ބޮލީވުޑްގެ ސުޕަރސްޓަރ ސަލްމާން ޚާން އެންމެ އަވަހަށް ދެން ފެނިގެންދާނީ ކުރިއަށް އޮތް ނޮވެންބަރު މަހު ރިލީޒްކުރަން ހަމަޖެހިފައިވާ ފިލްމު "ޓައިގަރ 3"އިންނެވެ. ފިލްމު ރިލީޒްކުރުމުގެ އެންމެ ފަހުގެ ތައްޔާރީތައް މިހާރު ވަމުންދާއިރު، ފިލްމުގެ ޓްރެއިލަރ ވެސް މާދަމާ ބެލުންތެރިންނަށް ދޫކޮށްލަން ވަނީ ހަމަޖެހިފައެވެ. 

މިއަހަރުގެ މެދު ތެރޭގައި "ޓައިގަރ 3"ގެ ޝޫޓިންގ ނިންމާލުމަށްފަހު ސަލްމާން ދަނީ އޭނާގެ ދެން އޮތް ފިލްމަށް ތައްޔާރުވަމުންނެވެ. ދާދިފަހުން ސިދާތު މަލްހޯތުރާ ލީޑުން ފެނިގެންދިޔަ ފިލްމު "ޝޭރްޝާހް"ގެ ޑައިރެކްޓަރު ވިޝްނޫ ވަރްދަން ޑައިރެކްޓްކުރާ މި ފިލްމަށް ސަލްމާންގެ މުޅި ހަށިގަނޑު  ސެޓް ކުރަމުން ދާއިރު ފިލްމާ ބެހޭ މާގިނަ މަޢުލޫމާތެއް އިތުބާރުކުރެވޭ އެއްވެސް ފަރާތަކުން ހާމަކޮށްފައެއް ނުވެއެވެ. 

އެހެންނަމަވެސް ފިލްމުގެ މައިގަނޑު ސްޓޯރީ ބޯޑް ވަނީ ވިޝްނޫ ހާމަކޮށްފައެވެ. ރިޕޯޓުތަކުން މަޢުލޫމާތު ލިބޭ ގޮތުގައި ވިޝްނޫ ޑައިރެކްޓްކުރާ މި ފިލްމުގައި ދައްކުވައިދޭނީ 1988ވަނަ އަހަރުގެ ނޮވެންބަރު މަހުގެ 3ވަނަ ދުވަހު ދިވެހިރާއްޖެ ހިފަން އައި ޓެރަރިސްޓުންގެ ކިބައިން ދިވެހިރާއްޖެ ސަލާމަތްކުރާ މަންޒަރެވެ. އެގޮތުން ނޮވެންބަރު 3 ގެ ހަނގުރާމަ ދިވެހިރާއްޖޭގައި ފެށި، އިންޑިއާގެ ސިފައިންގެ އެހީތެރިކަމަށް ދިވެހިރާއްޖެއިން އެދުމުން އިންޑިއާ ސިފައިންގެ ތެރެއިން ދިވެހިރާއްޖެ ސަލާމަތްކުރަން އަންނަ ޓީމުގެ ލީޑަރުގެ ރޯލު ސަލްމާން ޚާން ކުޅުމަށް ވަނީ ހަމަޖެހިފައެވެ.

"އެ އޮޕަރޭޝަންގައި އިންޑިއާ ސިފައިން ވަނީ ވިޔަފާރިވެރިޔާ އަބްދުﷲ ލުޠުފީ އިސްކޮށް ހުރެގެން ދިވެހިރާއްޖޭގެ ގްރޫޕަކުން ސަރުކާރު ވައްޓާލަން ކުރި މަސައްކަތް ނާކާމިޔާބުކޮށްފަ އެވެ. މި ފިލްމުގައި ސަލްމާން މިޝަން ލީޑް ކުރާތަން ފެނިގެންދާނެ" ވިޝްނޫ ބުނެފައިވެއެވެ.

ސޯޝަލް މީޑިއާގައި ވެސް މިވާހަކަތައް ދަނީ ވަރަށް ގަދަޔަށް ދެކެވެމުންނެވެ.

ބޭރުގެ ރިޕޯޓުތަކުން މަޢުލޫމާތު ލިބޭ ގޮތުގައި މި ފިލްމަށް ތައްޔާރުވުމަށް ޚާއްޞަ ޑައިޓެއް ވެސް ސަލްމާން ޚާން މިހާރު ވަނީ ފަށައިފައެވެ. އަދި ހަމައެހެންމެ އަސްކަރީ އޮފިސަރުންނާ އެއްގޮތަށް ހަށިގަނޑު ބައްޓަން ކުރުމަށް ޚާއްޞަ ޖިމް ޓްރެއިނިން ސެޝަންތަކެއް ވެސް ފަށައިފައިވާ ކަމަށް މަޢުލޫމާތު ލިބެއެވެ.

ދަރްމާ ޕްރޮޑަކްޝަންގެ ދަށުން ގެނެސްދިނުމަށް ހަމަޖެހިފައިވާ މި ފިލްމުގެ ޝޫޓިންގތައް މިފެށޭ 2024 ވަނަ އަހަރުގެ ޖަނަވަރީ މަހު ފެށުމަށް ދަނީ ތައްޔާރުވަމުންނެވެ.