ދިވެހިރާއްޖޭގައި ސިއްހީނިޒާމު، ޒަމާނުއްސުރެ ތަރުތީބުވަމުން މިހިރަ ހިނގާ ގޮތުން، ސިއްހީ ހިދުމަތުގައި އުޅޭ ނަރުހުންނަކީ އަންހެނުން ކަމުގައި ހީވާ ކަހަލައެވެ. ނަމަވެސް އޭރުވެސް ބޭރުގައުމުތަކުން ފިރިހެން ނަރުހުން ދިޔައީ ކޮންމެވެސް ވަރަކަށް ރާއްޖެއަށް ގެންނަމުންނެވެ. މިހާރު މިރާއްޖޭގައި އުޅޭ ފިރިހެން ނަރުހުންގެ އަދަދަކީ މަދު އަދަދެއް ނޫނެވެ. ނަމަވެސް އަންހެން ނަރުހުންނާއި އަޅާ ބަލާއިރު އެއީ ވަރަށްވެސް މަދު މަދު އަދަދެކެވެ. މިފަދައިން އުޅޭ ފިރިހެން ނަރުހުންގެ ތެރޭގައިވެސް ގިނައީ ރާއްޖެއިން ބޭރު ނަރުހުންނެވެ.

ކަންމިހެން އޮތްނަމަވެސް މިހާރު މިވަނީ ދިވެހި ފިރިހެން ނަރުހުންވެސް ތަމްރީނުވާން ފަށާ، އަމަލީގޮތުން ނަރުހުންގެ ހިދުމަތުގައި ބައިވެރިވާން ފަށާފައެވެ. މިއީވެސް އެ އުންމީދުގައި ތައުލީމު ހާސިލް ކުރަމުންދާ ދިވެހި ފިރިހެން ޒުވާނެއްގެ ވާހަކައެވެ. މިއީ ށ.ބިލެތްފައްސަށް އުފަން، އުމުރުން 19 އަހަރުގެ އަހްމަދު އީމާން ހަސަން އެވެ.

ސިއްހީދާއިރާއިން ކުރިއަށް ދިއުމުގެ ވިސްނުމާއި ހިޔާލު އީމާނުގެ ހިތުތެރޭގައި އެންމެ ފުރަތަމަވެސް ކުރެހެންފެށީ ގުރޭޑު ނުވައެއްގައި ތައުލީމު ހާސިލްކުރަމުން ދަނިކޮށެވެ. އެއީ އޭނާގެ ބަޔޮލޮޖީ މުދައްރިސްގެ ވާހަކަތަކަކަށްފަހު އުފެދުނު ހިޔާލުތަކެއް ކަމުގައި އީމާން ބުނެއެވެ. އޭގެފަހުން ގުރޭޑު 10 ނިންމުމަށްފަހު ސިއްހީދާއިރާއަށް ނުކުތުމަށް އަޒުމްކަނޑައަޅާ އެ އަޒުމުގައި ކުރިއަށް ދިޔައެވެ.

އެގޮތުން އެންމެ ފުރަތަމަ އީމާނުގެ ވިސްނުން ހުރީ ނަރުހަކަށް ވާކަން ނޫނެވެ. ނަމަވެސް ހާލަތު ދިމާކުރިގޮތުން އެކަން ކުރެވޭ ގޮތެއް ނުވިއެވެ. ކަންމިހެން ދިމައިމިވަނަވެސް އީމާނުގެ އުންމީދަށް ކުޑަނަމަވެސް ބަދަލެއް ނާދެއެވެ. ކޮންމެ ގޮތަކަށް ކަންތައް ވީ ނަމަވެސް ހޮސްޕިޓަލުގައި، ބަލިމީހުންނަށް އެހީތެރިވުމުގެ ޝައުގާއި އަޒުމު ދޫކޮށެއް ނުލައެވެ. އެއާއި އެކު ދެން އީމާނުގެ ވިސްނުން ހުރީ ނަރުހެއްގެ ގޮތުގައި ކުރިއަށް ދާށެވެ. އެގޮތުން ނަރުސްކޯސް ހެދުމަށް ދިވެހި ގައުމީ ޔުނިވާސިޓީގެ ސުކޫލް އޮފް ނަރސިންގައި ނަރުސްކޯސް ފުރިހަމަ ކުރަން އެ ކޯހުގައި 2020 ވަނަ އަހަރު ބައިވެރިވިއެވެ. އެއީ އެޑްވާންސް ސެޓްފިކެޓް އޮފް ނަރސިން އެވެ. އެއް އަހަރުގެ މި ކޯސް ފުރިހަމަ ކުރުމަށްފަހު 2021 ވަނަ އަހަރު އީމާން ވަނީ މޯލްޑިވްސް ނަރސިން އެންޑް މިޑްވައިފްރީ ކައުންސިލުން ދޭ އެންރޯލް ނަރުހެއްގެ ލައިސަންސް ހޯދާފައެވެ.

އީމާން ނަރުހަކަށް ވާން ގަސްތުކުރީ މި ދާއިރާގައި ފިރިހެނުން އުޅޭތޯ ނުވަތަ ނޫންތޯ ބެލުމަށްފަހުގައެއް ނޫނެވެ. ނަމަވެސް ސިއްހީ ދާއިރާއަށް އޮތް ޝައުގެއްގެ ބޮޑުކަމުންނެވެ. ނަމަވެސް އެޑްވާންސް ސެޓްފިކެޓް އޮފް ނަރސިންގެ ކޯހުގައި އީމާން ކިޔަވަމުން ދިޔައީ އިތުރު 6 ފިރިހެން ކުދިންނާއި އެކުގައެވެ. މިއަދު އީމާނަކީ އެންރޯލް ނަރުހެކެވެ. އަދި މިއަދު އޭނާ ދަނީ ރެޖިސްޓަރޑް ނަރުހަކަށް ވުމަށް އިތުރަށް ކިޔަވަމުންނެވެ. އެގޮތުން ސުކޫލް އޮފް ނަރސިންގައި މިހާރު އީމާން ދަނީ ޑިޕްލޮމާ އިން ނަރސިން ފުރިހަމަ ކުރަމުންނެވެ. މި ކޯހުގައި އީމާނާއި އެކު އިތުރު ތިން ފިރިހެން ދަރިވަރުން ކިޔަވަމުން ގެންދެއެވެ.

އީމާނަކީ ހިތްވަރާއި އެކު ކިޔަވަމުންދާ ނަރުހެއް ނަމަވެސް އޭނާގެ އެހެން ޝައުގުވެރިކަމެއްވެސް ހުރެއެވެ. ކުޑައިރުންސުރެ ރީތިކޮށް ބަންގި ގޮވާ، ބަންގި ގޮވުމަށް ޝައުގުވެރިކަންހުންނަ އީމާނަކީ މިއަދު އިމާމު ކޯހުގެ ސެޓްފިކެޓް ލެވެލް 1 ނިންމާފައި ހުރި އިމާމެއްވެސް މެއެވެ. މީގެ އިތުރުން އިމާނަކީ ފުޓްސެލް ކުޅުމަށް ޝައުގުވެރިކަން ހުންނަ ޒުވާނެކެވެ. އެއާއިއެކު ފުޓްސެލް އަދި ހޭންޑްބޯލް މުބާރާތްތައް އިންތިޒާމުކޮށް ހިންގުމުގައިވެސް އީމާނަކީ ކެރޭ ހިތްވަރުގަދަ ޒުވާނެކެވެ.

ދިވެހި ފިރިހެން ނަރުހުންނަކީ ނިސްބަތުން މަދުބައެކެވެ. އެހެންކަމުން، ވަޒީފާއެއްގެ ގޮތުން މިކަން ކުރުމުގައި ދަތިތަކެއް ހުންނާނެއެވެ. އީމާން ގަބޫލުކުރާ ގޮތުގައި ފިރިހެން ކުއްޖަކަށް ވުމުން ޖުމުލަކޮށް މާބޮޑު ގޮންޖެހުން ތަކެއް ކުރިމަތި ނުވިނަމަވެސް ބައެއްފަހަރު ކަންކަން ދިމާވާ ގޮތުންނާއި މީހުން ބުނާ ބައެއް ބަސްބަހުގެ ސަބަބުން ވަރަށް އުނދަގޫވެއެވެ. އަދި ހިތްމަރުވާ ޒާތުގެ ކަންކަންވެސް ދިމާވާކަމަށެވެ.

ފިރިހެނުން މަދު ދާއިރާއަކަށް ނުކުންނަން ގަސްތުކުރުމުން އެކުވެރި އެހެން ފިރިހެން ކުދިންގެ ފަރާތުން ލިބުނީ ހީނުކުރާ ކަހަލަ ހިތްވަރެއް ކަމަށް އީމާން ފާހަގަކުރެއެވެ. އަދި އީމާން ފާހަގަ ކުރާގޮތުގައި މި ދާއިރާއިން ކުރިއަށް ދިއުމުގައި އެންމެ ބޮޑު އެއްބާރުލުމަކާއި ހިތްވަރެއް ދެނީ އޭނާގެ ލޯބިވާ މަންމަ އާއި ބައްޕައެވެ. ފިރިހެން ކުއްޖަކަށް ވީތީ އެކުގައި ކިޔަވާ އެހެން ހުރިހާ ކުދިންގެ އެހީތެރިކަންވެސް ވަރަށްބޮޑަށް ލިބޭކަމަށް އީމާން ބުނެއެވެ.

މިދާއިރާގައި ކިޔަވަމުންދާއިރު ބަލިމީހުންގެ އާއިލާތަކުން ދޭ ހިތްވަރާއި ކުރާ ތައުރީފަކީ މިކަމުގައި ކުރިއަށްދާން އީމާނަށް ލިބުނު ބޮޑުހިތްވަރެކެވެ. ބަލިމީހުންގެ އާއިލާތަކުންނާއި ބަލި މީހުންވެސް ފާހަގަ ކުރާގޮތުގައި ދިވެހި ފިރިހެންކުދިން މި ދާއިރާއިން ފެނުމަކީ އެމީހުންނަށް ލިބޭ ވަރަށްބޮޑު ހިތްހަމަޖެހުމެކެވެ.

ކޮވިޑް-19 ގެ ބިޔަ ރާޅުތައް ދިވެހިރާއްޖެއަށް މުގުރަމުން ދިޔަ ދުވަސްވަރު، އީމާން ވަނީ ދަރުމަވެރިއެއްގެ ގޮތުގައި ފެނިފައެވެ. އެގޮތުން އެޗް.ޕީ.އޭ ގެ ރެޕިޑް ރެސްޕޮންސް ޓީމުގައި އީމާން ވަނީ މަސައްކަތް ކޮށްފައެވެ. މީގެ އިތުރުން ކޮވިޑުގައި ހާލުބޮޑުވާ މީހުން އެނދުމަތިކުރަމުން ދިޔަ ހުޅުމާލެ ކޮވިޑް ފެސިލިޓީގައިވެސް އީމާން ވަނީ ދަރުމަވެރިއެއްގެ ގޮތުގައި މަސައްކަތް ކޮށްފައެވެ.

މިހާރު ޑިޕްލޮމާ އިން ނަރސިން ކިޔަވަމުންދާ އީމާނުގެ މިހާރުގެ އެންމެ ބޮޑު ހުވަފެނަކީ ރެޖިސްޓަރޑް ނަރުހަކަށް ވުމެވެ. އެއާއި އެކު މިދާއިރާއިން ކުރިއަށް ދެވެން އޮތް އެންމެ މައްޗަކަށް ދިޔުމަކީވެސް މި ހިތްވަރުގަދަ ޒުވާނާގެ އުންމީދެކެވެ. އަދި އޭގެފަހުގައި އީމާން އަބަދުވެސް ފެންނާނީ ސިއްހީދާއިރާއިންކަންވެސް އީމާން ފާހަކުރެއެވެ.

އީމާން ބުނާގޮތުގައި މިކަމުގައި މިހިސާބަށްވެސް އާދެވުނުކަމަށްޓަކައި މާތް ﷲ އަށް ޝުކުރުކުރަމެވެ. އޭގެ ފަހުގައި ހުރިހާ ޝުކުރެެއް ހައްގުވަނީ އޭނާގެ ލޯބިވާ މަންމައާއި ބައްޕައަށެވެ. އީމާން ބުނާގޮތުގައި އެމީހުންގެ ހިތްވަރާއި އެއްބާރުލުމާއި އެކުގައި ނޫނީ މިއަދު އީމާން އެ ހުރި ހިސާބަށްވެސް ނާދެވުނީހެވެ. އިރާދަކުރެއްވިއްޔާ މުސްތަގުބަލުގައި އީމާނުގެ މަންމައާއި ބައްޕަ ފަހުރުވެރިވާފަދަ ދަރިޔަކަށް އީމާން ވާނެއެވެ. ނަރުހަކަށް ވާން ބޭނުންވާ ދިވެހި ފިރިހެން ކުދިންނަށް އީމާން ދޭންބޭނުންވާ މެސެޖެއްވެސް އެބަ އޮތެވެ. އެއީ ހިތްވަރާއި ކެރުންތެރިކަމާއި އެކީ މިކަމާ ކުރިމަތިލައިފިނަމަ މިއީ އަންހެނުނަށްވުރެ ފަސޭހައިން ފިރިހުންނަށް ވާނޭ ކަމެކެވެ.

އާދޭހެވެ! މިއީ އީމާނުގެ ވާހަކައެވެ. މިފަދަ ހިތްވަރުގަ ކެރޭ ދިވެހި ނަރުހުން މަދުން ނަމަވެސް މިހާރު ފެންނަން ފަށައިފިއެވެ. ޖިންސީ ތަފާތުކުރުން ނައްތާލުމަށް ވާކާލާތުކުރާ މިފަދަ ޒަމާނެއްގައި ދިވެހި ފިރިހެން ނަރުހުން މި ދާއިރާއަށް ނެރެން އެބަ ޖެހެއެވެ. އީމާނުމެން ފަދަ ކެރޭ ހިތްވަރުގަދަ އެތައް ޒުވާނުންނެއް އުފެދެން އެބަޖެހެވެ. ދިވެހި ފިރިހެން ނަރުހުންނަކީ މި ރާއްޖޭގެ ސިއްހީ ނިޒާމުގައި ވަރަށްވެސް މުހިންމު ބައެކެވެ. އެބައެއްގެ ބޭނުން އިންތިހާއަށް ބޮޑު ބައެކެވެ. އަޅުގަނޑުމެން އެންމެންގެ ދުއާ އަކީ އީމާނުގެ ކިޔެވުމުގައްޔާއި މަސައްކަތްތަކުގައި ބަރަކާތް ލައްވާ އަބަދުވެސް ކާމިޔާބީ މިންވަރު ކުރެއްވުމެވެ.