ޕްރިންސް ހެރީ ގެ އަނބިކަނބަލުން، މޭގަން އެނބުރި ބޮލީވުޑަށް އަންނަން އުޅޭކަމުގެ އަޑުތަކެއް ފެތުރިއްޖެއެވެ.

ހޮލީވުދްގެ ބައެއް ފިލްމުތަކާއި ޓީވީ ސީރިސްތަކުން ގިނަ ބައެެއްގެ މަގުބޫލުކަން ހޯއްދަވާފައިވާ މޭގަން ފިލްމީ ދާއިރާއާ ދުރަށް ޖެހިވަޑައިގަތީ ޕްރިންސް ހެރީއާ ލޯބީގެ ގޮތުން ގުޅިވަޑައިގަތުމާ އެކުގައެވެ. 

އެހެންނަމަވެސް ޕްރިންސް ހެރީ އާއި ކައިވެނި ބައްލަވައިގަތުމަށް ފަހު، ވަކިން ދިރިއުޅުމެއް އުޅެމުން ގެންދަވަމުން އަންނަ މޭގަން، އަލުން ހޮލީވުޑްގައި ހަރަކާތްތެރިވާން ބޭނުންވާ ސަބަބެއް އަދިއެއްވެސް ރިޕޯޓަކުން ހާމައެއް ނުކުރެއެވެ.

އެ ރިޕޯޓުތަކުގައި ބުނެފައިވަނީ މޭގަން ހޮލީވުޑަށް އެނބުރި އަންނަނީ ބްރެޑް ފަލްޗަކް ޕްރޮޑިއުސްކުރާ ޕްރޮޖެކްޓަކުން ކަމަށާއި މި ޕްރިޖެކްޓުން މޭގަން އަށް 30 މިލިއަން ޑޮލަރުގެ އާމްދަނީ އެއް ލިބިލައްވާނެކަމަށެވެ. އަދި މޭގަންގެ އެނބުރި އައުން ވަރަށް ވަރުގަދަ ވާނެ ކަމަށެވެ.

މޭގަން، ހޮލީވުޑަށް އެނބުރި އަންނަން އުޅޭ ކަމުގެ އަޑުތަކެއް 2020 ވަނަ އަހަރު ވެސް ވަނީ ފެތުރިފައެވެ. އޭރު ބުނެފައިވަނީ ޑިޒްނީ އާއި މާވެލް ސްޓޫޑިއޯގެ ކެމެރާގެ ފުރަގަހުގައި މޭގަން މަސައްކަތްކުރައްވަން އުޅޭ ކަމަށެވެ. ނަމަވެސް އެކަމަށް ހުރަސްތަކެއް އެޅުނީ ކޮވިޑުގެ ހާލަތެވެ.

މޭގަން ކުޅުއްވާފައިވާ ފިލްމުތަކުގެ ތެރޭގައި ހޮރިބަލް ބޮސެސް، ޑިސްފަންކްޝަނަލް ފްރެންޑްސް އަދި އެންޓި-ސޯޝަލް ހިމެނެއެވެ.

މީގެ އިތުރުން ނެޓްފްލިކްސް ސީރީޒް "ސޫޓްސް" އަކީ އާންމުންގެ ގިނަ ބަޔަކަށް ވަރަށް ކަމުދިޔަ މިހާރު ވެސް މަގުބޫލު ސީރީޒެކެވެ.