ދިރިއުޅުމުގެ ކަންކަމުގައި އުޅެމުންދާއިރު، އަޅުގަނޑުމެން ގިނަފަހަރު އަހައްމިއްޔަތުކަން ނުދޭ ވަރަށް ކަމެއް އެބައޮވެއެވެ. އެއީ ހިތްހަމަޖެހުމެވެ. މިއީ ގިނަބަޔަކު ނުދައްކާ ވާހަކައެކެވެ. ސިއްހީ އެހީތެރިންވެސް މިކަމުގެ މައްޗަށް އަލިއަޅުވާ ވާހަކަ ދައްކާލެއް މަދެވެ. ނަމަވެސް، ހިތްހަމަޖެހުމަކީ އަޅުގަނޑުމެންގެ ޖިސްމާނީ އަދި ނަފްސާނީ ދުޅަހެޔޮކަމަށް ވަރަށް މުހިއްމު ކަމެކެވެ.

އަދުގެ ދުނިޔޭގައި، ހާސްކަމާއި ނުތަނަވަސްކަމުގައި ފިކުރުބޮޑުވާ މީހުން ވަރަށް ގިނައެވެ. މިއީ ވަރަށް ކަންބޮޑުވާންޖެހޭ ކަމެކެވެ. ސަބަބަކީ މި ކަންކަމުގެ ސަބަބުން އިންސާނާގެ ޖިސްމާނީ ސިއްހަތަށް ނޭދެވޭ އަސަރުތަކެއް ކުރާތީއެވެ. މިސާލަކަށް، ހާސްކަމާއި ނުތަނަވަސްކަމުގެ ސަބަބުން ލޭ މައްޗަށް ގޮސް ހިތުގެ ބަލިތައް ގިނަވެއެވެ. މިއީ އަޅުގަނޑުމެންގެ ދިރިއުޅުމުގެ ފެންވަރަށް ސީދާ އަސަރުކުރާނެ ކަމެކެވެ. އާއްމުކޮށް ލޭމައްޗަށް ދަނީ ކެއުމުގައި ލޮނު ގިނަވުމުން ކަމަށް ޑަކްޓަރުން ބުނެއެވެ. ނަމަވެސް ހިތްހަމަޖެހުމެއް ނެތި، ފިކުރުތައް ގިނަވެ، ހާސްކަމުގައި އުޅޭ މީހުންނަކީވެސް ފަސޭހަ ކަމާއެކު ލޭމައްޗަށް ގޮސް، ލޭ ކޮންޓުރޯލު ކުރަން އުނދަގޫވާ ބައެކެވެ. ލޭގެ ޕުރެޝަރު މަތިވުމަކީ އިންސާނުންގެ ޞިއްޙަތަށް ބޮޑެތި އެތައް ގެއްލުންތަކެއް ކުރިމަތި ކުރުވާނެ ކަމެކެވެ.

އެހެންކަމުން، އަޅުގަނޑުމެން ކޮންމެ މީހަކުވެސް ހިތްހަމަޖެހުން ހޯދުމަށް މަސައްކަތްކުރަންޖެހެއެވެ. މިކަމަށްޓަކައި އަޅުގަނޑުމެންނަށް ކުރެވިދާނެ ގިނަ ކަންތައްތަކެއް އެބަހުއްޓެވެ. މިސާލަކަށް، ޤުރުއާން ކިޔެވުމާއި، ޒިކުރު ކުރުމާއި، ނަމާދުކުރުމަކީ ހިތްހަމަޖެހުން ލިބޭނެ ކަންކަމެވެ. މީގެ އިތުރުން، ދުވުމާއި، ފަތަން ދިއުމާއި، ގުދުރަތީ މާހައުލުތަކުގައި ވަގުތު ހޭދަކުރުމާއި ކަސްރަތުތައް ކުރުމަކީވެސް ހިތްހަމަޖެހުން އިތުރުކޮށްދޭނެ ކަންކަމެވެ.

ހިތްހަމަޖެހުމަކީ އަޅުގަނޑުމެންގެ ދުޅަހެޔޮ ސިއްޙަތަކަށް ކޮންމެހެން ބޭނުންވާ ކަމެކެވެ. އަޅުގަނޑުމެން އެންމެން މިކަމަށް ސަމާލުކަން ދީ، ހިތްހަމަޖެހުން ހޯދުމަށް މަސައްކަތްކުރަންޖެހެއެވެ. އޭރުން އަޅުގަނޑުމެންނަށް ދުޅަހެޔޮ، އުފާވެރި ދިރިއުޅުމެއް އުޅެވޭނެއެވެ.