"ދަރިފުޅުމެންނޭ..! ތިޔަހަރަ އުނިގަހުގެ ހިޔަލުގާ މަޑުކޮށްލާ އިނގޭ..! ބައްޕަ އަންނާނަން ދަރިފުޅުމެން ބަލާ..!" ބޮއްކުރަލުގެ ރިޔާ އައްސާ ނިމުމުން، އެއްގަމުގައި ތިބި އަހަރެންގެ ދެ ދަރިންނަށް އަހަރެން ބުނީމެވެ. މެންދުރުފަހުގެ އިރު، އަސުރަށް ލަނބައިލައިފިއެވެ. މޫދުގައި އޮތީ ފޮސް ދިޔަވަރެވެ. ފައްތިޔަލުން ބޮއްކުރާ މޮހާލައިގެން، މަޅުގަނޑުމަތީ ހުރެ ރިތުން ކަނބަމުން، އެ ފޮސްދިޔައިގައި ތޮށިމަތިން އުރަފަށާއި ހަމައަށް ބޮއްކުރާ ކެނބީމެވެ.

އިރުދަށުން ޖެހެމުން ދިޔަ ވައި ރޯޅިތަށް ބޮއްކުރަލުގާ ބީހެން ފަށައިވިއެވެ. ބޮއްކުރާ ކަނބަން ގެންގުޅުނު ރިތް ބާއްވާފައި ރިޔާ މޮހާލާ ދޫކޮށްލީމެވެ. ވައިގެ ތެރެއަށް އުހަށް ނެގި މި ރިޔަލުގައި އިރުވައިގެ މި ރީތި ވައިރޯޅިތައް ހިފައިލައިފިއެވެ. ބޮއްކުރަލުގެ ހުންގާނަށް އަހަރެން އެރީ އެއް އަތުން ދަންމާނުގައި ހިފައިގެން ހުރެއެވެ. ފުރަތަމައިނުންވެސް އަހަރެން ބޮއްކުރާ އަނބުރާލީ ވައި ފުލަށެވެ. މިގޮތަށް ހަދާލުމުން ބޮއްކުރާ ދުވާނީ އިރުން ހުޅަނގަށެވެ. ބަޚުރުގެ ލޮނުގަނޑު ދެއަތަށް ކަފަމުން އަހަރެންގެ ބޮއްކުރާ ދުވަން ފަށައިފިއެވެ. ރިޔަލުގައި ވައި އެޅިފައި ހުރީ އޭގެ އެންމެ ފުރިހަމައަށެވެ. ޖެހެމުން ދިޔަ ވަޔާއި ހެޔޮވަރުވާ ވަރެއްގައި އަހަރެން ދިއައީ ދަންމާނު ހެޔޮވަރު ކުރަމުންނެވެ. ގުތުރަތްތެރިކަމުގެ މި ހިތްގައިމު ތާސީރުގައި އަހަރެންގެ ނަފުސު ހިތްހަމަޖެހެމުން، ފެންވަރަމުން ދިޔައެވެ.

އަހަރެންގެ ރަށާއި ޖެހިގެން ހުޅަނގުގައި މީހުން އުޅޭ ރަށެއް މިއަތޮޅަކު ނޯންނާނެއެވެ. ނަމަވެސް ދޮޅަހަކަށް ފަޅުރަށް މާދުރުގައި، އެކި ދިމަ ދިމާލުގައި އޮންނާނެއެވެ. ވަޔަށް ފަހި ކަމާއި އެކީގައި ހުޅަނގަށް ފައިބައިގެން އައި އަހަރެންގެ ބޮއްކުރާ ރަށުގެ އޮއެމަތިން ނައްޓާ ހުޅަނގަށް ފައިބައިފިއެވެ. ކުރިމަތީގައި ހިކިފަސް އެހެން ރަށެއް ލޮލުކުރިމަތީގައި ނޯންނާނެއެވެ. އެހެންކަމުން ދެން އިތުރަށް ހުޅަނގަށް ދިއުމަކީ ފަހަރުގައި އަހަންނަށް ހެދިދާނެ ގޯހެއް ކަމަށްދެކި ބޮއްކުރަލުގެ މިސްރާބު ވައިކޮޅަށް ހަދާލަން ރިޔާ ފުރުޅާލީމެވެ. ރިޔަލުދޯނި ފަހަރު ސީދާ ވައިކޮޅަށް ނުދުވާނެތީ އަހަރެންގެ ބޮއްކުރަލުގެ ވެސް މިސްރާބު ބެހެއްޓީ އިރު އުތުރަށް ވާގޮތަށެވެ. ޒާތަކަށް ބިތަށް އޮވެ އަހަރެންގެ ބޮއްކުރާ ފިރުކެން ފެށިއެވެ. ވައި ފުލަށް ފައިބައިގެން އައި ވަރަށްވުރެ ދުވެލި އެތައްގުނައަކުން މަޑެވެ. ބޮއްކުރަލުގެ މައްޔަލުން ދެއަތަށް ކަފަމުން އުކަމުން ދިޔަ ރާޅުތައް މަދުވެއްޖެއެވެ. ބަނޑުފިލައިގައި ވިއްދާފައި ހުންނަ ރާޅުތައް އަމުދުން ގިނަވެއްޖެއެވެ. މިއީ ރިޔަލުގައި ދަތުރު ކުރާއިރު އައު ކަމެއް ނޫނެވެ. ބޮއްކުރަލުގެ ހާލައިގެން މަޑުމަޑުން ފިރުކެމުން ކުރިއަށް އަރަމުން ދިޔައެވެ.

އަހަރެންގެ އިންތިޒާރުގައި އަހަރެންގެ ދެ ދަރިން ރަށު އަތިރީގައި ތިބޭނޭކަން ހަނދާންވީ ކުއްލިއަކަށެވެ. އެވަގުތު އަހަރެންގެ ހިތް ކުޑަކޮށް ނުތަނަވަސް ވިއެވެ. އެކުދިން އަހަރެންގެ އިންތިޒާރުގައި އެތާ ކިހާއިރަކު ތިބޭނެ ބާއޭ އަހަރެން ހިތަށް އެރިއެވެ. ބޮއްކުރަލުގެ ދުވެލި އަހަރެންނަށް ލަސްވެއްޖެއެވެ. ބޮއްކުރާ ކުރިއަށް ނުދުވާހެންވެސް އަހަަރެންނަށް މިހާރު ހީވާން ފަށައިފިއެވެ. އިރުގަނޑެއްގެ އިންތިޒާރަށްފަހު ބޮއްކުރާ ރަށުގެ އިރުމަތިން ނައްޓާ ކުރިއަށް ޖެހިލައިފިއެވެ. އޭރު އިރުވެސް ގޮސް އޮބަން ތައްޔާރު ވަނީއެވެ. އަހަރެންނަށް ލަސްވެފައި ހުރިވަރުން އަވަހަށް ބޮއްކުރަލުގެ މިސްރާބު ރަށާ ދިމާލަށް އަނބުރާލީމެވެ. ރިޔާ ފުރޮޅާލާ ބޮއްކުރާ ހެޔޮވަރު ކޮށްލީމެވެ. ނަމަވެސް އޭރު ޖެހެމުން ދިޔަ ވައިރޯޅިފަށް މަޑުމަޑުން އިރު ދެކުނަށް އަރައިފިއެވެ. ރަށާ ދިމާލަށް ވީއްލައިލެވުނުލެއް އަވަހޭ ވެސް ބައެއް ފަހަރު ހިތަށް އަރަންފަށައިފިއެވެ. އިރުވައިގެ ދުވަސްތަކަކީ އޮއެ ބާރު ދުވަސްވަރެއްކަންވެސް އަހަރެންނަށް އިނގެއެވެ. ބޮއްކުރާ ދުވަމުންދާ މިސްރާބުން، މި ވައިޖެހޭ މިސްރާބުން، މި އޮއެވަރުގެ ވިއްދުއްތަކުން، ރަށް އަތުވާނޭ ބާއޭ ހިތުގައި ސުވާލު އުފެދެން ފަށައިފިއެވެ. ރަށް އަތުނުވެ ރަށުގެ ހުޅަނގުން ނައްޓާލަފަނޭ ކަމުގެ ނުތަނަވަސްކަން ބޮޑުވެއްޖެއެވެ. ހާސްކަމާއި ބިރުވެރިކަން އިހުސާސް ކުރެވެން ފަށައިފިއެވެ. ރަށުގައި ތިބި އަހަރެންގެ ދެ ދަރިންގެ މަތިން ހަނދާންވެ ހިތުގެ ވިންދު އަވަސްވާން ފަށައިފިއެވެ. އެދަރިންގެ އަމާ، ރުގިއްޔާ މަތިން ހަނދާންވެ ނޭވައި ކުރުވާން ފަށައިފިއެވެ.

ހިތުގައި އެކި ހިޔާލުތައް ގިނަވެ ހީގަންނަން ފަށައިފިއެވެ. ކަނޑަށް ފަލި ބާލާ ރިޔަލާ ފައްޔާއި އެއްކޮށް ދުއްވާނީއޭ ވެސް ހިތަށް އެރިއެވެ. ނަމަވެސް އެކަނި ހުރި ބިކަ އަކަށް އެވަރު ކުރާނީ ކިހިނަކުން ހެއްޔެވެ؟ ޖެހެމުން ދިޔަ ވައިރޯޅިފަށް ކުޑަކޮށް ހެޔޮވެއްޖެއެވެ. އެއީ ރަހުމަތެއް އަދި ނިއުމަތެއް ކަމަށް އަހަރެންނަށް ހީކުރެވުނެވެ. ނަމަވެސް ވައި މަތި ބަލާލި އިރު ވިލާ ބޮލެއް ޖަހާފައި ހުއްޓެވެ. އަޑި އަޑިން ވިދާހެންވެސް ހީވެއެވެ.

އެއްފަހަރު އޮއްސެމުންދާ އިރަށް، އަނެއްފަހަރު ރަށާއި ދިމާލަށް އަދި އަނެއްފަހަރު ވިލާގަނޑާއި ދިމާލަށް ބަލަމުން އަހަރެންނަށް ހުރެވުނީ ގަބުވެފައެވެ.

 

(ނުނިމޭ)