މެދަށް ބޮޑުވުމަކީ ގިނަ މީހުންގެ ބޮޑު ކަންބޮޑުވުމެކެވެ. މެދަށް ބޮޑުވުމޭ މި ބުނެވުނީ ސަމާސާ އިބާރާތަކުނެވެ. މިހެން މި ބުނެވުނީ، ބަނޑު ބޮޑުވުން ނުވަތަ ބަނޑު ލުމަށެވެ. ބަނޑުގައި ސަރުބީ ޖަހާ ބަނޑު ނުކުތުމަށެވެ. މިއީ ހަމައެކަނި ބޭރުފުށުން ފެންނަ ފެނުމަށް ހުންނަ ކަމެއް ނޫނެވެ. މިއީ ހަށިގަނޑުގެ ސިއްޙަތަށް ނޭދެވޭ އަސަރުތަކެއް ކުރުވާ ވެސް ކަމެކެވެ.

ދުނިޔޭގެ ނަން ހުރި ނޫސްތަކުގެ ތެރެއިން ސީ.އެން.އެން ގައި ޝާއިއުކޮށްފައިވާ ދިރާސާ ލިޔުމެއްގައި ވަނީ މިގޮތަށް ބަނޑު ލުމާއި ހަނދާން ބަލިވުމާ ދެމެދު ގުޅުމެއް ވާކަމަށް ބުނެފައެވެ. މި ދިރާސާގައި ދައްކާގޮތުން، ބަނޑު ލާ މީހުންގެ ތެރޭގައި ހަނދާން ނެތޭ ބަލި ޖެހުމުގެ ފުރުސަތު ބޮޑުކަމަށް ފާހަގަކޮށްފައިވެއެވެ.

މި ހޯދުމަކީ ކަންބޮޑުވާންޖެހޭ ހޯދުމެއް ކަމަށްވެސް އެ ދިރާސާގައި ފާހަގަ ކޮށްފައި ވެއެވެ. އެއީ ހަނދާން ނެތުމަކީ މުސްކުޅިވުމާއެކު އަންނަ ވަރަށް ނުރައްކާތެރި ބައްޔެއްކަމުގައި ވާތީއެވެ. މި ބަލީގެ ސަބަބުން މީހާއަށް އޭނާގެ ދިރިއުޅުމުގެ އެންމެ އަސާސީ ކަންކަން ވެސް ނުކުރެވޭ ހިސާބަށް ދެއެވެ. އަދި އާއިލާއާއި ރައްޓެހިންނަށްވެސް ވަރަށް ބޮޑު ބުރައަކަށް ވެގެންދެއެވެ.

މެދަށް ބޮޑުވުމަކީ ހަމައެކަނި ރީތިކަމަށް ހުތުރުވާ ކަމެއްވެސް ނޫނެވެ. އެއީ ސިއްޙަތާ ސީދާ ގުޅުން ހުރި ކަމެކެވެ. ބަނޑު ލުމުގެ ސަބަބުން ހަނދާން ބަލިވުމުގެ ފުރުސަތު އިތުރުވާކަމަށް ދިރާސާތަކުން ދައްކާއިރު، އަޅުގަނޑުމެން އެންމެން ވެސް މިކަމާމެދު ވިސްނަން ޖެހެއެވެ.

ވަޒީފާތަކުގެ ގޮތުންނާއި ކުރާ މަސައްކަތުގެ ގޮތުން ހެލިފެލިވެ ނޫޅެވޭ އެތައް ބަޔަކު އަޅުގަނޑުމެންގެ ތެރޭގައި އެބަ އުޅެއެވެ. މިފަދައިން ހެލިފެލިވެ ނޫޅެވޭނަމަ، މިގޮތަށް ބަނޑުގައި ސަރުބީ ޖަހާ، ބަނޑު ލުމަކީ ވުން ވަރަށް ގާތް ކަމެކެވެ. ގަމީހުގެ ގޮށްތައް ބާރުވެ، ފަޓުލޫނުގެ ބުޅިގަނޑުވެސް ނޭޅުވެއެވެ. އެއާއި އެކު އެކަންވެސް މިއަދު ހޯދުންތަކުގެ ސަބަބުން ގޮސް މި ގުޅެނީ އިންސާނާގެ މި ބަލި ހަނދާނާއެވެ.

ރަނގަޅު ކާނާ ކެއުމާއި، ގަވާއިދުން ކަސްރަތު ކުރުމަކީ ބަނޑު ލުން ހުއްޓުވުމަށް އެޅިދާނެ މުހިންމު ފިޔަވަޅުތަކެކެވެ. މީގެ އިތުރުން، ސްޓްރެސް މެނޭޖް ކުރުމާއި، ރަނގަޅަށް ނިދުން ފަދަ ދުޅަހެޔޮ އާދަތައް އަށަގެންނެވުމަކީވެސް މުހިންމު ކަމެކެވެ. މިފަދަ ރަނގަޅު އާދަތަކުގެ ސަބަބުން ބަނޑު ލުން ހުއްޓުވުމަށް އެހީތެރިވެދޭއިރު، މިއީ މުޅި ހަށިގަނޑުގެ ސިއްޙަތު ރަނގަޅުވެ، ހަނދާން ބަލިވުމުގެ ފުރުސަތު ކުޑަކޮށްދޭނެ ކަމެކެވެ.

މެދަށް ބޮޑުވުމާއި ހަނދާން ބަލިވުމާ ދެމެދު ގުޅުމެއް ވާކަމަށް ދިރާސާތަކުން ދައްކާއިރު، އަޅުގަނޑުމެން އެންމެން ވެސް މިކަމާމެދު ސަމާލުވާން ޖެހެއެވެ. އަޅުގަނޑުމެންގެ ދުޅަހެޔޮކަމަށްޓަކައި، ހަށިގަނޑުގެ ބަރުދަން ބެލެހެއްޓުމަކީ ވަރަށް މުހިންމު ކަމެކެވެ. މިއަދު އަޅުގަނޑުމެން އަޅާ ކުދިކުދި ފިޔަވަޅުތަކުން، މާދަމާގެ އަޅުގަނޑުމެންގެ މުޅި ދިރިއުޅުން ފަސޭހަވެ ލުއިވެދާނެއެވެ.

 

ހަވާލާ: ސީ.އެން.އެން 2024