ދުވަސްތައް މާޒީއާއި އެކުވެގެން ދެއެވެ. ޝާނާއާއި މިސްހާތާއި ދެމީހުންގެ ދެމެދުގައި ލޯބީގެ ކުރިތައް ދުވަން ފަށައިފިއެވެ. ގަދަ ފެހިކުލައިގެ އައު އެތައް ކުރިއެއް އެ ދެމީހުގެ ލޯބީގައި ދިޔައީ ޖަހަމުންނެވެ. އަނެއްކޮޅުން ހާޖަރުގެ ކަށިކުނބުރު ވެޔޮތަކުން ޝާނާހެ ހިތުގެ ހުރިހާ ނާރުތަކެއްގައި ވަކި ދަމަމުން ގެންދެއެވެ. ޝާނާގެ ސިކުނޑި ދޮވެލުމަށް ހާޖަރު ނުޖަހާކަށް ކެމިކަލެއް ނެތެވެ. ބުރުސް ނާޅާ ހަމަ އެއްތަންކޮޅެއްވެސް ނެތެވެ.

ހާޖަރުގެ ވިސްނުން ތޫނުކަމާއި ކުޅަދާނަަކަމުން ޝާނާ އޭނާގެ ދަންޖާލުގައި ޖައްސާ ރަނގަޅަށް ތާށި ކޮށްލައިފިއެވެ. އޭގެ ސަބަބުން ޝާނާ އާއި މިސްހާތުގެ ގުޅުމަށްވެސް ބުރޫއަރަން ފަށައިފިއެވެ. ހާޖަރުމެން ގަބޫލު ކުރާ ފަދައިން ރިސޯޓުތަކަކީ ނަޖިސްް މުޑުދާރު ތަންތަނެވެ. އެ ތަންތަނުގައި ވަޒީފާ އަދާކުރާ މީހުންނަކީ ލާދީނީ މީހުންނެވެ. އެމީހުން ހޯދާ ފައިސާ އަކީ ކަނޑައެޅިގެން ހަރާމް ފައިސާއެވެ. މި ވިސްނުން ޝާނާގެ ވެސް މިހާރު ހުންނަން ފަށައިފިއެވެ. ޝާނާ އާއި މިސްހާތުގެ ގުޅުމަށް އެންމެ ބޮޑު ބުރޫއެއް އަރަން ފެށީ މި ސަބަބާއި ހުރެއެވެ.

ދުވަސްތައް އެހާލެއްގައި ވޭތުވަމުން ދިޔައެވެ. ޝާނާގެ ސުކޫލު އިމްތިހާނު ގާތްވަމުން އައެވެ. ނަމަވެސް ޝާނާގެ މާ ބޮޑު ޝައުގެއް އެކަމަކަށް ނެތެވެ. ފަރުވާލެއްވެސް ނުބަހައްޓައެވެ. ފިލާވަޅު ދަސްކުރުމަކީ މާ ކުރާހިތްވާ ކަމަކަށްވެސް ނުވެއެވެ. އެހެން އުޅެމުން ދަނިކޮށް އިމްތިހާނުގެ ވަގުތު އައިސް ޖެހިއްޖެއެވެ. ނަމެއްގައި އިމްތިހާނު ހަދަންވެސް ޝާނާ ދިޔައެވެ. އެނގުނު އެއްޗެއް އެނގުނު ވަރަކަށް "ހާވާފައި" ކޮންމެ ޓެސްޓެއްވެސް ނިންމާލައެވެ.

ހަފްތާއެއްގެ ތެރޭގައި ޝަނާގެ ޓްސްޓުތައް ނިމިއްޖެއެވެ. ދެން އޮތީ އެއް ހަފްތާގެ ޗުއްޓީއެކެވެ. މި ޗުއްޓީގައި ހާޖަރު ނިންމާފައި އޮތީ ޝާނާ ގޮވައިގެން ޕާކިސްތާނަށް ދާށެވެ. ޝާނާ އަށް ބޭނުންވާ ވަރަށް މުހިންމު ދަރުސެއް ދިނުމަށެވެ.

ޝާނާގެ އެންމެ ފަހު މެސެޖު މިސްހާތައް ކުރިއެވެ. އެ މެސެޖުގައި ހިތްދަތި ކަމެއް މާޔޫސް ކަމެއް ނުވެއެވެ. ނަމަވެސް އެ މެސެޖުގައި ވަނީ ހަރުކަށި ކަމާއި ގޮތްދޫނުކުރުމެވެ. މިސްހާތާއި އެކުގައި ލޯބިން އުޅެވެން ނެތް ވާހަކަ އާއި، މިސްހާތުވެސް ތައުބާން ވާން ޖެހޭނޭ ކަމަށް އެ މެސެޖުގައި އޮތެވެ. އަދި ޝާނާ ހޯދަން ދެން އުޅިގެން ނުވާނެކަމާއި ދުވަހަކުވެސް ދެން ނުފެންނާނޭ ކަމަށް އޮތެވެ.

ލޯބީގައި އެތައް ކުރިއެއް ފަޅުވަމުން ދިޔަ މިސްހާތުން މުޅިން މާޔޫސްވިއެވެ. ގޮތް ހުސްވިއެވެ. ތައުބާ ވާންވީ ވަރުގެ ކޮން ކުށެއް ކުރެވުނީބާއޭ ވިސްނަން ހުރެވެނީއެވެ. މުޅި މީހާ ގަބުވެ ދުވަހުގެ ޑިއުޓީއަށް ވެސް ނުދެއެވެ. މިސްހާތު ޝާނާއަށް ގުޅަން ކުރި ހުރިހާ މަސައްކަތެއް ވީ ނާކާމިޔާބެވެ.

މިސްހާތު އެކި ވަރުވަރުން ޝާނާގެ ހަބަރު ހޯދަން އުޅުމުގެ ތެރޭގައި ޝާނާގެ އާއިލާ މީހެއްގެ ފަރާތުން ޝާނާ ސުކޫލުފަރާތުން ލަންކާއަށް ދިޔަ ހަބަރު ލިބުނެވެ. ޝާނާ އޭނާގެ އާއިލާއަށްވެސް އޮޅުވާލީއެވެ. "ހައްގު" ގެ މަގުގައި ޝާނާ ދޮގެއް ހެދިއެވެ.

ދެތިން ދުވަސް ފަހުން ޝާނާމެން ޕާކިސްތާނުން ސީރިޔާއަށް ގޮއްސިއެވެ. މި ދަތުރުގައި ޝާނާގެ އިތުރުން ދެން ބައިވެރިވީ ހާޖަރާއި އޭނާގެ ފިރިމީހާއެވެ.

ޝާނާމެން ދަތުރު ކުރަމުން ދިޔަ ކާރު ސީރިޔާގެ ކޭންޕަކަށް މަޑުކޮށްލިއެވެ. އެތަނުން ޝާނާ އާއި ބައްދަލުވީ ހުސް ދިވެހިންނެވެ. ގާތްގަނޑަކަށް ވިއްސަކަށް ދިވެހިން ތިއްބެވެ. އޭގެ ތެރޭގައި 8 އަންހެނުން ވެސް ތިއްބެވެ. އެމީހުން ދެއްކި ކޮޓަރިއަކަށް ޝާނާ ވަދެ ފެންވަރާލައިގެން ނުކުތް އިރު ހާޖަރު ހުރީ ޝާނާއަށް މޫނު ބުރުގާ ހެދުމެއް ހިފައިގެން އައިހެވެ. ޝާނާ އެ ހެދުން ލައިގެން އެމީހުންގެ މަޖިލީހުގެ ތެރެއަށް ނުކުތް އިރު އެ މަޖިލީސް ފަޅު ފިލުވާފައި ވަނީ އެކި ވައްތަރުގެ ކެއުން ތަކުންނެވެ. އެ ސުފުރާގައި ދިވެހި ކެއުމާއި އަރަބި ކެއުން ހުއްޓެވެ.

އެ މަޖިލީހުގެ އެއް ކޮޅުގައި ހުދު ހެދުމެއްގައި އިން އުމުރުން ފަންސާހަކަށް އަހަރުގެ ފިރިހެނެއް އިނެވެ. އޭނާގެ ކަނާތް ފަރާތުގައި ހުސް ގޮނޑިއެއް އިނެވެ. ހާޖަރު އެދުނީ ޝާނާ ކުރެން އެ ގޮނޑީގައި ހިށީންނާށެވެ. ޝާނާ އެއްވެސް ޖެހިލުމަކާއި ނުލާ އެ ގޮނޑީގައި އިށީނެވެ. އެ ހިސާބުން ހާޖަރުގެ ފިރިމީހާ ތެދުވެ ޝާނާ އާއި ޝާނާގެ ކައިރީގައި އިން ފިރިހެން މީހާގެ ކައިވެނި ކުރެވޭ ވާހަކަ ބުންޏެވެ. ޝާނާ ދިޔައީ ސިއްސައިގެންނެވެ. ޝާނާގެ މާޔޫސްކަން އިތުރުވަމުން ދިޔައެވެ. ބިރުގަނެ ހާސްވާން ފެށިއެވެ. ނަމަވެސް ހާޖަރު ޝާނާގެ ކޮނޑުގައި ފިރުމަމުން ޝާނާއަށް ހިތްވަރު ދެމުން ދިޔައެވެ.

 

ނުނިމޭ......