އައި ފިލްމްސްގެ ދެވަނަ ފީޗަރ ފިލްމު "ނީނާ" ގައި މަޗްހޫރު އެކްޓަރ ޖުމައްޔަލް ނިމާލް ފެންނާނެ ކަމަށް "ނީނާ" ގެ ޑައިރެކްޓަރ އިލްޔާސް ވަހީދު (އިއްލެ) ބުނެފިއެވެ.

އޭނާ މިހެން ބުނީ މި ފިލްމުގެ އެންމެފަހުގެ ތައްޔާރީތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައެވެ.

އިއްލެ ބުނީ އެ ފިލްމުގައި ޖުމައްޔަލް ގެ ހުރިހާ ޝޫޓިންގ ނިމުނުފަހުން ދިމާވި ކަމަކާއި ގުޅިގެން އަލުން ޝޫޓު ކުރުމަށް ވެސް ވިސްނި ކަމަށާއި ނަމަވެސް އެކަން އެގޮތަށް ކުރުމަކީ ނުވަތަ އެހާބޮޑު ޚަރަދެއް އަކުން ކުރުމަކީ އެންމެއެދެވޭގޮތް ކަމަށް ޕްރޮޑަކްޝަން ޓީމަށް ވެސް ނުފެނުނު ކަމަށެވެ.

"ޖުމައްޔަލުގެ ކޭސްގެ ކަންތައް ފެންމަތިވީ އޭނާގެ ބައި ޝޫޓުކޮށް ނިމި، މާލެ އައިފަހުން. ދެން އަލުން ޝޫޓު ކުރަން ވެސް ވިސްނިން. އެކަމަކު އެއީ ވަރަށްބޮޑު ޚަރަދެއް. އެހެންވެ، ޕްރޮޑަކްޝަން ޓީމުން ނިންމީ، ޖުމައްޔަލްގެ ބައިން ކެނޑެން އޮތް ވަރަކަށް ކެނޑުމަށްފަހު، ފިލްމައިގެން ކުރިއަށްދާން." އިއްލެ ބުންޏެވެ.

"ޖުމައްޔަލުގެ ވަރަށްގިނަ ސީންތައް ކަނޑާފަ ހުންނާނީ، އެކަމަކު ފިލްމަށް މާބޮޑު އަސަރެއް ނުކުރާނެ. އެހެންނަމަވެސް ބެލުންތެރިންނަށް ފާހަގަވާނެ ކަނޑާފަ ހުރިކަން،"

އޭނާ ބުނީ "ނީނާ" ގައި ޖުމައްޔަލް އުޅޭނެ ކަމަށާއި އެ ޔަގީންކަން ބެލުންތެރިންނަށް ދޭ ކަމަށެވެ. އަދި އޭގެ ސަބަބުން ފިލްމަށް މާބޮޑު "ލޮޅުމެއް" ނާންނާނެ ކަމަށް ވެސް ބުންޏެވެ.

ގާތްގަނޑަކަށް 6 ލައްކަ ރުފިޔާގެ ބަޖެޓަކުން އުފައްދާފައިވާ މި ފިލްމު އޯގަސްޓު 6 ގައި އޮލިމްޕަސް ސިނަމާގައި އެޅުވުމަށް މިހާރުވަނީ ނިންމާފައެވެ.

"ނީނާ" ގެ 30 ޝޯވ ދެއްކުމަށް ހަމަޖެހިފައިވީނަމަވެސް ފިލްމުގެ ޓިކެޓް ވިއްކަން ފަށާނެ ދުވަހެއް އަދި ހާމައެއް ނުކުރެއެވެ.

"ނީނާ" ގެ ޑައިރެކްޓަރ އިލްޔާސް ވަހީދު (އިއްލެ).

މި ފިލްމުގެ ރަސްމީ ޕޯސްޓަރާއި ޓީޒާ ޓްރެއިލަރ، ކެރެކްޓަރ ޕޯސްޓަރު، ޕްރޮމޯޝަނަލް ލަވަ އަދި މެއިން ޓްރެއިލަރ ވަނީ ދައްކާލާފައެވެ.

މި ފިލްމުގެ މުހިންމު ބައިތައް ކުޅެފައިވާ ތަރިންގެ ތެރޭގައި އައިފިލްމްސްގެ ފުރަތަމަ ފިލްމު ބަވަތީގެ ލީޑު ރޯލުން ފެނިގެންދިޔަ ކުޅަދާނަ ބަތަލާ ނުޒުހަތު ޝުޢައިބް، އަރަމުންއަންނަ ޒުވާން ބަތަލު ޝަރަފް ޢަބްދުﷲ ހިމެނެއެވެ. އަދި ވެޓަރަންސް އެކްޓްރެސް މަރިޔަމް ރަޝީދާއާއި މަރިޔަމް ޝަކީލާ ވެސް މި ފިލްމުން ފެނިގެންދާނެއެވެ.

ހިތްވަރުގަދަ އަންހެނެއްގެ ވާހަކަތައް ދައްކައިދޭ މި ފިލްމުގައި ހިމެނޭ އިތުރު ތަރިންގެ ތެރޭގައި އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗަރ ފިލްމަކަށް އަލަށް ތަޢާރަފްވާ ޓިކްޓޮކް ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ހިމެނެއެވެ.

ދިވެހި ފިލްމު ބަވަތިން ގިނަބއެއްގެ މަގުބޫލުކަން ހޯދާފައިވާ ޑައިރެކްޓަރ އިލްޔާސް ވަހީދު (އިއްލެ) ލިޔެ ފައިވާ ވާހަކައަކަށް ހަދާފައިވާ މި ފިލްމުގެ މިއުޒިކް ހެދީ ޝަހީދު ލިގެސީ އެވެ.

މި ފިލްމުގައި ވެސް މޭކަޕް ކޮށްފައިވާނީ ރުޠުބާ އަޙްމަދު އެވެ. މި ފިލްމުގެ ލަވަތަކުގެ މިއުޒިކް ހުސައިން ތަޢުފީޤް ހަދާފައިވާއިރު، ޕްރޮމޯ ލަވައިގެ މިއުޒިކް ހެދީ މިސްޓީ އެވެ.

ކެމެރާމަން ކެމެރާމަން ވިޝާން (ކަނޑި) ކެމެރާކޮށްފައިވާ މި ފިލްމުގެ އެޑިޓިންގ އާއި ޕޯސްޓް ޕްރޮޑަކްޝަން ’އޯކޭޒް އިންކް‘ އިން ހެދިއިރު، ވިޝުއަލް ހެދީ އޯކޭޒް އިންކް ގެ ސާމީ އެވެ.