އިންސާނާގެ ހަށިގަނޑުގެ އެންމެ މުހިންމު އެއް ބައިކަމުގައިވާ ލޭ ދައުރުކުރުމުގެ ނިޒާމަކީ ވަރަށް ނާޒުކު އަދި ބޮޑު ސަމާލުކަމެއް ދޭންޖެހޭ ނިޒާމެކެވެ. މި ނިޒާމުގެ ސިއްހަތު ރަނގަޅުކޮށް ބެލެހެއްޓުމަކީ ކޮންމެ މީހެއްގެވެސް ޒިންމާއެކެވެ. އެހެނީ މި ނިޒާމަށް ގެއްލުމެއް ލިބިއްޖެނަމަ، އޭގެ ނޭދެވޭ އަސަރު މުޅި ހަށިގަނޑަށް ކުރާނެތީއެވެ. ލޭ ދައުރުކުރުމުގެ ނިޒާމާ ގުޅޭގޮތުން އަޅުގަނޑުމެން ވިސްނާލަންޖެހޭ އެންމެ މުހިންމު އެއް ކަމަކީ ސަރުބީގެ މައްސަލައެވެ. ނުވަތަ ކޮލެސްޓްރޯލުގެ މައްސަލައެވެ.

ސަރުބީއަކީ ލޭގައި އެކުލެވޭ ކޮލެސްޓެރޯލްގެ އެއް ބާވަތެވެ. ނަމަވެސް، ސަރުބީގެ ދެ ބާވަތެއް ވާކަން އަޅުގަނޑުމެން ދަންނަންޖެހެއެވެ. އެއީ ލޭގައި ހުންނަ ސަރުބީ އާއި ލޭނާރުގައި ހިފާފައި ހުންނަ ސަރުބީއެވެ. މި ދެ ބާވަތުގެ ތެރެއިން ލޭނާރުގައި ހިފާފައި ހުންނަ ސަރުބީގެ ނުރައްކާތެރިކަން މާ ބޮޑުކަން ޞިއްޙީ މާހިރުން ފާހަގަކުރައްވައެވެ.

ލޭގައި ހުންނަ ސަރުބީއަކީ ހަށިގަނޑަށް ކޮންމެހެން ބޭނުންވާ އެއްޗެކެވެ. މިއީ ހަށިގަނޑުގެ ސެލްތަކުގެ ފާރުތައް ހެދުމަށާއި، ހޯމޯންތައް އުފެއްދުމަށް އެހީތެރިވެދޭ މާއްދާއެކެވެ. އެހެންނަމަވެސް، ލޭނާރުގައި ހިފާފައި ހުންނަ ސަރުބީއަކީ ލޭނާރުތަކުގެ އެތެރޭގައި ޖަމާވެ، ލޭ ދައުރުވުމަށް ހުރަސްއަޅާ އެއްޗެކެވެ. މިކަމުގެ ސަބަބުން ހިތުގެ ބަލިތަކާއި، ސްޓްރޯކް ފަދަ ނުރައްކާތެރި ބަލިތަކަށް މަގުފަހިވެގެންދެއެވެ.

ލޭނާރުގައި ހިފާފައި ހުންނަ ސަރުބީގެ މިންވަރު އިތުރުވާން މެދުވެރިވާ ސަބަބުތަކުގެ ތެރޭގައި ސިއްހަތަށް ގެއްލުން ހުރި ކާނާ (އިންސާނުން އުފައްދާފައި ހުންނަ، ތެލާއި ފެޓުގެ ބާވަތްތައް އެކުލެވޭ ކާނާ / ޖަންކު ފުޑްސް) ބޭނުންކުރުމާއި، ދުންފަތުގެ އިސްތިޢުމާލު ކުރުމާއި، ހަށިގަނޑަށް ބޭނުންވާ ވަރަށް ކަސްރަތު ނުކުރުން ހިމެނެއެވެ. މީގެ އިތުރުން، ޖެނެޓިކް ސަބަބުތަކާ ހުރެވެސް މި މައްސަލަ ދިމާވެދާނެއެވެ. މާނައީ އާއިލީގިތުން ވާރުތަކުރާ ކަމެއްގެ ގޮތުގައިވެސް ދިމާވެދާނެެެެއެވެ. އެހެންކަމުން، މި ކަންކަމަށް ސަމާލުވެ، ޞިއްޙަތަށް ފައިދާހުރި ދިރިއުޅުމުގެ ވައްޓަފާޅިއެއް ގެންގުޅުމަކީ ވަރަށް މުހިންމު ކަމެކެވެ.

ލޭނާރުގައި ހިފާފައި ހުންނަ ސަރުބީގެ މިންވަރު ދަށްކުރުމަށްޓަކައި އަޅުގަނޑުމެންނަށް ކުރެވިދާނެ ގިނަ ކަންތައްތަކެއް ވެއެވެ. މީގެ ތެރޭގައި ގަވާއިދުން ކަސްރަތުކުރުމާއި، ތާޒާ މޭވާއާއި ތަރުކާރީ ކެއުމާއި، ފެންވަރު ރަނގަޅު، ގުދުރަތީ ޕްރޮޓީން ހިމެނޭ ކާނާ ބޭނުންކުރުން ހިމެނެއެވެ. އަދި މީގެ އިތުރުން، ދުންފަތުގެ އިސްތިޢުމާލުކުރުން ދޫކޮށް، ހަށިހެޔޮ، ދުޅަހެޔޮ ދިރިއުޅުމަކަށް، ދިރިއުޅުން ބަދަލުކޮށްލުން ކޮންމެހެންވެސް މުހިއްމެވެ.

 

ހަވާލާ: ހެލްތު ލައިން 2024