ދިވެހިންނަކީ މީހުނަށް ފުރައްސާރަކޮށް މަލާމާތްކުރުމާއި ކުށް ދެއްކުމުގައި އަރާތިބި ބައެކެވެ. ޚާއްސަކޮށް ފަންނާނެއްގެ މަސައްކަތެއް ފެނިއްޖެނަމަ އެކަމަށް ހައެއްކަ ފާޑު ކިޔާ ނުލައިފިނަމަ އެއީ މީހަކަށް ނުވެއެވެ. ކޮންމެ މީހަކީ އެންމެ މޮޅުމީހާއެވެ. އަދި އެހެން މީހުންގެ ރަގަޅު ކަންކަމަށް ބަލާލުމެއްނެތި ކުށެއް ފެނޭތޯ އުޅުން މިއީ އާންމު ކަމެކެވެ. ގޯސްކޮށް ކަމެއްވާ އިރު އެކަމަށް ބިނާ ކުރަނިވި ގޮތަކަށް ފާޑުކިއުމަކީ އޮންނަ ކަމެކެވެ. ހަމަ އެގޮތަށް ފުރިހަމަ މަސައްކަތެއް ފެނިއްޖެނަމަ އެކަމަށް ތަޢުރީފްކޮށް ހިތްވަރުދީ އެކަން ބަލައިގަތުން އެއީ ދިވެހިން ދަސްކުރަން ޖެހިފައިވާ ރިވެތި އާދައެކެވެ.

މިއީ މުޖްމަތަޢުގައި މޫލާފައިވާ ނުބައި އާދައެއްކަން އެންމެފަހުން ހާމަވެގެން މި ދިޔައީ ޖެލީގެ ފަރާތުން ނެރުނު އިޝްތިހާރަކަށް ފަހުއެވެ. އާންމުންނާއި އެއްހަމައެއްގައި ފައިތިލަ ސާބިތުކޮށް މީޑިޔާތަކުންވެސް ވަނީ ފާޒިލް އަށް ޖެއްސުންކޮށްފައެވެ. އެއީ މި އިޝްތިހާރުގައި ފާޒިލްގެ އެކްޓިންގ ކަމުނުގޮސްގެން ނޫނެވެ. މީގެ ދުވަސްގަނޑެއް ކުރިން ފާޒިލް ސޯޝަލް މީޑިޔާގައި ހިންގި ކަމަކާ ގުޅިގެންނެވެ. ނަމަވެސް އެކަމެއް ނިމި އެކަން ހިނގާ ދިޔަގޮތް މީޑިޔާއަށް ކިޔާދީ އެކަމުގައި ފާޒިލްވަނީ އާންމުންގެ ކިބައިން މަޢާފަށްވެސް އެދިފައެވެ. އެހެނަސް މީޑިޔާތަކުން ބޭނުންވީ އަދިވެސް އެކަން ފެންމަތިކޮށް ސުރުޚީތަކަށް އަރުވާށެވެ. މި އިޝްތިހާރުގެ ފަހަތުގައިވާ މިންނެތް މަސައްކަތާއި ފުރިހަމަ ކަމުގެ ވާހަކަ ދައްކާނެ ޝައުގުވެރިކަމެއް އެއްވެސް މީހެއްގެ ނެތެވެ.

މަނީ ހެއިސްޓްގެ ތީމަށް ހެދިފައިވާ މި އިޝްތިހާރުގައި ފެނިގެންދަނީ ވަގުންގެ ގްރޫޕެއް ވޭނެއްގައި އައިސް ޖެލީއަށް ވަންނަ މަންޒަރެވެ. ވަދެ އެތަނުގެ ކައުންޓަރުގައި ތިބި ދެ އަންހެން ކުދިންނަށް ބަޑިން ބިރު ދައްކައިގެން މައްޗަށް ގެންދެއެވެ. އަދި އެތަނަށް ކަރުނަގޭސް ދަޅެއް ދޫކޮށްލުމަށްފަހު އެތަނުގައި ތިބި ކަސްޓަމަރުންވެސް ހިމެނޭހެން އެންމެން ހައިޖެކް ކުރެއެވެ. އަދި ބަޑިދެއްކުމަށްފަހު އެތަނުން ފޭރެން މަސައްކަތް ކުރެއެވެ. ނަމަވެސް އެތަނުގެ ޝެފްގެ ފަރާތުން އެނގުނީ އެއީ އެކި ރަހަތަކުގެ ޕިއްޒާ ހަދާ އަދި ޑެލިވަރ ކޮށްދޭ ތަނެއް ކަމެވެ. ދެން އެ ގްރޫޕުން އެތަނުގައި ހުރި ޕިއްޒާތަށް ނަގައިގެން ގޮސް ވޭނަށް އަރައިގެން ނައްޓާލައެވެ. އެހިސާބުން ފާޒިލްގެ މާސްކް ނަގާފައި އެއީ ޖެލީކަމަށް ބުނެއެވެ.

ކައުންޓަރުގައި ތިބި ޝިފާ އަދި އާޝާގެ އެކްޓިން ވަރަށް ފާހަގަ ކޮށްލެވެއެވެ. ޝެފްގެ ރޯލުން ހަމްޕު ފެނުނު އިރު ހަމްޕުގެ އެކްޓިންގ ވެސް ހަމަ އެފަދައެވެ. ޖުމްލަކޮށް މި އިޝްތިހާރުގައި އެންމެން ވެސް ވަނީ ވަރަށް ފުރިހަމަ އެކްޓިންގ އެއް ދައްކާފައެވެ. އަދި ޚާއްސަކޮށް އިޓަލީގެ ލަވައެއްގޮތަށް އެތަނުން ލިބެން ހުރި ޕިއްޒާގެ ވައްތަރުތަކާއި އެހެން ޚިދުމަތުގެ ވާހަކަ ގެނެސްފައިވުމަކީ މި އިޝްތިހާރު އެންމެ ތަފާތުވެގެން ދިޔަ އެއްކަމަށް ވުން އެކަށީގެންވެއެވެ. މި ލަވަ ލިޔެ އަދި ކިޔާފައިވަނީ ވެސް ހަމްޕު އެވެ. ކޮންމެ އަކަސް މިއީ ދިވެހިންގެ ތެރެއިން އާންމުކޮށް ފެންނަ އިޝްތިހާރު ތަކާ ވަރަށް ބޮޑަށް ތަފާތު، ފެންވަރުގެ ގޮތުން ލާމަސީލު މަސައްކަތެކެވެ. އެހެންކަމުން މި އިޝްތިހާރުގެ ފަހަތުގައިވާ ސިކުނޑިކަމަށްވާ ހައްމާދު ރަޝީރު (ހަމްޕު) އާ ވާހަކަ ދައްކާލާ އިތުރަށް މައުލޫމާތު ހޯދާލީމެވެ.

"މި ކޮންސެޕްޓް މިއީ ހަމަ ފުރަތަމަ ޚިޔާލަށް ގެނެވުނު މަންޒަރުތަކެއް. ނަމަވެސް ބޭނުންވީ ކޮންމެ ކަހަލަ ގޮންޖެހުންތަކެއް ހުރި ނަމަވެސް މިކަން ކާމިޔާބު ކުރަން. އެހެންވެ މީގެ ކޮންސެޕްޓާއި ސްކްރިޕްޓް ލިޔެގެން، ޑެމޯއެއް ހަދައިގެން ބައެއް ވިޔަފާރިވެރިންނާއި ބައްދަލު ކުރިން. މިހެން ދެމަސް ވަންދެން އެކިއެކި ކުންފުނިތަކުގެ މީހުނަށް މި ކޮންސެޕްޓް ވިސްނާދެވޭތޯ މަސައްކަތްކުރިން. އެންމެ ފަހުން އަޅުގަނޑާ ދިމާވީ ޖެލީގެ އޯނާރ ފިރުޝާން އާ. އޭނާ އަށް މި ޕްރެޒެންޓޭޝަން ދައްކާލުމުން އޭނައަށް މި ކޮންސެޕްޓް ކަމުގޮސްގެން އަޅުގަނޑަށް މިކަން ކުރެވިދާނެކަމަށް އިތުބާރު ކުރި. މާގިނަ ވާހަކަ އެއް ނުދައްކާ. ނަމަވެސް ބުނީ މިއީ އަދި ރާއްޖޭގައި ނުހަދާ ފެންވަރުގެ އެއްޗެއް ދޯއޭ، ހަމްޕު އުޅެފިނަމަ ވާނޭ. އެހެންވީމާ ހިނގާށޭ މިކަން ކުރަން." މި އިޝްތިހާރު ހެދުމަށް ކުންފުންޏެއް ހޯދުމަށް ކުރެވުނު ބުރަ މަސައްކަތް ހަމްޕު ކިޔާދިނެވެ.

"ދެން އޭގެ 2 ދުވަސްފަހުން އެމް.އޯ.ޔޫ އެއްގައި ސޮއި ކުރީ އެއް މަސް ތެރޭގައި މިކަން ނިންމާ ހަވާލު ކުރުމަށް"  ކަމަށް ހަމްޕު ހާމަ ކުރިއެވެ. އެއް މަސް ތެރޭގައި ކުރެވުނު މަސައްކަތް މިހާރުވަނީ އާންމުންނާއި ހަމައަށް އައިސްފައެވެ. ހަމްޕު ފާހަގަ ކުރި ގޮތުގައި ޖެލީގެ ވެރިޔާ ފިރުޝާން އަކީ ޒުވާނުންގެ ޤާބިލްކަން އަގުވަޒަންކުރާ އަދި ފުރުސަތުދީގެން އެމީހުން ބާރުވެރިކުރުވަން މަސައްކަތްކުރާ ލީޑަރެކެވެ.

އިތުރަށް ހަމްޕު ފާހަގަކުރި ގޮތުގައި ވަރަށް ގިނަ ފަހަރަށް ޒުވާނުންގެ މި ފަދަ ޚިޔާލުތައް ހިފައިގެން ވިޔަފާރިވެރިންގެ ގާތަށް ދިއުމުން އެކުދިން ލަދު ގަންނަވާ ނުވަތަ މާޔޫސްކުރުވާ ބީދައިން އެކުދިންނާ މުޢާމަލާތު ކުރެވިފައި އެބަހުއްޓެވެ. އެގޮތަށް މި ކޮންސެޕްޓަކީ ވެސް މަނީ ހެއިސްޓްގެ 3 ވަނަ ސީޒަން ފެށުނު ހިސާބުން ފެށިގެން ތައްޔާރުކުރެވިފައިވާ ކޮންސެޕްޓެއް ކަމަށާ ނަމަވެސް މިކަމަށް އަމަލީ ސިފައެއް ގެނެވި އާންމުންނާއިހަމައަށް މި ގެނެވުނީ މަނީ ހެއިސްޓްގެ 5 ވަނަ ސީޒަން ނެރެން ކައިރިވެފައި ވަނިކޮށްކަން ހަމްޕުވަނީ ފާހަގަ ކޮށްފައެވެ.

ހަމަ އެގޮތަށް ހުނަރުވެރި ޒުވާނުންނަށް ވެސް ހަމްޕުގެ ނަސޭހަތެއް އެބަ އޮތެވެ. އެއީ ކުރަން ގަސްތުކުރާ ކަމެއްގައި ސާބިތު ކަމާއި އެކު ހިތްވަރު އެލުވާނުލާ ކުރިއަށް ދިއުމެވެ. މިގޮތަށް މަސައްކަތްކޮށްފިނަމަ ކާމިޔާބުވާނެކަމުގެ އުއްމީދު މިވަނީ އާވެފައި ކަމަށް ޝުކުރުވެރިކަމާއެކު ހަމްޕު ކިޔާދިނެވެ.

އިޝްތިހާރުގެ އެހެން މަސައްކަތްތަކަށް ބަލާއިރު މީގައި ބޭނުން ކުރެވިފައިވާ ކޮސްޓިއުމް އިން ފެށިގެން ކޮންމެ ޕްރޮޕަކީވެސް އެތައް ދުވަހެއްގެ މަސައްކަތުން، އަތުން ތައްޔާރުކޮށްފައިވާ ތަކެއްޗެވެ. އަދި ވީޑިއޯގައި ފެންނަ ބޮމަކީ، ލޭޒަރ މެޝިންއަކުން ކަނޑައިގެން، އެއަށް ބޭނުންވާ އާލަތްތައް ހޯދައިގެން ތައްޔާރުކޮށްފައިވާ އަސްލު ސްމޯކް ބޮމެކެވެ. މި ފުރިހަމަ މަސައްކަތަށްފަހު ހަމްޕުގެ އުއްމީދަކީ، އާރޓްސްގެ ދާއިރާގައި މަސައްކަތްކުރާ ޒުވާނުންނަކީ ހުނަރުވެރި އަދި ޤާބިލްބައެއްކަން ގަބޫލުކޮށް ބަލައިގަނެ އެމީހުންގެ ކުރިމަގަށް އިންވެސްޓްކުރާނެ، އިންވެސްޓަރުންތަކެއް ރާއްޖޭގައި އުފެދިގެން ދިއުމެވެ.

ހަމްޕުގެ މި މަސައްކަތުގައި އޭނާއަށް އެހީތެރިވީ މީހުނަށް ޝުކުރުއަދާކޮށް އޭނާވަނީ ފޭސްބުކްގައި ވަރަށް ދިގު ޕޯސްޓެއް ކޮށްފައެވެ. މި ޕޯސްޓްގައި ހަމްޕު ފާހަގަ ކޮށްފައިވާ ގޮތުގައި މި ޕްރޮޖެކްޓް ކާމިޔާބުވެގެން މިދިޔައީ އޭނާއަށް އެހީތެރިވި ހުރިހާމީހުންގެ ބުރަ މަސައްކަތުގެ ސަބަބުންނެވެ.

ހަމްޕުގެ މި މަސައްކަތާއި ގުޅޭގޮތުން ގްރެފިކް ޑިޒައިނަރ އަކާ ސުވާލުކޮށްލުމުން އޭނާ ބުނީ" ބަސްހުއްޓިފަ މިހިރީ. މިއީ ދިވެހި ތާރީޚްގައި ފެނިފައި ނުވާފަދަ ފުރިހަމަ މަސައްކަތެއް. ވަރަށް ކުޅަދާނަ ތަޢުރީފް އޮއްސަންޖެހޭވަރުގެ މަސައްކަތެއް މިއީ. ފަންނު ނޭނގޭ މީހުނަށް އަގުވަޒަން ނުކުރެވުނު ނަމަވެސް މިއީ މި ދާއިރާގައި މަސައްކަތްކުރާ މީހުން މިސާލުނަގާނެ މަސައްކަތެއް" ކަމަށެވެ.

ތީރުގެ ފަރާތުން އެދެނީ ހަމްޕުއާއި މި ފަންނުގައި މަސައްކަތްކުރާ އެހެނިހެން ޒުވާނުންނަށް ވެސް ކުރިއެރުމާއި ކާމިޔާބީއެވެ. އަދި މިފަދަ ގިނަ ފުރުސަތުތަކެއް ޒުވާނުންނަށް ފަހި ވެގެން ދިއުމަކީ އަޅުގަނޑުމެންގެވެސް އުއްމީދެވެ.