ޒޯޔާ އަޚްތަރުގެ ޓީން މިއުޒިކަލް ފިލްމު "ދަ އާޗީސް" އިން ހިންދީ ފިލްމީ ދާއިރާއަށް ހަތް ޒުވާނަކު ވަރަށް ބޮޑު ފިޔަވަޅެއް އެޅި އެވެ. އެ ފިލްމުގެ ހާއްސަ ސްކްރީނިންއެއްގައި، ރިލީޒް ކުރުމުގެ ކުރިން، ބޮލީވުޑްގެ ބައެއް ތަރިން ބައިވެރިވި އެވެ. މި ހަރަކާތުގައި ގިނަ ތަރިން ތަކެއް ވަނީ މި ފީޗާ ފިލްމުގެ ރިވިއު ދީފައެވެ.

ނެޓްފްލިކްސް އިންޑިއާގެ އޮފިޝަލް އިންސްޓަގްރާމް ޕޭޖްގައި މި ހާއްސަ ސްކްރީނިންގައި ބައިވެރިވި މެހެމާނުންގެ ފުރަތަމަ ރިއެކްޝަންތައް ހިމެނޭ ވީޑިއޯއެއް އާންމުކޮށްފައިވެ އެވެ. އޭގެ ތެރޭގައި އައިޝްވާރިޔާ ރާއީ ބައްޗަން ވެސް ހިމެނެ އެވެ. ދަ އާޗީސްއާ ބެހޭ ގޮތުން އޭނާގެ ކުރު ފޮނި ޚިޔާލު ދެއްމުން އައިޝްވާރިޔާ ބުނީ، “މުޅި ޓީމަށް އަޖައިބު ކުރުވަނިވި ފިލްމެއް އުފައްދާފައިވާތީ ވަރަށް ބޮޑު ތަހުނިޔާއެއް ކިޔަން"ކަމަށެވެ.

ފޮޓޯ: އައިއެމްޑީބީ

އައިޝްވާރިޔާގެ އިތުރުން އިތުރު ބައެއް ތަރިން ވެސް މިހަފްލާގައި ބައިވެރިވި އެވެ. އެމީހުން ސޯޝަލް މީޑިއާގައި ފިލްމާ ބެހޭ ގޮތުން އެމީހުންގެ ޚިޔާލުތައް ހިއްސާކުރި އެވެ. ދިގު ނޯޓެއްގައި ޖާންވީ ކަޕޫރު އޭނާގެ ކޮއްކޮގެ ފިލްމު ކުޅުމުގެ ހުނަރަށް ނިސްބަތްކޮށް އޭނާ ބުނީ އޭނާގެ ކޮއްކޮއަކީ ވަރަށްވެސް ހުނަރުވެރި ކުއްޖެއްކަން މި ފިލްމުން އިނގިގެން ގޮސްފިކަމަށެވެ. އޭނާ މި ފިލްމުގެ ކާސްޓުންނައް އަދި ޓީމަށް ތައުރީފު ކުރަމުން ބުނީ މި ފިލްމު މިހާ ފުރިހަމަ އަދި މޮޅު ފިލްމަކަށް ވުމުގައި ހުރިހާ އެންމެންގެވެސް މަސައްކަތް ވަރަށް ބޮޑުކަމަށާއި މިކަމަށްޓާކާއި ހުރިހާ އެންމެނަށް ތައުރީފު ހައްގު ކަމަށެވެ.

ޒުވާން ތަރިންނަށާއި ޒޯޔާ އަޚްތަރަށް ސާބަސް ދިނުމުގައި އަރްޖުން ކަޕޫރު ވެސް  ފަސްނުޖެހުނެވެ. ދިގު ޕޯސްޓެއްގައި ބުނެފައިވަނީ މިފިލްމުގެ ސަބަބުން އޭނާ އަނެއްކާވެސް 18 އަހަރުގެ ކުއްޖަކަށް ވާން ބޭނުންވި ކަމަށާއި މި ފިލްމު މިހާ މޮޅު ފިލްމަކަށް ހެދުމުގައި ހުރިހާ އެންމެންގެ އަތެއް ވާކަމަށެވެ. އެހެންކަމުން ވަކި ބަޔަކަށް ތައުރީފު ކުރުމުގެ ބަދަލުގައި އެންމެނަށް ތައުރީފް ކުރުން މުހިންމުކަމަށެވެ. 

"ދަ އާޗީސް" އަކީ އެމެރިކާގެ ކޮމިކް ފޮތުގެ އިންޑިއާގެ އެޑެޕްޓޭޝަނެކެވެ. އެ ފިލްމުގައި އަގަސްތާ ނަންދާ، ޚުޝީ ކަޕޫރު، ސުހާނާ ޚާން، ވެޑަންގް ރައިނާ، މިހިރު އަހޫޖާ، އަދީތީ ‘ޑޮޓް’ ސައިގަލް އަދި ޔޫވްރާޖް މެންޑާ އެވެ. މި ޑިސެމްބަރު މަހުގެ ހަތް ވަނަ ދުވަހު ނެޓްފްލިކްސް އިން ރިލީޒްކުރި ފިލްމަށް ކްރިޓިކްސް އާއި ސިނަމާއަށް ލޯބިކުރާ ގިނަ ބައެއްގެ ފަރާތުން މިކްސްޑް ރިވިއުތަކެއް ލިބުނެވެ.