ކަންފަތަށް ކަފަބުރު ކޮށްޕުމަކީ ގިނަ މީހުންގެ މެދުގައި އާއްމު އާދައެކެވެ. ކަންފަތް ހިރުވާތީ ނުވަތަ ކަންފަތުގައި ފެން ހުންނާތީ ކަފަބުރުކޮށްޕާލާ ސާފުކޮށްލާ ހަދާލުމަކީ އާދައިގެ ކަމެކެވެ. ނަމަވެސް މިއީ ވަރަށް ނުރައްކާތެރި އަދި ގެއްލުން ބޮޑު އާދައެކެވެ. މި މަޒުމޫނުގައި އަޅުގަނޑުމެން ބަލައިލާނީ މި އާދައިގެ ނުރައްކާތެރިކަމާއި، އޭގެ ސަބަބުން ލިބިދާނެ ގެއްލުންތަކާއި، އަދި މި އާދަ ދޫކޮށްލުމުގެ މުހިންމުކަމަށެވެ.

ފުރަތަމަ ކަމަކަށް، ކަންފަތަށް ކަފަބުރު ކޮށްޕުމުގެ ސަބަބުން ކަންފަތުގެ އިހުސާސްތަކަށް ބޮޑެތި ގެއްލުންތަކެއް ލިބިދާނެއެވެ. ކަންފަތުގެ ތެރޭގައި ހުންނަ ނާޒުކު ހަތާތަކަށް ގެއްލުން ލިބި، އަޑުއިވުމުގެ ޤާބިލުކަން ކުޑަވެދާނެއެވެ. ނަމަވެސް މިކަން ދިމައިވަނީ ގިނައިން އާދަވެ ކަފަބުރު ކޮށްޕާނަމައެވެ. އަދި ކޮއްޕާއިރު މާ އެތެރެއަށް ކޮއްޕާނަމައެވެ. މެދު ކަންފަތޭ މި ކިޔާ ހިސާބު ނިމޭ ހިސާބަށް ނުވަތަ ކަންފަތުގެ ތޫރީގެ ކައިރިއަށް ކޮއްޕާނަމައެވެ. 

މީގެ އިތުރުން، ކަންފަތުގެ ތެރެއަށް ގިނައިން ކަފަބުރު ކޮއްޕާނަމަ، އެކި ބާވަތުގެ އިންފެކްޝަންތައް ވަދެ، ކަންފަތުގެ ސިއްހަތަށް ނޭދެވޭ އަސަރުތަކެއް ކޮށްފާނެއެވެ. އެހެނީ ބޭރު ކަންފަތުގައި ހޭކިފައި ހުންނަ ހިރަފުހާއި މިލަ، އަދި އެއާއި އެކުވެފައި ޖަރާސީމެއް ވާނަމަ އެ އެއްޗަކާއި އެކު ކަންފަތުގެ ތެރެއަށް ވަދެގެން ހިނގައިދާނެތީއެވެ. މިގޮތަށް އެތެރެއަށް ވަންނަ ޖަރާސީމު ގިނަ ދުވަސް ވުމުން ގިނަވެ، ކަންފަތުގެ އެތެރެ އިންފެކްޓް ވެދެއެވެ.

ގިނަ މީހުންގެ ކަންފަތުގައި ޖަރާސީމު އަށަގަނެ، ކަންފަތް އިންފެކްޓް ވުމުގެ މައިގަނޑު އެއް ސަބަބަކީ ކަންފަތަށް ކަފަބުރު ކޮއްޕުމެވެ. އާދޭހެވެ! ކަފަބުރަކީ ކަންފަތް ސާފު ކުރަން ހުންނަ އެއްޗެކެވެ. ނަމަވެސް ކަންފަތުގެ އެންމެ އެތެރެއާ ޖެހެންދެން ކަފަބުރު ކޮއްޕުން ރައްކާތެރިއެއް ނޫނެވެ. ކަންފަތުގައި ހޭކިފައި ހުންނަ ހަޑި އާއި ފެން، ކަފަބުރުން ސާފުކޮށް ހިއްކާލުމުން ކަފަބުރުގެ ބޭނުން ކުރެވުނީއެވެ. އެންމެ އެތެރެއަށް ކޮއްޕާ ތަޅުވާ ހެދުމަކީ ހަގީގަތުގައި ކަފަބުރުން ކުރަންޖެހޭ ކަމެއް ނޫނެވެ. 

އެހެންކަމުން، ކަންފަތަށް ކަފަބުރު ކޮށްޕުން އާދައަކަށް ނުހެދުމަކީ ވަރަށް މުހިންމު ކަމެކެވެ. ކޮށްޕާނަމަވެސް ކޮށްޕަންވީ އެއްމެ އެތެރެއަކަށް ނޫނެވެ. ބޭރު ބޭރުން ކާތާލުމަށްފަހު ފެންފޮދު ހިއްކާލުމަށެވެ. އެތެރެއަށް ކޮށްޕާ ތަޅުވާ ހެދުމަކީ ފަހަރުގައި ހިތްހަމަޖެހޭ އަރާމު ކަމެއް ނަމަވެސް މިއީ ސިއްހަތާ ރައްޓެހި އާދައެއް ނޫނެވެ.