އަޅުގަނޑުމެންގެ ތެރޭގައި ކޭކު އެޅުމުގެ މަސައްކަތް ކުރާފަރާތްތައް ވަރަށް ގިނައެވެ. މީގެ ތެރޭގައި އެންމެ ގިނައީ ކަނބަލުންނެވެ. ގިނަ މީހުން ފާހަގަ ކުރާގޮތުގައި ކޭކް އެޅުމުގެ މަސައްކަތް ފަށާފައިވަނީ އެކަމަށް ޝައުގުހުރެގެންނެވެ. އަދި ކުރިއަށްދަނީވެސް އެކަމަށް އޮންނަ ޝައުގެއްގެ ބޮޑުކަމުން އެހެން ކަމެއް ކުރަން ބޭނުން ނުވާތީއެވެ. ނަމަވެސް ޝިނިޔާޒް ނުވަތަ އާންމު ނަމުންނަމަ ޝީނިގެ ވާހަކަ ތަފާތެވެ.
ޝީނި މި މަސައްކަތް ފަށާފައިވަނީ އޭނާގެ އަމިއްލަ ދަރިފުޅުގެ އުފަން ދުވަހަށް ބޭނުންވާ ކޭކް އަމިއްލަ އަތުން ތައްޔާރު ކުރުމުގެ ފަޚުރުލިބިގަތުމުގެ ބޭނުމުގައެވެ. އޭގެކުރިން ކޭކް ހެދުމަކީ އެއްގޮތަކަށް ވެސް ކުރާ ހިތްވި ކަމެއް ނޫނެވެ. އަދި މިކަމުން އާމްދަނީ އެއް ހޯދައިގެން އުޅެވިދާނޭ ޚިޔާލަށް ވެސް ނުގެނެއެވެ. ކަމަކަށް ޝައުގުވެރިކަން ނެތްނަމަވެސް މީހެއްގެ ފޮރުވިފައިވާ ހުނަރެއް ހުރެދާނެ އެވެ. މިކަމުގެ އެންމެ ރަގަޅު މިސާލަކީ ޝީނިއެވެ.
މީގެ 6 އަހަރު ކުރިން ދަރިފުޅުގެ އުފަން ދުވަސް ފާހަގަކުރުމަށްޓަކައި ތައްޔާރުވަމުން ދިޔައިރު އެދުވަހަށް ބޭނުންވާ ކޭކު ދުރު މީހަކު ލައްވާ އަޅާކަށް ޝީނި ބޭނުމެއް ނުވިއެވެ. ވީވަރަކުން ކޮންމެ ކަމެއްވެސް ކޮށްދޭން ބޭނުންވީ އަމިއްލައަތުންނެވެ. އެގޮތަށް އެންމެ ފުރަތަމަ ތައްޔާރު ކުރި ކޭކްވެގެން ދިޔައީ ޝީނިގެ މުސްތަޤްބަލުގައި ދަރިންގެ ކާރީގައި ގޭގައި ހުރެގެން އާމްދަނީ ހޯދުމަށް ކުރެވޭނެ ރަގަޅު މަސައްކަތެއްގެ ބިންގަލަށެވެ.
View this post on Instagram
ޝީނިއަށް އޭނާގެ ކިބައިވާ ހުނަރުއެނގުމުން ފަހަތަށް ބެލުމެއް ނެތެވެ. އެކި ރަހަތަކުގެ، އެކި ޑިޒައިންގެ ކޭކު އެކި މުނާސަބަތުތަކަށް ޚާއްސަކޮށްގެން އަޅައެވެ. އެންމެ އަޅާ ހިތުން އަޅަނީ 3-ޑީ ކޭކް ކަމަށް ޝީނި ބުނިއިރު އޭނާގެ 3-ޑީ ކޭކުތައް ވަރަށް އަސްލާ އެއްގޮތެވެ. ކޭކު އެޅުމަކީ ރަހައާއި އެއްވަރަށް ނުވަތަ އެއަށްވުރެ ބޮޑަށް އޭގެ ފަރުމާއަށް ބެލޭ އެއްޗެކެވެ. އެހެންކަމުން ވަކި ޑިޒައިނެއް މީހަކު ދީފިނަމަ ވީ ވަރަކުން އޭގެ އަޞްލާއި އެއްގޮތަށް އެ ކޭކު ހެދުމަށް ޚާއްސަ ސަމާލުކަމެއް ޝީނި ދެއެވެ. އަދި މިކަމުގެ ސަބަބުން އޭނާގެ ފަރާތުން ޚިދުމަތް ހޯދާ ފަރާތްތަކުގެ ހިތްހަމަ ޖެހުން ވަރަށް ބޮޑަށް ލިބޭ ކަމަށް ޝީނި ހާމަ ކުރިއެވެ.
ކޮންމެ މަސައްކަތެއްގައިވެސް ކުރިއަށް ދެވެނީ އެކަމަށް ހިތްވަރު ދޭނެ ބަޔަކު ތިބެގެންނެވެ. ޝީނިއަށްވެސް މި މަސައްކަތް ކުރެވެނީ އާއިލާގެ ވަރަށް ބޮޑު އެހީތެރިކަމަކާއި ކުރިއަށް ދިއުމަށް އެމީހުންގެ ފަރާތުން ހިތްވަރު ލިބޭތީއެވެ.
ކޭކް ޑެކަރޭޓްކުރުމަށް ބޭނުން ކުރެވޭ ތަފާތު އައިސިންގ ގެ ތެރެއިން އެންމެ އުނދަގޫކަމަށް ޝީނި ފާހަގަކޮށްފައިވަނީ ފޮންޑެންޓެވެ. ނަމަވެސް ފޮންޑެންޓް ބޭނުންކޮށްގެން ޝީނި ހަދާފައިވާ ކޭކްތައް ބަލާލުމުން އެއްވެސް ވަރަކަށް އެކަން ފާހަގައެއް ނުވެއެވެ. ވަރަށް ފުރިހަމަ އެވެ.
ތަފާތު އެކި ފަންނުވެރިންގެ މަސައްކަތް ބަލާ އެމީހުންގެ މަސައްކަތާއި ގުޅޭގޮތުން ސުވާލުކޮށްލުމުން ވަރަށް ގިނަ މީހުންގެ ޝަކުވާ އަކަށް ވެފައި އޮންނަނީ އެ މަސައްކަތަށް ބޭނުންވާ ސާމާނު މާލެއިން ނުވަތަ ރާއްޖެއިން ލިބެން ނުހުންނަ ކަމުގެ ޝަކުވާއެވެ. ނަމަވެސް ޝީނި ފާހަގަކުރިގޮތުގައި ކޭކު ހެދުމަށް ބޭނުންވާ ހުރިހާ ސާމާނެއް ކަހަލަ ގޮތަކަށް މިހާރު މާލެއިން ލިބެން ހުރެއެވެ. އެހެންކަމުން މި މަސައްކަތް ކުރުމުގައި ދިމާވާ އެއްވެސް ދައްޗެއް ނެތެވެ.
މި މަސައްކަތުގައި މިހާތަނަށް ކުރެވުނު އެންމެ ފުރިހަމަ ފުރިހަމަ މަސައްކަތެއްގެ ގޮތުގައި ޝީނި ފާހަގަކުރީ އޭނާގެ ކޮއްކޮގެ ކައިވެންޏަށް ތައްޔާރު ކުރި 4 ޓަޔަރ ކޭކެވެ. މި ކޭކުގައި ބޭނުން ކޮށްފައިވާ ތުނި ފަތްތަކަކީ ކޮންމެ ފަތެއް ވަކިން ހަދާ ކުލާ ޖައްސާފައިވާ ފަތްތަކެކެވެ. މިއީ ބުރަ އަދި ކަވި މަސައްކަތެކެވެ. ނަމަވެސް ކޭކު ނިމުން އިރު ބަލާލަން ވަރަށް ނަލަ އެވެ.
ބަބްލީ ކޭކްސް އިން ކޭކު އޯޑަރ ކުރުމަށް ފޭސްބުކް ނުވަތަ އިންސްޓަގްރާމް އިން މެސެޖް ކުރެވޭނެއެވެ. ޝީނިއަކީ އޭނާގެ ހުރިހާ ކަސްޓަމަރުންނާ ވެސް ޚާއްސަކޮށް ރެގިއުލަރ ކަސްޓަމަރުންނާ ވަރަށް ގާތް ގުޅުމެއް ބާއްވާ ފަރާތެކެވެ. ސަބަބަކީ މަސައްކަތް ކުރިއަށް ދަނީ ކަސްޓަމަރުންގެ ފަރާތުން ލިބޭ ފީޑްބެކްތަކަށް ބަލައިގެން ރަގަޅު ކުރަން ހުރި ކަންކަމަށް ސަމާލުކަން ދީގެން ކޮންމެ ދުވަހަކު އާ ކަމެއް ދަސްކުރަން ޢަޒުމު ކަނޑައަޅައިގެން ކުރިއަށް ދާތީއެވެ.
ކޮވިޑް-19 އާއި ގުޅިގެން މި ވިޔަފާރިއަށް އައި ބަދަލުތަކާއި ގުޅޭ ގޮތުން ސުވާލުކޮށް ލުމުން ޝީނި ބުނީ، ކުރިން ހަމަ ކޮންމެ ދުވަހަކުހެން ކަހަލަ ގޮތަކަށް ކޭކް އޯޑަރުތައް ލިބޭ ކަމަށާ ނަމަވެސް މިހާރު ހަފްތާއަކު އެއް އޯޑަރ ނުލިބޭ ހަފްތާތައް ވެސް ދާކަމަށެވެ. މިއީ ކަމާ ބެހޭ އިދާރާތަކުގެ އިރުޝާދުގެ ދަށުން މީހުން އެއްވެ އުޅުމާއި ޕާޓީތައް ބޭއްވުން މަދުވެފައި ވުމުން ދިމާވެފައިވާ ޙާލަތެކެވެ. ނަމަވެސް އަޅުގަނޑުމެން އެންމެންގެ ވެސް އުއްމީދަކީ ލަސްނުވެ މިކަމުން މިންޖުވުމެވެ.
ނިންމާލަމުން ޝީނި ފާހަގަކޮށްފައިވާ ގޮތުގައި ކޭކް ހެދުމަކީ ގޭގައި ދަރިންގެ ކައިރީގައި ތިބެގެން އާމްދަނީ ހޯދުމަށް އަންހެނުން ކުރަން ހަމަ ވަރަށް ރަގަޅު މަސައްކަތެކެވެ. މިހާރުވެސް ކޭކްގެ ވިޔަފާރި ކުރަމުންދާ ކުންފުނިތަކުން އެކަން ކުރަނީ ގިނަ ފަހަރަށް ބިދޭސީން ލައްވައެވެ. ނަމަވެސް މިކަމަށް ގިނަ އަންހެންކަނބަލުން ނިކުތް ވަރަކަށް ބިދޭސީންގެ މި ވަޒީފާތައް ދިވެހި އަންހެންކަނބަލުންގެ އަތްމައްޗަށް ފިރުކިގެން ދިއުމަކީ ދުރުގައިވާ ކަމެއް ނޫނެވެ. އަޅުގަނޑުމެން ދެކެން ބޭނުންވަނީ ޝީނި ފަދަ އަންހެންކަނބަލުން އިތުރުވެ އެމީހުންނަކީ ހުނަރާއި ލިބޭ އާމްދަނީގެ ގޮތުން ބާރުވެރި ބަޔަކަށް ވުމެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން