އައްޑު އަތޮޅަށް ނިސްބަތްވާ ނިޒްނާ ނިޒާރު އަކީ، ޖެހިލުންކުޑަ އަމިއްލަ ނަފްސަށް ކުރާ އިތުބާރު ބޮޑު  އަދި ކެރޭ އަންހެނެކެވެ. ހިތްހެޔޮ އަދި މަޖާ މިޒާޖެއްގެ އެކުވެރިއެކެވެ. ފިރިހެނުންގެ ނުފޫޒު ގަދަ، ފަތުރުވެރިކަމުގެ ދާއިރާގައި ފިރިހެނުންނާއި އެއް ހަމައެއްގައި ފައިތިލަ ސާބިތުކޮށްގެން ހުރި ފިސާރި ކަނބަލެކެވެ.

ފަތުރުވެރިކަމުގެ ދާއިރާއަށް ޝައުގެވރިވީ ގޮތާއ ބެހޭ ގޮތުން ސުވާލުކޮށްލުމުން ނިޒްނާ ބުނީ، "އަބަދުވެސް ބޭނުންވީ ވަރަށް ބުރަ އަދި ޗެލެންޖިންގ ވަޒީފާއެއް. ހަމަ އެކަނި ގަޑި ގުނަން އޮފީހުގަ ނީނދެ ކޮންމެ ދުވަހަކު ތަފާޓު ތަޖުރިބާ އެއްކޮށް ތަފާތު ކަންކަން ދަސްވާ ކަހަލަ ވަޒީފާއަކަށް ދާން ބޭނުންވާތީ މި ދާއިރާ އިޚްތިޔާރު ކުރީ" މިހެންނެވެ.  

ނިޒްނާ ފަތުރުވެރިކަމުގެ ދާއިރާގައި މަސައްކަތްކުރަން ފެށީ މީގެ 10 ވަރަކަށް އަހަރުކުރިންނެވެ. އެންމެ އުނދަގޫ އަދި މައްސަލަތައް ގިނަ ޑިޕާރޓްމަންޓް ކަމަށްވާ ހިއުމަން ރިސޯސަސް ޑިޕާރޓްމެންޓްގެ ވަޒީފާއަށް ނިކުތީ އެކަމަށް ބޭނުންވާ ތަމްރީނާއި ހުނަރު ލިބިގެންނެވެ. މިއީ ގޮންޖެހުން ހުރި ދާއިރާއެއް އެނގި އެކަމަށް ތައްޔާރު ވެގެންނެވެ. ހިއުމަން ރިސޯސަސް އަކީ މުވައްޒަފުންގެ އެންމެހާ ކަންކަން ބަލަހައްޓާ ޑިޕާރޓްމަންޓް ކަމަށް ވުމުން ، މުވައްޒަފުންގެ ސުލޫކީ މައްސަލަތައް ވެސް ބަަލަމުން ދާނީ ހަމަ މި ޑިޕަރޓްމަންޓުންނެވެ.

"އެންމެ އުނދަގޫ އެއް ކަންތައް އެއީ ސުލޫކީ ފިޔަވަޅު އެޅުން. މީހުންގެ ނުރުހުން ވަރަށް ގިނައިން އަމާޒުވޭ، އެކަމަކު ގަވާއިދުގެ ތެރެއިން އަޅަން އޮންނަ ފިޔަވަލެއް ވަކި އަތަކަށް ބުރަ ނުވެ އެޅީމަ ހަމަ ވަރަށް ގިނަ މީހުނަށް ވިސްނޭ އެއީ އެކަން އޮންނަން ޖެހޭ ކަންވެސް. އެކަމަކު ގަބޫލު ނުކޮށް ނުރުހުމުގެ ބަސް ބުނާ މީހުންވެސް އުޅޭ." ވަޒީފާ އާއި ގުޅިގެން އެންމެ އުނދަގޫ ވަނީ ކޮން ކަހަލަ ހާލަތެއްގައިތޯ ސުވާލު ކޮށްލުމުން ނިޒްނާ ހާމަ ކުރިއެވެ.

ފަތުރުވެރިކަމުގެ ދާއިރާގެ ބޮޑު އިންސައްތައަކީ ފިރިހެނުން އަދާ ކުރާ ވަޒީފާ ތަކެވެ. އަންހެނުންގެ ތެރެއިންވެސް ރާއްްޖެއަށް ނިސްބަތްވާ އަންހެނުން ވަޒީފާތަކުގައި ތިބި އަދަދު ނިސްބަތުން އަމުދުން މަދެދެވެ. އެހެން ކަމުން މިފަދަ މާހައުލެއްގައި، ފިރިހެނުންގެ މައްޗަށް ބަސްކިޔަން ޖެހޭ މަގާމެއްގައި އަންހެނަކު ހުރުން މިއީ ކިހާ އުނދަގޫ ކަމެއްތޯވެސް ސުވާލުކޮށްލީމެވެ. " މިއީ ހަމަ އަސްލުވެސް ގޮންޖެހުން ވަރަށް ބޮޑު ދާއިރާއެއް. ޙާއްސަކޮށް ހިއުމަން ރިސޯސަސްގެ އިސް މަގާމެއްްގައި އަންހެނަކު ހުރުން ގިނަ މީހުނަށް ބަލައިގަންނަން އުނދަގޫ. ވަރަށް ގިނަ ފިއްތުންތައް ކުރިމަތިވޭ. ކިތަންމެ "ފެމިނިސްޓް" ވެގެން އުޅުނަސް މި ހަގީގަތް އަދި ވެސް ބަދަލު ނުވޭ. މިއީ ރަގަޅު ވާން ޖެހޭ ކަންކަން" ނިޒްނާ ހާމަކުރިއެވެ.

ފަތުރުވެރިކަމުގެ ދާއިރާއަށް ދިވެހިން، ޚާއްސަކޮށް އަންހެނުން ނެރުމަށް ކިހާ އިސްކަމެއް ދެންތޯ ސުވާލު ކޮށްލުމުން ނިޒްނާ ބުނީ، " އަންހެނުންނަށް ޚާއްސަކަމެއް ދޭ، ބައެއް ވަޒީފާތައް ހުންނާނެ ހަމަ އެކަނި އަންހެނުން ބޭނުންވެގެން އިޢުލާންކުރާ، މިސާލަކަށް ކިޑްސް ކްލަބްގެ ވަޒީފާތައް. ނަމަވެސް އަންހެނުންނަށް އާއިލާއާއި ދުރަށް އައިސް ވަޒީފާއަދާ ކުރުން ވަނީ އުނދަގޫކަމަކަށް. މީގެ އިތުރުންވެސް ރިސޯޓްތަކުގައި ވަޒީފާ އަދާ ކުރަން އަންހެން ކުދިން ފޮނުވަން ބައެއް އާއިލާޔަތަކުން އެއްބަސް ނުވޭ. ހީވަނީ އަދިވެސް ބައެއް މީހުންގެ ވިސްނުން ހުންނަނީ ރިސޯޓްތަކުގައި އުޅޭ ނަމަ ކޮންމެސް ވިޔާނުދާ ކަމެއް ކޮށްފާނޭ. އެއީ ހަމަ ކުށް ހީއެއް. މިހާރުގެ އަންހެނުންނަކީ ވަރަށް ވިސްނޭ، ވަރަށް ޒިންމާދާރު ބައެއް. އަމިއްލަ ފައި މައްޗަށް ތެދުވަން ގަދަ އަޅާ މަސައްކަތްކޮށް، ދިރިއުޅުމުގައި މަގާމެއް ޙާޞިލްކުރަން ބޭނުންވާ ބައެއް." ނިޒްނާ ހާމަ ކުރިއެވެ.

ދިގަލި ރިސޯޓްގެ އެސިސްޓެންޓް ހިއުމަން ރިސޯސަސް މެނޭޖަރުގެ މަގާމުގައި ހުރި ނިޒްނާ އަށް ތީރުގެ ފަރާތުން އެދެނީ ކުރިއެރުމެވެ. އަދި މިފަދަ އެހެން ހުރިހާ ކަނބަލުންނަށް ވެސް ކާމިޔާބު މުސްތަގުބަލަކަށް އެދެމެވެ.