ހުނަރުވެރި ނެށުންތެރިޔާ ޝަކްތީ ކަޅުކުލައިގެ ހެދުމެއް ލައިގެން ނަގާފައިވާ ފޮޓޯތަކެއް ފޭސްބުކް ގައި ޕޯސްޓް ކުރަމުން ލިޔެފައިވަނީ " ބްލެކް އިޒް ދަ ނިއު ބްލެކް" އެވެ. އަދި މި ޖުމްލަ ނިމޭތަނުގައި ވަނީ  ކައުބާގެ އިމޯޖީއެއް ލާފައެވެ.

މި ޕޯސްޓް އާންމުކުރިފަހުން އެއްގަޑި އިރުގެ ތެރޭގައި 600 އަށް ވުރެ ގިނަ މީހުންވަނީ މި ޕޯސްޓަށް ކޮމެންޓްކޮށް މި އިމޯޖީ ނެގުމަށް ނަސޭހަތް ދީފައެވެ. އަނެއް ބަޔަކު ވަނީ، ބަރަހަނާ ހާލުގައި ހުރެ ނެގި ފޮޓޯތަކަކާއި އެކު އިސްލާމުންގެ އެންމެ ހުރުމަތްތެރިވެގެންވާ ބިނާގެ އިމޯޖީ ބޭނުން ކުރުމުން ނުރުހުން ފާޅުކޮށްފައެވެ. އަދި ބައެއް މީހުންވަނީ، މީސްމީޑިޔާގައި ޕޯސްޓް ކުރާއިރު މިފަދަ ކަންކަމަށް ހޭލުންތެރިވެ އިތުރަށް ފަރުވާ ތެރި ވުމަށް ގޮވާލަމުންނެވެ.

މީހުންގެ ފާޑުކިޔުން ގިނަވެ ޝަކްތީ ވަނީ ފޭސްބުކްގެ ޕޯސްޓް ރިމޫވް ކޮށްފައެވެ.