މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި މިރޭ ގްރޫޕް ބީގައި ފިންލެންޑްއާ ދެކޮޅަށް ޑެންމާކް ކުޅުނު މެޗުގައި އެ ޓީމުގެ މިޑްފީލްޑަރު ކްރިސްޓިއަން އެރިކްސަން ދަނޑުމައްޗަށް ވެއްޓުމުން މެޗު ހުއްޓާލައިފިއެވެ.

އުމުރުން 29 އަހަރުގެ އެރިކްސަން، ދަނޑުމައްޗަށް ވެއްޓުނީ ފުރަތަމަ ހާފުގެ ކުޅުން ނިމެން ދެ މިނެޓަށްވެފައިވަނިކޮށްނެވެ. އެންމެ ފުރަތަމަ ދަނޑުމަތީގައި އޭނާ އަށް ފަރުވާ ދިނުމަށްފަހު، މިހާރު އިތުރު ފަރުވާ އަށް ހޮސްޕިޓަލަށް ވަނީ ގެންގޮސްފައެވެ. 

އެރިކްސަން ވެއްޓުމާއެކު ޑެންމާކްގެ ކުޅުންތެރިން ތިބީ ވަށައިގެން ސަފެއްގައި އެތުރިގެން އޭނާ އަށް ފަރުވާދެމުންދާ ހިތްދަތި މަންޒަރު ބެލުންތެރިންނަށް ނުފެންނާނެގޮތަށް ހުއްޓިގެންނެވެ.

މި ހިތާމަވެރި ހާދިސާއާ ގުޅިގެން ޔުއެފާ އިން ނެރުނު ބަޔާނެއްގައިވަނީ، ސިއްހީ އެމާޖެންސީއެއްގެ ސަބަބުން ޑެންމާކާ ދެކޮޅަށް ފިންލެންޑް ކުޅުނު މެޗު ހުއްޓާލާފައިވާ ކަމަށެވެ. އެ އިދާރާ އިން ފަހުން ލިބުނު އިތުރު މައުލޫމާތުގައިވާގޮތުން އެރިކްސަންގެ ހާލު މިހާރު ރަނގަޅުވަމުން އަންނަ ކަމަށް ވެއެވެ.

ޑެންމާކުގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައިވަނީ އެރިކްސަން ހޭއަރާފައިވާ ކަމަށާއި މި ހޮސްޕިޓަލްގައި ވަގުތު އިތުރު ޓެސްޓްތައް ހެދުމުގެ ކަންކަން ކުރެވެމުން އަންނަ ކަމަށެވެ.

މެޗުގެ ކުޅުން ހުއްޓާލިއިރު ދެ ޓީމުވެސް އޮތީ 0-0 އިން އެއްވަރުވެފައެވެ.