ހެދުން ފަރުމާ ކުރުމުގެ އެންމެ ކުރީގައި އުޅޭ ގުއްޗީގެ ފަރާތުން އެންމެ ފަހުން ނެރެފައިވަނީ، ވިނައިގެ ދިޔައިން ލަށް ޖައްސާފައިވާ ޖިންސާއި ޑަންގްރީ އެވެ. ޖިންސެން ވިއްކަނީ 600 ޕައުންޑަށެވެ. އަދި ޑަންގްރީ އެއްގެ އަގަކީ 1400 ޕައުންޑެވެ.

މިކަމަށް ފާޑުކިޔާ ގިނަ ބަޔަކު އަންނަނީ ސޯޝަލް މީޑިޔާގައި ޕޯސްޓްތައް ކުރަމުންނެވެ. އެކަކު ބުނީ އެމީހުގެ ގޭގެ ބަގީޗާގައިވާ ވިނަ ގަނޑުން ހިލޭ ޖިންސުގައި ލަށް ޖެއްސެއް ހުއްޓާ އެ އަގަށް ޖިންސް ނުގަންނާނެ ކަމަށެވެ. އަނެކަކު ބުނީ ގުއްޗީގެ ލަށްޖެހި ޖިންސް ބޭނުން ނަމަ އެކުވެރިކަން ކަނޑާލަން ޖެހޭނެ ކަމަށެވެ.

އިތުރު މީހެއްގެ ޓްވީޓްގައި ވަނީ، ބޭރުގައި މަސައްކަތް ކޮށްގެން ޖިންސް ހަޑިވިކަން ދައްކަން ހަމަ އެވަރަށް ޚަރަދު ކުރަން ޖެހޭތޯ ސުވާލުކޮށްފައެވެ.

ކޮންމެ ގޮތަކަށް އާންމުގެ ޚިޔާލު ހުރި ނަމަވެސް ގުއްޗީ އިން ބުނީ މިއީ 100 އިންސައްތަ ގުދުރަތީ ކޮޓްން ބޭނުން ކޮށްގެން ހެދިފައިވާ ޖިންސް ކަމަށާ، މި ޖިންސު ހެދުމަށް ކޮޓްން ހެއްދުމުން ފެށިގެން ޖިންސު ފެހުމާއި ހަމައަށް ވެސް އެއްވެސް ކެމިކަލެއް ބޭނުންކޮށްފައި ނުވާނެ ކަމަށާ، މިއީ ތިމާވެއްޓާ ރައްޓެހި ގޮތަކަށް އުފެއްދިފައިވާ ޖިންސެއް ކަމަށެވެ. މި ޖިންސު ދޮންނަށް ބޭނުންކުރަން ޖެހޭ ފެނުގެ އަދަދު މަދު ވާނެ ކަމަށާ ޖިންސު ދޮންނަ ފެނުން ބިންގަނޑަށް އެއްވެސް ކަހަލަ ގެއްލުމެއް ނުވާނެކަމަށް ވެސް މި ކުންފުނިން ހާމަ ކުރިއެވެ.