ހެނދުނު ހޭލާއިރަށް ކިނބިހިތަކެއް އެޅުމަކީ ގިނަ މީހުންނަށް ދިމާވާ ކަމެކެވެ. ހާއްސަކޮށް ސައިނަސް ހުންނަ މީހުންނަށެވެ. ސައިނަސް ހުރުމޭ މި ބުނެވެނީ ސައިނަސްތަކުގައި އިންފެކްޝަން ހެދިފައި ހުންނަ ހުރުމަށެވެ. މިގޮތަށް ކިނބިހިއެޅުމަކީ ހަމައެކަނި ޖިސްމާނީ ވަރުބަލުކަމެއް ގެނެސްދޭ ކަމެއް ނޫނެވެ. މިކަމުގެ ސަބަބުން މިޒާޖު ސަކަރާތްވެ، ދުވަހުގެ ފެށުން ވެސް ހަލާކުވެދާނެއެވެ. އެހެންކަމުން، މިފަދަ މައްސަލައަކާ ކުރިމަތިލާން ޖެހޭ ފަރާތްތަކަށް އެހީތެރިވުމުގެ ގޮތުން، މި ލިޔުމުގައި ބައެއް ހައްލުތައް ހިއްސާކޮށްލާނަމެވެ.

ފުރަތަމަ ކަމަކަށް، ރޭގަނޑު ނިދަން އޮށޯންނައިރު ރަނގަޅަށް މޫނު ދޮވެ ސާފުކުރުމަކީ މުހިންމު ކަމެކެވެ. މޫނުގައި ހުންނަ ހަޑި އަދި ތެޔޮ ރަނގަޅަށް ސާފުނުކޮށްފިނަމަ، އޭގެ ސަބަބުން ކިނބިހި އެޅުމަށް މަގުފަހިވެދާނެއެވެ. އެހެންކަމުން، ނިދަން އޮތުމުގެ ކުރިން، ރަނގަޅަށް ސައިބޯނި ބޭނުންކޮށްގެން މޫނު ދޮވެ ސާފުކުރުމަކީ މުހިންމު ކަމެކެވެ.

ދެވަނަ ކަމަކަށް، ރަނގަޅު ކޮލިޓީގެ މޫނު ކްރީމެއް ބޭނުންކުރުމެވެ. ހަމުގެ ބާވަތާ ގުޅޭ ކްރީމެއް ބޭނުންކުރުމުން، މޫނުގެ ހަންގަނޑު ހިކި، ކުރަކިވެ އަދި ކިނބިހި އެޅުމުގެ ފުރުސަތު ކުޑަވާނެއެވެ. ޚާއްޞަކޮށް ރޭގަނޑު ނިދަން އޮށޯންނައިރު މިފަދަ ކްރީމެއް ބޭނުންކުރުމަކީ ވަރަށް މުހިންމު ކަމެކެވެ.

ތިންވަނަ ކަމަކަށް، ގަވާއިދުން އަތްތިލަ ދޮވުމަށް ސަމާލުކަން ދިނުމެވެ. އަޅުގަނޑުމެންގެ އަތްތިލައިގައި ހުންނަ ޖަރާސީމާއި ހަޑި، އަޅުގަނޑުމެންގެ މޫނުގައި ޖެހި، ނޭވާލާ ނިޒާމުގެ ތެރެއަށް ވަދެ، ކިނބިހި އެޅުމަށް މަގުފަހިވެދާނެއެވެ. އެހެންކަމުން، އަބަދުވެސް ސާފު އަތަކުން މޫނުގައި އަތްލުމަށް ސަމާލުކަން ދޭންވާނެއެވެ.

ފިނިގަދަކޮށް ނިދުމަކީވެސް ކިނބިހިއަޅަށް މެދުވެރިވެދާނެ ކަމެކެވެ. ފިނީގެ ސަބަބުން އަރުތެރެއާއި ކަރުތެރެ ހިއްކާލާނެއެވެ. ނަތީޖާއަކަށް ވާނީ ކިނބިހި އެޅެން ފެށުމެވެ. އަނެއް ކަމަކީ ނިދީގައި ނޭވައި ލެވޭ ގޮތެވެ. ބައެއް ދިރާސާތަކުން ދައްކާ ގޮތުގައި ނިދީގައި އަނގައިން ނޭވާލާނަމަ، ހިނބިހި އެޅުމުގެ ފުރުސަތު ކުޑަވެއެވެ. ނަމަވެސް ނޭފަތުން ނޭވާލެވޭނަމަ، ކިނބިހިއެޅުމުގެ ފުރުސަތު ބޮޑުވެއެވެ.

މިފަދައިން ހެނދުނާ ހޭލާއިރު، ކިނބިހި އަޅާނަމަ، ތާފަނާ ފެންފޮދަކުން މޫނު ދޮވެލުން ނުވަތަ ފެންވަރާލުން ބުއްދިވެރިއެވެ. އަދި ލަސްނުކޮށް ކޮޓަރިތެރެއިން ބޭރަށް ނުކުމެލާ ގުދުރަތީ ސާފު ވައިގެ ތެރެއަށް މީހާ ހުށަހެޅުމަކީވެސް ކުރެވިދާނެ ކަމެކެވެ. ހޫނު ސައިތައްޓެއް ނުވަތަ ކޮފީއެއްވެސް ބޯލެވިދާނެއެވެ. 

ދެން ބުނެދޭން ގަސްތުކުޅަ މި ކަމަކީ ސިއްހީގޮތުން ބުނެދިނުން އެއްމެ ރަނގަޅު ބުނުމަކަށް ނުވެދާނެއެވެ. ނަމަވެސް މިކަން ތަޖުރުބާ ކުރާ ގިނަ ފަރާތްތަކުން ބުނާ ގޮތުގައި މިގޮތަށް ކިނބިހި އަޅަން ފެށުމުން، ރަނގަޅަށް ދުފާލުމުން އެކަމަށް ލުޔެއް ލިބެއެވެ. ދުފުމުގެ ވާހަކަ މި ގެނެސްދިނީ އެކަމަށް ހިތްވަރުދީ ބާރުއެޅުމުގެ ގޮތުންނެއް ނޫނެވެ. ނަމަވެސް ބައެއްގެ ތަޖުރިބާ ހިއްސާކޮށްލުމުގެ ގޮތުންނެވެ.

ހެނދުނަށް އަޅާ މި ކިނބިހިތަކުގެ އެއް ހައްލަކީ ނިދުމެވެ. ގަވާއިދުން އެކަށީގެންވާ ވަރަށް ނިދުމެވެ. ނިދި މަދުވުމުގެ ސަބަބުން ހަށިގަނޑުގެ ހޯމޯންތަކުގެ ހަމައަށް ބަދަލު އައިސް، ކިނބިހި އެޅުމަަށް މަގުފަހިވެދާނެއެވެ. އެހެންކަމުން، ކޮންމެ ރެއަކު މަދުވެގެން 7-8 ގަޑިއިރު ނިދުމަކީ މުހިންމު ކަމެކެވެ.

ނިންމާލަމުން ދަންނަވާނީ، މަތީގައި ދެންނެވުނު ކަންތައްތަކަށް ސަމާލުކަން ދިނުމުން، ހެނދުނު ހޭލާއިރު ކިނބިހި އެެޅޭ މައްސަލަ ވަރަށް ބޮޑަށް ކުޑަވެގެން ހިނގައިދާނެއެވެ. ނަމަވެސް، މިއިން އެއްވެސް ކަމަކީ މުޖައްރިބު ފަރުބާއެއް ނޫނެވެ. އެހެންކަމަކު މިއީ ދިރާސާތަކާއި ތަޖުރިބާތަކުގެ އަލީގައި ކާމިޔާބު ކަންތައްތަކެކެވެ.

 

ހަވާލާ: ޕަބްމެޑް: ސްނީޒިން އިން ދަ އާރލީ މޯނިން އެންޑް އިޓްސް ރިލީވިން ފެކްޓާސް، 2022.