ދުވެފައިކަހަލަ ގޮތަކަށް އަހަރެންނަށް ދެވުނެވެ. ބޮއްކުރާގަނޑާ ހިސާބަށް ދެވިއްޖެއެވެ. ބޮއްކުރަލުގައި އެއްވެސް މީހަކު ނެތެވެ. ނަމަވެސް އެ އޮމާން ހުދު ފަސްގަނޑުގެ މަތީގައި އިންސާނުން ތަކެއްގެ ފިޔަވަޅު ފެންނާން ހުއްޓެވެ. އަހަރެން އެ ފިޔަވަޅުތަކުގެ ފަހަތުން ހިނގީމެވެ. އެ ފިޔަވަޅުތައް ހުރީ އެއްގަމަށް އަރާފައެވެ. ޒާތަކަށް ހަނިކޮށް އޮތް މަގެއްގެ ތެރެއަށެވެ. އެ މަގު ތެރެއަށްވެސް އަހަރެން ވަނީމެވެ. ތަންކޮޅަކަށް ދެވުނު ތަނާ ކާސިމާއޭ ކާސިމާއޭ ކިޔާ މީހަކު މާބަރަށް ހަޅޭލަވާތީ އަޑު އިވުނެވެ. އެ އަޑެއްގެ ފަހަތުން ހަމަ އެރާގަށް އަންހެނަކުވެސް ހަމަ އެހެން ގޮވާލައިފިއެވެ.

އަހަރެންވެސް މިހުރީއޭ މިހުރީއޭ ނިކަން ބާރަށް ގޮވާލީމެވެ. ދެން އެމީހަކުވެސް ކޮބާހޭ ކޮބާހޭ ހަމަ އެބާރު މިނުގައި ގޮވާލައިފިއެވެ. އަހަރެން އެމީހަކަށް އަހަރެން ހުރި ތަނެއްގެ މަގު ދައްކަމުން ކިޔައިދެމުން ދިޔައީމެވެ. އެ މީހުންގެ އަޑު މަޑުމަޑުން އަހަންނާ ކައިރިވާން ފަށައިފިއެވެ.

ގަސްތަކުގެ ކޯޅިތައް ބިންދޭ އަޑާއި، ނިކަން ހަރުކޮށް ނަގާ އަޅަމުން އަންނަ ދެތިން ފިޔަވަޅުގެ އަޑު ނިކަން ބާރަށް އެބޯ ޖަންގަލީގެ ތެރެއިން އިވެން ފެށިއެވެ. އުފާވެފައި އަހަރެން ހުރި ނަމަވެސް، އިވެމުންދާ އަޑުން އަހަރެން ޖެހިލުންވާން ފެށިއެވެ. އެ މީހުންނަށް ގޮވާލާނީ ބާއޭ ނުވަތަ ހިމޭނުން ހުންނަންވީބާއޭ އަހަންނަކަށް ނޭނގުނެވެ. ގޮތް ހުސްވެ ހަރަކާތް ހުއްޓިފައި ހުރެވުނީ އެ އަޑެއް އަންނަ ދިމާކަލަށް ބަލަހައްޓައިގެންނެވެ. 

އިރަކަށް ވުރެ އިރެއް އަޑު އަންނަނީ ބާރުވަމުންނެވެ. ކައިރިން ކޯޅިތަކާއި އޮފިތައް ހެލޭތަންވެސް ފެނެއެވެ. ނަމަވެސް މީހެއް ފެންނާކަށް ނެތެވެ. ކުއްލި އަކަށް ސިހުނީ އެމީހަކު ކާސިމާ ކޮބާހޭ ކިޔާފައި ނިކަން ކައިރިން އަނެއްކާވެސް ގޮވާލުމުންނެވެ. އަހަރެންނަށް ބަހެއްވެސް ނުބުނެވެއެވެ. އެ އަޑެއް އައި ދިމާލުން ދުވަމުން ދުވަމުން އަހަރެންނާއި ދިމާލަށް އެހެރަ އަންނަނީ އަހަރެންގެ ރުގިއްޔާއެވެ. އޭނާގެ ފަހަތުން އޭނާގެ އެއްބަނޑު އެއްބަފާ ބޭބެ އައެވެ. ރުގިއްޔާ އައިބާރުމިނުގައި އަހަރެންގެ ގައިގައި ބައްދާލިއެވެ. ދެމީހުންނަށް ރޮވުނެވެ.

ނަމަވެސް އަހަރެންގެ ބައިވަރު ސުވާލުތަކެއް އެބަ ހުއްޓެވެ. ބޮއްކުރަލަށް އަރައިގެން ރަށަށް ދިއުމަށް ކުރި އެ ދަތުރުރުގައި ހުރިހާ ސުވާލަކަށް ޖަވާބު ލިބުނެވެ.

އަހަރެން އޮތީ އަހަރެން ނިސްބަތް ވާ އަތޮޅުގެ ރަށެއްގައެވެ. ރަށާ އެންމެ ކައިރީގައި އޮންނަ ރަށުގައެވެ. ނަވެސް އެރަށުން އަހަރެންގެ ރަށް ފެންނާނީ ކިރި ކިރިޔާއެވެ. ރުގިއްޔާއާއި އޭނާގެ ބޭބެ އަހަރެން ހޯދަން މިރަށަށް އަންނަން އިނގުނީ ރުގިއްޔާއަށް ފެނުނު ހުވަފެނެއްގެ ސަބަބުން ކަމަށް ރުގިއްޔާ ބުންޏެވެ. ބޮއްކުރާ އެރަށު ފަޅުން ބޭރު ކޮށްލުމުން ރަށުގެ އަނެއް ފަރާތުން މަސްދޯންޏެއް ފެންނަން އޮތެވެ. އެއީ މުދިންބެ ދޯންޏެވެ. ރަށުގެ ފަޅު ކުޑަކަމުން މަސްދޯނި ނުވެއްދޭނެތީ ބޮއްކުރާގަނޑުގައި އެވެރިން ވަނީކަމަށް ބުންޏެވެ. އެ މަސްދޯނީގައި އަހަރެބްގެ އަލީ އާއި މޫސަވެސް ތިއްބެވެ. އަދި ރަށުގެ އެހެން ބައެއް ކަމުވޮށިގެންވާ މީހުން ތިއްބެވެ. އަހަރެންނަށް އުފަލުން ރޮވުނެވެ. އެންމެން ވެސް ތިބީ އަހަރެން ހެޔޮހަލުގައި ފެނުމުން ވަރަށް އުފާ ވެފައެވެ. 

 

ނިމުނީ.........