މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި ރޭ ސްކޮޓްލެންޑާއި ދެކޮޅަށް އިންގްލެންޑް ކުޅުނު މެޗު ދެ ޓީމަށް ލަނޑެއްނުޖެހި 0-0 އިން އެއްވަރުވެގެން ނިމިއްޖެއެވެ.

މިއީ އިންގްލެންޑުގެ އަމިއްލަ ދަނޑުގައި އެންމެ ފަހުން ކުޅުނު 18 މެޗުގެ ތެރެއިން އެ ޓީމަށް މޮޅެއްނުހޯދީ ނިންމާލަންޖެހުނު ދެވަނަ މެޗެވެ. މީގެކުރީން، އެ ޓީމު މޮޅުނުވެ ނިންމާލީ މިދިޔަ އޮކްޓޫބަރު މަހު ޑެންމާކާ ދެކޮޅަށް 1-0 އިން ބަލިވި މެޗުގައެވެ. މީގެއިތުރުން، މިއީ އިންގްލެންޑް އެންމެ ފަހުން ކުޅުނު 18 މެޗުގެ ތެރެއިން ބައިކޮޅަށް ލަނޑެއްވަނަނުދީ ނިންމާލި 14 ވަނަ މެޗެވެ.

ރޭގެ ނަތީޖާއާއެކު ގްރޫޕް ޑީ ގެ އެއްވަނައިގައި އޮތް ޗެކް ރިޕަބްލިކަށް ދެ މެޗުން ހަތަރު ޕޮއިންޓް ލިބިފައިވާއިރު، އިންގްލެންޑް ދެވަނައިގައި އޮތީ ވެސް މި އަދަދަށް ޕޮއިންޓް ލިބިގެންނެވެ. މި ގްރޫޕުގެ އެއްވަނަ ކަށަވަރުވެގެންދަނީ އެންމެ ފަހު މެޗުގައި މި ދެ ޓީމު ބައްދަލުކުރާ މެޗުގެ ނަތީޖާ ނިކުންނަ ގޮތަކުންނެވެ. ތިންވަނައިގައި އޮތް ކްރޮއޭޝިއާ އާއި އެންމެ ފުލުގައި އޮތް ސްކޮޓްލެންޑަށް ލިބިފައިވަނީ އެއް ޕޮއިންޓެވެ.

ލަންޑަންގެ ވެމްބްލީ ސްޓޭޑިއަމްގައި ކުޅުނު މި މެޗުގައި އިންގްލެންޑްގެ ރަހީމް ސްޓާލިން އާއި މޭސަން މައުންޓް އަށް ލަނޑުޖަހާން ލިބުނު ފުރުޞަތުތަކުގެ ބޭނުންހިފޭގޮތްނުވިއިރު، އެ ޓީމުގެ ޑިފެންޑަރު ޖޯން ސްޓޯންސް ބޮލުން ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ. ސްކޮޓްލެންޑްގެ ސްޓެފަން އޯ ޑޮނެލް އެއްފަހަރުން ޕެނަލްޓީއޭރިޔާތެރެއިން ފޮނުވާލި ބޯޅަ އިންގްލެންޑްގެ ކީޕަރު ޖޯޑަން ޕިކްފޯޑް މަތަކުރިއެވެ.

އިންގްލެންޑުން ޑޮމިނޭޓްކޮށްގެން ކުޅުނު މި މެޗުގެ ފަހު ހާފުގައި ސްކޮޓްލެންޑްގެ ލިންޑަން ޑައިކްސް ފޮނުވާލި ބޯޅަ އިންގްލެންޑްގެ ފުލްބެކް ރީސް ޖޭމްސް ސަލާމަތްކުރީ ގޯލްގެ ރޮނގުމަތީންނެވެ. އަދި އޭގެފަހުން، އިންގްލެންޑްގެ ޑެކްލަން ރީސް ޕެނަލްޓީއޭރިޔާތެރެއިން ފޮނުވާލަން މަސައްކަތްކުރި ބޯޅަ ސްކޮޓްލެންޑްގެ ކުޅުންތެރިން ހުއްޓުވިއެވެ.

މި މުބާރާތުގައި މިއަދު ކުޅުމަށް ހަމަޖެހިފައިވާ މެޗުތަކުގެ ތެރޭގައި، ދުނިޔޭގެ ޗެމްޕިއަން ފްރާންސުން ހަންގޭރީއާ ދެކޮޅަށް ނިކުންނައިރު، އެންމެ ފަހުގެ ޔޫރޯގެ ޗެމްޕިއަން ޕޯޗުގަލް ނިކުންނާނީ ޖަރުމަނާ ދެކޮޅަށެވެ. އަދި މިރޭގެ ފަހު މެޗުގައި ސްޕެއިން ނިކުންނާނީ ޕޮލެންޑާ ދެކޮޅަށެވެ.