ގުގުރާލީ އަޑި އަޑިންނެވެ. ވިލާގަނޑު ނެގެމުން އައީ އޭގެ އެންމެ ހަލުއި ދުވެލީގައެވެ. ވައި ބާރުވެ، ކަނޑުގެ ރާޅުތައް ރުޅިއައިސް ކޮޅަށް ޖެހުނީ އިސާހިތަކުއެވެ. ހަދާނޭ ގޮތެއް ނޭނގި މީދަލެއް ކޮއްޓެއްގައި ތެޅޭހެން އަހަންނަށް ބޮއްކުރާތެރޭ ތެޅެވެނީއެވެ. ރިޔާވެސް ތިރިކުރަން މަޖުބޫރުވީ ޖެހެމުންދިޔަ ބާރު ވައިންނެވެ. ދުނިޔެމަތި މުޅިން ބަދަލުވެ ނާމާންކަން ވެރިވެއްޖެއެވެ. އޮއްސެމުން ދިޔަ އިރު އޮއްސުނީކަމެއް ނޯއްސޭކަމެއް ނޭނގެއެވެ. ހާލަތު ބަދަލުވީ ހަމަ ކުއްލިއަކަށެވެ.

ބޯމަތީ އޮތް ވިލާގަނޑުން ވާރޭގެ ތިކިތަށް އަހަރެންނާ ހަމަލާދޭން ފަށައިފިއެވެ. ކުއްލިއަކަށް ބޯކޮށް އޮހިގަތް ކެރިގަނޑުގައި ރަށުގެ އަލި ފަނޑުވެއްޖެއެވެ. ބޮއްކުރަލުގެ ދިރުނބާކޮޅު ހުރީ ކޮންދިމާލަކަށްކަންވެސް ނޭނގެއެވެ. ވާއެއް ނުވާއެއް، ތަނެއް ދޮރެއް، ކަނޑެއް ފަޅެއް ސާފެއް ނުވެއެވެ. އަހަރެންނަށް ފެންނަ ހަމައެކަނި މަންޒަރަކީ މި ކުޑަ ކުޑަ ބޮއްކުރާގަނޑު އެކަންޏެވެ. ބޮއްކުރަލުގެ ވަތުގައި ޖަމާވަމުންދިޔަ ފެންތައް ހިއްކަން ފެށީމެވެ. ހާސްވެ ނުތަނަވަސްވެފައިވާ ހިތަކައިގެންނެވެ. ފެންކަޅިވެ ރޮވިފައިވާ ލޮލަކައިގެންނެވެ. ކުނބާ ދިމާލަށް ގުދުވެ ގުދުވެ އުޅެނިކޮށް، ބޮއްކުރާގަނޑު ހަލުވާލި ގޮތަކުން އަހަރެންގެ ބޮލުގެ ކޮންމެވެސް ހިސާބެއް ނިކަން ބާރުލާފައި ކުނބުގައި ބަން ކިޔާފައި ޖެހިއްޖެއެވެ. އަހަރެންގެ ހޭވެރިކަން ޒާތަކަށް ކުޑަވާހެން ހީވިއެވެ. ނަމަވެސް ހިތްވަރުކޮށްކޮށްފައި ދިޔަތައް ހިއްކޭތޯ އަހަރެން ބެލީމެވެ.

ބޮއްކުރާ އޮތީ ކޮން ހިސާބަކު ކަމެއް އަހަންނަކަށް ނޭނގެއެވެ. މި ބޯކެރިގަނޑުތެރޭ، މި ރުޅިގަދަ ރާޅުތަކު ތެރޭ މިހޭދަވީ ކިހާ ވަގުތެއްކަމެއްކަމެއްވެސް އަހަންނަކަށް ނޭނގެއެވެ. އިނގޭހާވެސް ކަމަކީ އަހަރެންގެ ވަރުހުސްވެއްޖެ ކަމެވެ. މި ހަށިގަނޑުގައި ދެން އިތުރަށް ލެވޭނޭ ހިތްވަރެއް ނެތްކަމެވެ. އަޑުން އަޑުލާ އަހަންނަށް ރޮއެގަނެވުނެވެ. އަޑު އަހާނޭ އަދި އިވޭނޭ މީހަކު ހުރީކީއެއް ނޫނެވެ. ނަމަވެސް އަހަންނަށް ހަމަ ރޮއެގަނެވުނީއެވެ. ވިލާގަނޑުގެ އަސަރު މަޑުވާކަށް ނޫޅެއެވެ. ގަދަވަޔާއެކު ވެހެމުން ދިޔަ ބޯވާރޭ ހުއްޓުމެއް ނެތި ވެހެމުން ދިޔައެވެ. ހީކަރުވައިގަނެފައި އަހަރެން ހުރީ ހަރަކާތް ހުއްޓިފައެވެ. ބޮއްކުރަލުގެ ވަތަށް ޖަމާވަމުންދިޔަ ފެންތައް ދަނީ އިތުރުވަމުންނެވެ. ވަތުގައި ހެދެމުންދާ ދިޔަގަނޑު ދަނީ ބޮޑުވަމުންނެވެ. ނަމަވެސް ދެނެއް އަހަރެންގެ ގަޔަކު ލާނޭ އިތުރު ހިތްވަރެއް ނެތެވެ. އަހަރެން ހުރީ ޖިސްމާނީ ގޮތުންނާއި ނަފްސާނީ ގޮތުން ބަލިކަށިވެފައެވެ. ނަމަވެސް އަހަރެންގެ ހިތާހިތުން މާތް ﷲ ދުއާކުރީމެވެ. އަހަރެންގެ ލޯބިވާ އާއިލާއާ ބައްދަލު ވުމަށް އެދި ދެންނެވީމެވެ.

މާގިނައިރުތަކެއް ވީހެންނެއް އަހަންނަކަށް ނޭނގެއެވެ. ނަމަވެސް ބޮއްކުރާ ފެނުމަތީ އޮތީ ހަމަ ކިރިޔާއެވެ. ދިޔަ ގަނޑު ބޮޑުވެ އުތުރެނީއެވެ. އަހަރެން ސިއްސައިގެން ދިއައީ ބޮއްކުރަލަށް އައި ކުއްލި ގުޑުކަމުންނެވެ. ދެތިންފަހަރު އެކަމެއް ތަކުރާރުވެސްވެއްޖެއެވެ. އެއްފަހަރު ބޮއްކުރަލުގެ ފަށަންގަނޑެވެ. އަނެއްފަހަރު ބޮއްކުރަލުގެ ބަނޑުފިލައެވެ. މިކަހަލަ ގޮތަކަށް ބޮއްކުރާގަނޑު ކޮންމެވެސް ތަނެއްގައި ޖެހެންފަށައިފިއެވެ. އަހަރެން އިތުރަށް ނުތަނަވަސްވިއެވެ. ކަނޑުމަތި އެޅީބާއޭ ނުވަތަ ކޮންމެވެސް ރޫހާނީ ކަމެއްބާއޭވެސް ހިތައްއެރިއެވެ. ނަމަވެސް ކުއްލިއަކަށް ވިދާލި ވިދާލުމުން ކުރިމަތީގައި ރަށެއް އޮތްތަން އަހަރެންނަށް ފެނުނެވެ. އެހިސާބުން އަހަރެންނަށް ވާނުވާ ރެއަކާލާން ފަށައިފިއެވެ. ރަށެއްގެ ތޮށިމަތީގައި ބޮއްކުރާގަނޑު ބީހެނީއެވެ.

ދެނަކާދެނެއް ނެތެވެ. ވަރުބަލިވެ މާޔޫސްވެފައިވާ މި ކަލޭފާނުގެ ފުރާނައަށް ލިބުނީ ކޮންކަހަލަ ބާރެއް ކަމެއް ނޭނގުނެވެ. ބޮއްކުރާ ދޫކޮށްލާފައި ފަތައިގަތީ އެ ރަށާއި ދިމާލަށެވެ. ރޭނގަނޑުގެ އަނދިރީގައްޔާއި ބޯވިއްސާރައިގައި އެ ރަށާ ދިމާލަށް ފަތަން އިނގެނީ ވިދާވިދާލުމުންވެނެ. ތޮށިމަތި ހުރަސްކުރުމުގެ ތެރޭގައި މުރަކައާއި ގައުތަކުގައި އަހަރެންގެ ފައި ޖެހި އަނިޔާތަކެއް ވިއެވެ. ނަމަވެސް އެ ތަދުގެ އިހުސާސެއް އެވަގުތު އަހަންނަކަށް ނުކުރެވުނެވެ. ހިތްވަރާއި ބުންވަރުން އެ ރަށުގެ ގޮނޑުދޮަށަށް އެރިއްޖެއެވެ. ފަސްގަނޑުމަތީ ބަނޑުއަޅަމުން ކުޑަކޮށް އެއްގަމަށް ޖެހިލީމެވެ. ހިތްވަރުކޮށްފައި ތެދުވެވޭތޯ ބެލީމެވެ. އަހަންނަށް ތެދުވެސް ވެވުނެވެ. ފާޑަކަށް ހުރި ބަލި މާނެއްހެން އަހަރެން އެ ފަސްގަނޑުމަތިން ރަށުގެ ހޭޅިއާއި ދިމާލަން ހިނގައިގަތީމެވެ. ފަހަރަކު ފިޔަވަޅެއް ލަސްލަހުން އަޅަމުން ކުރިއަށް ދިޔައީމެވެ. ނަމަވެސް އަހަރެންނަށް ދެވުނީ ތަންކޮޅަކަށެވެ.

އަހަރެންގެ ފައެއް ދެނެއް ކުރިއަކަށް ނޭޅުނެވެ. މީހާ އެއްކޮށް ތުރުތުރު ލާންފަށައިފިއެވެ. ލޯމައްޗަށް އަނދިރިކަން ވެރިވާންފަށައިފިއެވެ. މޭނުބައިކޮށް އޯކާއް ދެމެން ފަށައިފިއެވެ. އަހަންނަށް ހޮޑުވެސް ލެވުނެވެ. އޭގެފަހުން ބަން ލާފައި ބިންމަށްޗަށް އަހަރެން ވެއްޓުނުކަން އަހަންނަށް ހަމަ ޔަގީނެވެ. ނަމަވެސް ދެންވީގޮތެއް އަހަންނަކަށް ހަމަ އެއްގޮތަކަސް ނޭނގެއެވެ.

 

(ނުނިމޭ)