮޓެއް ވިކީއަށް ދީފައެވެ. 2018 ވަނަ އަަހަރުން ފެށިގެން ލޯބީގެ ގޮތުން ގުޅިގެން އުޅޭ މި ދެމީހުންގެ ކައިވެނީގެ ފޮޓޯތައް މިހާރު ވަނީ މީސް މީޑީޔާގައި ދައުރުވާން ފަށާފައެވެ.

މީގެ އިތުރުން ޓީވީ ޑްރާމާތަކުގެ ނަން މަޝްހޫރު ޕްރޮޑިއުސަރ އެކްތާ ކަޕޫރު ވަނީ އަންކިތާއަށް 50 ލައްކަ ރުޕީސްގެ އަގުހުރި ޖަވާހިރުގެ ގަހަނާ ސެޓެއް ހަދިޔާ ކޮށްފައެވެ. އަންކިތާއާއި އެކުގައި މަސައްކަތްކުރި މާހީ ވިޖް ވަނީ 15 ލައްކަ ރުޕީސްގެ ސަބްޔަސާޗީ ސާޅީއެއް ހަދިޔާ ކޮށްފައެވެ. މީގެއިތުރުން ރިތުވިކް ވަނީ ވިކީ އަށް އަގުބޮޑު ގަޑިއަކާއި އަންކިތާއަށް ކަރުގައި އަޅާ ފަށެއް (ޗޯކަރ) އެއް ހަދިޔާ ކޮށްފައެވެ. ޓައިގަރ ޝްރޮފްގެ ފަރާތުން މިނީ ކޫޕަރ ބްރޭންޑް ގެ ކާރެއް ހަދިޔާކޮށްފައެވެ.

ޓީވީ ސިލްސިލާތަކުން މަޝްހޫރުކަން ހޯދި އަންކިތާގެ ފިރިމީހާ ވީކީ ޖެއިން އަކީ އިންޑިޔާގެ ނަން މަޝްހޫރު ވިޔަފާރިވެރިއެކެވެ.